لو كنت مكاني


لوكنت مكانك ..
كنت استبعد نفسى من التصويره
كنت استبعد خوفى عليا
وامسك بالمعدول اللوحة
أقرا وشوش الناس بالراحة
وقبل ما احدد خطى التالى
أغمس ف الإنصاف الريشة
****
لوكنت مكانك ..
كنت عدلت الرسمة شويه ..
حبه يمين .. أو عكس الدمعة
كنت طفيت اللبمة الحمرا
المنقاده هناك فى الواجهة
أو خليتها حتى ف زاوية
كنت رسمت ف نن العين
توتة ونخلة وبنى آدمين
سقف وشوشهم فوق المحنة
كنت محيت اللون الإسود ..
أو خففته بضى الفضة
يمكن يوم تشكرنى الحيطة
لما أعلق فوقها الرسمة
****
لوكنت مكانك ..
كنت اتعكز ع اللى باقى لى
من أمواج بتشاطر نيلى
هم الرحلة لبر سلامة ..
يبقى وصولهم هو وصولى
يبقى أمانهم هو أمانى
كنت زرعت ف قلب ولادى
تفاحة آدم .. ضحكة حوا ..
كنت بإيدى ..
قطفت النور من ثغر الفرحة
قدمته هدية لقلب حبيبه ..
رغم بكاها مانسيت مرة
تسرج خيل تحنانها عشانى
****
لو ...........................
لو حلزونه وتايه فيها ..
معنى اللوحه ومعنى وجودى
عقلى الواعى مات من خوفى
عقلى الباطن بيحذرنى ....
وبيسألنى
ليه متشخبط / ليه متلخبط زايغه عيونى ؟
و " ف " أحلامى و " ف " أفكارى
مليون حارس طالبين راسى
بتوقفنى لجان أيامى
وتفتشنى ..
وترفَّعنى ..
وتركَّعنى ..
أسجل رفضى ..
أعلن إنى .. ماخُنتش صوتى
تضرب ( دِبشك ) تحت بطاطى
أرفض اطاطى
تقرص تزنق ريشة وجعى
وتقلعنى .. جلدى وروحى
وتغربلنى .. أطير واتدرى
زى التبن ف جُرن الغله
أعفر اعفر زى النوَّة ..
وارجع أسكن خُن جروحى..........................
.........................
آسف جداً ..
كان مفروض أسال هل تقبل
تبقى مكانى .. ؟
مش أستثنى ولا اتخيل
إنى مكانك ..
إنى بحط الخط التالى
جوَّه اللوحة الكاتمه بإيدى
بس بلون نوارةْ حلمى
المتخفى بين أوراقى
وتحت بَطاط ترحال أفكارى
ف ليل ترحالى !!
...................
لو
كنت
مكانى
كنت
هاتعمل
أيه ؟..................
...................