تاجر الأسماء
أوبريت للأطفال
( لغة الحوار/ العامية المصرية)
عن قصة الأستاذ / محمد أمين
تأليف/ ربيع عقب الباب

مفتتح
منشد : أول مانبدى القول نصلى ع النبي العدنان
ونقول دا منه الرضا والسيرة والغفران
هو شفيع أمته وآيته فى القرآن
منه العظا والمثل فى الصبر والسمحان
قلب الغزال هفهف
ناب الأسد رفرف
سيف العدا حفحف
واترج كسرى هناك
من نور ميلاد أحمد
اللهم صلى وسلم عليه اللهم صلى وسلم عليه
(ينسحب وهو يردد) قلب الغزال هفهف
ناب الأسد رفرف
سيف العداحفحف
كورس : هانقدم حدوته جايز تطلع ملتوتة أو منحوته
وقديمة و إيه بنت لذينا ومشحوته
ماهى ريمه دايمابتحن وترجع لعوايد
ياما بتطلع مظبوطه
منشد : (صوت) ما هو أصل كل جديد قديم
من فات قديمة تاه وهان
أنا والتاريخ على وئام
أدرس وافهم فيه تمام
وادبر العقل السليم
كورس : إيه رأيكم تتفرجوا بعدين تقولوا رأيكم
إن كان رضا أو حتى كرسي ف الكلوب
ولينا رب و ليكوا رب
ومش هانبكى ع اللى هب و اللى طير الكلوب
نبدأ ؟ نبدأ
(ينسحب الكورس)
المشهد الأول
دكان فى عمق المسرح فى المستوى الأعلى عليه لافتة مكتوب عليها (تاجر الأسماء) الثعلب أمام الدكان ،وقد علق على صدره لافتة مكتوب عليها كلمة (حمامة) ومن حوله مجموعة من الثعالب كأتباع وتحمل نفس اللافتة ،وفى المستوى الأدنى يدخل من الجهة اليمنى منشد ومساعد بربابة أو مزمار بلدي أو دف 0

التعلب : يا أهل الخنادق 00 ياأهل الجحور
تعالوا أوامك 00 نقيم الجسور
نسيب العداوة 00 ودنيا الشقاوة
وننسى الندالة 00 ونرعى الضمير
يللا عليه 00 وفوتوا المخاوف
وفوتوا الظنون
مخالبي رامتها 00 ونابي بردته
تقولوا جنون !!
تقولوا فنون 00 تقولوا تقولوا
تقولوا عليل !!
دواه ف المحبة 00 فى عالم جميل
ولحمه أصيل !!
بتلو وضانى 00 لذيذون سمين
نويت م النهاردة 00 أفوت اللى كان
و أردم تاريخي 00 وغدري زمان
أبيع الأماني 00 وكل الأسامى
وغاية مرادي 00 محبة وحنان
(يؤدى ذلك بمصاحبة الثعالب من نفس الفصيلة)
كورس : لعبة جديدة 00 يابو التعالب
باين عليك 00الطبع غالب
قررت إيه 00 ويا الأرانب
يابو مكر حامى مالهش غالب
التعلب : دايما كده 00 ظلمني يا جنس البشر
لو مرة واحدة تروقو 00 وتصدقونى
ولا أنتو يعنى تقصدو 00 تجننونى
السبحة أهيه مابين صوابعى
والفرض صنته بقى فى طبعى
وربنا ياما غفر !!
كورس : من إمته دود المش 00 كان شر عسل ؟!
التعلب : بس اسمعونى 00 مرة واحدة يا عسل
لو كان لازمكم أمنية 00 أو حكمة أو شورة ومثل
م العين دى 00 قبل العين دى 00 وحسابكم وصل
كورس : وقال على رأى المثل 00 يامأمنة للتعالب
يا مأمنة للمصايب
والسم من جنس العسل
التعلب : أنا تحت أمر المحترم 00 بس بلاش من دا مثل
كورس : هاهاهأ ياشاطر 00 هاهاهـأ علينا
جحا عملها مرة 00 وقولنا جميلة
التعلب : اشمعنا يعنى تصدقو 00 جحا ومنى تهرقوا
الكحكه فى إيد اليتيم 00 وألف كف بتحرمه
كورس : هاهاهـــأ يتيم 00 آه يالئيم !!
التعلب : أنا بدى أخدم القرايب 00 أنا بدى أسعد الحبايب
وبختى ليه 00 ليه 00 معاكو خايـــب
كورس : آل بده يخدم القرايب 00 يا سلام
آل بده يسعد الحبايب 00
وده كلام (يختفى الكورس 00ويدخل المنشد)
المنشد : تعلب مسك سبحة 00 وحط الشال على أكتافه
وقال يا ناس
ندرنى رب الكون 00 وقال لى 00يامبتلى بالناس
كون الدليل والمثل 00 وكون قمـــر وناس
صدق كلامه 00 متعوس الرجا ياناس
ودوغرى راح له 00 يبوح له 00 لم رجع للناس
كورس : (يدخل 00 بينما المنشد يختفى) ناوى على إيه ؟
كورس2: ما أنتم عارفين !!
كورس : عارفين !! عارفين إيه ؟
كورس2 : عارفين 00 عارفين
أرنب1 : لأ مش عارفين !!
كورس : تحبوا تسمعوا 00 ونعيد ونزيد كمان ؟
أرنب5 : مش أنتم تقصدوا 00 يعنى إل 00 لا 00 لا لأه
التعلب قال لنا 00 دا حمامة حنينة
00 على صدره هاتلاقوها .. وجناحها لمنا !!
أرنب2 : من طيبته لبسها بجامة 00
وجزمة من عمر أفندي
وجوز شراب م السلخانة 00
وقمر صناعي أحمر بمبي
أرنب1 : عقبالنا زيها 00 ونرعى ف ضلها
التعلب خلاص 00 بقى حمامة
حمامة 0000000الله عليها
فى بقها غصن الزتون ..
والحب طالل فى عينيها00
التعلب قال لنا 00 دا رايد حبنا
كورس : قال لكم !! بتقولوا .. قال لكم
كورس : وهو كل القول يا ولدى 00 تصدقه ؟
لازم يكون لك رأى 00 لازم تكون لك عين
تشوف ويا الدماغ
تحسب وتقدر
وتقرر 00 ترفض أو تقبل
أرنب4 : القول والفعل 00 متعكزين على بعض
لو واحد ساب التانى
يقع الاتنين ع الأرض
كورس : الله 00 الله عليها
الحكمة طالعة 00 مشعشعة بالمفهومية
كورس2: بغبغنات 00 قرود !!
أرنب3 : عيب اختشى 00للوم حدود 00
حتى لو بنا عهود
أرنب4 : معذورين 00 حد برضه يقول كده ؟
أرنب3 : أنت مالك 00 كن فى حالك
أرنب2 : هيه ناقصه كمان كلامك
أرنب1 : يللا فوتنا 00 وفوت جيرتنا
أرنب5 : هو احنا كنا اشتكينا لك
كورس : بيبيع أسماء .. وحاجات سبحان الخلاق
حرية 00 و أبصر إيه أمنية
تقلية 00 ملوخية زى الشكولاتة
معجونة ملبس وبانيليه
أرنب4 : وحاجات م الصنف البراق !!
أرنب3 : أيوه 00 هايبيع أسماء
من غير تريقة 00 من غير مهزءة
وكلام حراق
كورس : احنا لا بنتريق 00 و لا احنا مزمزقين
احنا شفقانين 00 وحاولنا نصحى فيك
بس أنتم مسـروقين
الأرانب : (ما عدا أرنب 4) يللا بينا
كورس2: بس مفيناش من عياط ؟!
أرنب1 : هو احنا عيال صغار 00 و لا احنا عيال صغار
طب دا احنا بنفهموها 00 وهيه فى المحار
كورس : نقول يا رحمن يا رحيم 00 على المساكين
كورس2: صدق اللى قال المثل 00 الضم من جنس العمل
أرنب 2 : يللا بينا
أرنب1 : يللا ع الدكان
أرنب4 : مش قبله تحددوا 00 ها تقولوا إيه هناك ؟
وكلامكم يكون مرتب 00 مكتوب زى الميثاق
أرنب1 : ودى عايزة ترتيبات 00 ومناقشة وتحذيقات ؟
أرنب4 : أما ترتب أفكارك 00 وتوازن بين الواقع وبين
أحلامك
عمرك يوم ما هاتتعب 00 وخصوصا
لو حلمك تحقيقه بتشوفه
مابين أنياب أعداءك
أرنب3 : أف 00 نفسي تبطل يا بنى طريقتك فى التفكير
امشى بالبركة
تلقى البركة 00 طرحها خير !!
أرنب4: ماأقصدشى أضايق حد 00 و لا أبقى فى يوم مدب
البركة شيء جميل 00 ف أوقات تبقى المطب
أنتم رايحين السوق 00 والسوق مليان بروق
وحاجات ومحتاجات 00 من كل لون تدب
لازمن قبل مابتخطى 00 تسأل نفسك يافاروق
برقوق 00 ولا طماطم 00 ولا قماشات
ولا صهريج مدقوق
ولا أنا غلطان ؟
الأرانب : عداك العيب 00 ياحليوة ياذوق
كورس : (يظهر فجأة) متسربعين قوى كده ليه ؟
كورس2 : و إن كان البياع المدعوق ؟
الأرانب : أبو التعالب ؟!!
كورس : لازم تفكيرك يبقى طاقين
كورس2 : وكلام توزنه بالحرف
مش شغل ألاطه وظرف
كورس : لايغشك 00 ولا هايدوس لك على طرف
أرنب 4 : حرص من صاحبك
لحسن تسقط فى الجرف
كورس : حرص ماتخونش 00تسلم
كورس2: وتعيش بدل السنة ألف
(تكون اللوحة التى تعبر عن أحلام الأرانب)
أرنب2 : أنا راح أكون 00 أسد همام
ما أخافشى من جنس اللئام
وحش وليه الكون عــرين
لو حتى كانو مســعورين
أو مش تمــــــام
أرنب3 : و أنا هاكون قرد مسلسل
أرقص الكون و أزلزل
وازلط فى موز لما اتعنتل
ولا أخافشى من غدر الأيام
أرنب5 : و أنا نفسى يكون لى جناح
و أفضل هايم ســواح
قدامى الكون دا بــراح
واتخايل بيه ع النــاس
وياأرض انشدى ما تنهـدى
واحقق ... كل الأحلام
أرنب 1 : و أنا نفسى أكون سمكاية
أمرق فى الموج و أبلبط
والدنيا هاخدها معايا
ولا عمرى فى يوم اتصلبط ..
وأشرد على شط وأنام
الأرانب : يللا بينا ع الدكان يللا
عشان نحقق أحلامـنا
يللا بينا ع الدكان يللا
عشان نحقق أحــلامنا
أرنب4 : مفيش فايدة 00ياريتنى سكت
ولا قلت وعدت
على مزاجاتهم
فهموا كلامى
و أنا والله ماقصدت
كورس : ليه لأه ؟
طول بالك حبة
وبلاش م اليأس
وكتر الرهبة
أرنب4 : أحلام 00 ولا أوهام ؟!!
كله 00 عايز 00 يقلع توبه
يخرج منه !!
الأرنب 00 رافض كونه أرنب
أمله 00 يصبح تعلب
يصبح بجناح وبمخلب
كورس : و أنت !!
أحلامك إيه ؟
أرنب4 : جو الجحر اللى ورثته هاعيش
أحلم جواه بالأجمــــل
وعالم ......أرقى منه مفيش
وساعة ما أ قدر أحول جحري لقصر
كل وحوش العالم ماتحوشنيش
منشد : مد القد من غير ندم 00على قد ما يقدرك ربك
واوعى تبص لفوق لتسوق 00 وتحط على جانبك
سعيك ورزقك وعملك 00 همه باب ســعدك
والعلم ويا العمل بالأمل 00 تبنى قلوع مجــدك
بلاك



المشهد الثانى
الثعلب أمام الدكان يغنى ومن حوله أتباعه ،
والأرانب تتقدم خلف بعضها
التعلب : افرح ياتعلب 00 ياماكير00 آن الأوان 00 من بعد غيبة 00 تنــول مناك
بهاريز هاتشرب 00 يا أمير 00 كندوز بتلو
00 وشوربه منه 00 بدون عراك
والضانى إيه 00 بالمسكافيه 00 يمرق بشوق
00 زى الحليب 00رايد حشاك
تقلى وتشوى 00 فى الصوانى 00
والكباب 00 هايكون فطارك 00 وعشاك
افرح وزقطط 00ياأمير 00 آن الأوان
00 من بعد غيبة 00 تنول منــاك
الأرانب : السلام والتحية 00 لصاحب الطلعة اللى هيه !!
التعلب : أهلا ومرحب بالحبايب 00 جيه سعيدة ملالية
كان النهار مشمشى 00 فى لحظة بقى ألماظية
الأرانب : أهلا بيك 00 الله يخليك
التعلب : ياسلام ياولاد 00 مامحبة إلا بعد ندالة
أرنب1 : تسلم وتعيش 00ياوزير الغابة
التعلب : عشت ياولدى 00 الله يوزرك
ويسمنك 00 ويدورك
قرب تعالى هنا فى ريحى00 خلينى أريقك
واسمع دعايا وتسابيحى 00 وخوفى عليك
لا وزارة ولا حتى إمارة 00عادت تلزمنى
نفسى ومنى عينى ياأمارة 00 ماتبعدوا عنى
أرضيك 00 تراضينى 00 حبكم فيه الكفاية
حبكم هو البشارة 00 ودكانتى البداية
حد قال طلبه إيه ؟
الأسامى تحت أمرك
بس يللا بوح لى بيها
أرنب1 : يعنى لو اخترت اسم 00 ولا رسم
ألقى شكل 00 وألقى جســم ؟
بكل حسم !!
التعلب : بس انطق 00 هاتلاقينى 00 تحت أمرك
أرنب1 : (أحلام الأرانب) حيث كده 00 أنا نفسى أكون
قصدى يعنى 00حـمار بلون
كم قلم هنا ع اليمـين
كم قلم هنا ع الشميل
يعنى بصريح العبــارة
نفسى أكون حمار مخطط 00
نفس أكون ملك الحمير
التعلب : حتة واحدة ؟
أرنب1 : حتة واحدة 00 حتة واحدة 00 أمال ياطيب 00
ولا أبقى حمارمحتحت
التعلب : دا أنت واد صحيح مزفلط
يللا روح 00 اجري وحفلط
بس علق اللوحة دى
اوعى تغلط
(يقدم له لوحة مكتوب عليها حمار مخطط)
أرنب1 : وأنت خد 00 حلال عليك 00 شرشر الجزر
كُل وحِش فيه تمام 00 أصله بيقوى النظــر
التعلب : (يقهقه) يللا روح الله يجذر 00
سلسفين اللى جابوك
يللا اجرى زى شــــــوقك
مهما تجرى 00 العيال بكرة يجيبوك
دا أنت حبة ننى عينى 00 لو فى يوم هاتجافينى
راح أجيبك حتة حتة 00 زى ماجبت أبوك
أرنب2 : و أنا والنبي 00 و أنا والنبي
التعلب : برضه حمار ؟
أرنب2 : حمار ده إيه 00 حمار ده إيه 00 يوك يابيه 00 يوك يابيه
التعلب : فى نفسك إيه 00 فى نفسك إيه 00 ما تقول عليه
00 ما تقول عليه !!
أرنب2 : أسد غضفر 00 زعيق أزعق 00 زئير أخنفر
آكل فى غزلان وأرانب 00 طيور وتعابين وتعالب
ولا حد يقدر يسألنى 00 ولا حد يقدر يحاكمنى
لو حتى من دمها شارب
التعلب : أسد وماله يا أسد 00 أنت أسد
ولا عمر ينفع فيك رصاص
ولا حد سيف 00 وأو رصــد 00
عقل كبير شايل جسد
أرنب2 : أنا أسد 00 أنا أسد 00 أسد يا واش مش أسد (يأخذ اللوحة)
وحش كاسر مش مرض00
وحش كاسر مش مرض
التعلب : وأنتم ياطيبين 00 عدلكم إيه قولوا لى ؟
ماتقعدوش ساكتنين00
كل اللى بدا لك 00 قوله من غير تردد
هاتلاقى اللى فى بالك 00وجيبك ياحليوة يسدد
أرنب 3 : أنا 00 أنا نفسي 00 أكون أنا
قرد مسلسل 00 أنا 00 ما أعرفشى مستحيل
أطلع جبال 00 و أنزل جبال
كل الشجر مملكة 00 و أنا عليها الأمير
التعلب : روح 00 روح وأنت (يعطيه اللوحة) قرد
روح واتقندل 0
استنى سلسلتك خدها
تيجى فى الحساب تخصمها
شغل الأونطة 00 مانيش عيل
أرنب3 : أنا قرد 00 أنا قرد 00 أنا قرد
أرنب5 : وأنا بقى 00 بقى بقى 00
لا باحب نهيق و لا مأمأه
أنا نفسى أكون طاووس 00
منفوش تياه مهووس
وجيبى ملان فلوس 00
من غير ذل وشقا
التعلب : بس كده 00 خد لك لوحة 00
وادعى لى فى كل طريحة
وع العالم ودوس
أرنب5 : أنا طاووس 00 طاووس خالص
خالص مالص 00 وريش جناحي مش خالص
بيزوم أوت 00بيزوم إن
وكل الألوان تتآنس 00وأنا بشطارتى أقعد أفن
أرنب6 : و أنا سمكة 00 سمكة وزعانفها
فشر السفينة ... ومقاديفها
ماتخافشى من حوت أو تعلب
ولا اخطبوط .. يجى يمتها
التعلب : بس كده 00 غالى وطلبك أغلى
سمكاية جميلة 00 لكن بغلة
نقول شبار 00 لأ بلطية
أرنب 6 : بس البياض دايما أغلى 00 بيلهلب البال والنية
التعلب : كده 00 كده 00 برضه هاجيبك
لو حتى هاتعدى الميه
وتعيشى فى البحر العالي 00
أبو موجه عالية مدوية
بلطية 00 شبار 00 بياضة ؟
أرنب6 : طب قول حوتايه 00 اخطبوطة
داهية سودا مدوية
التعلب : ولا تزعلى 00 ولا تغضبى
سعد الأرانب مقصدى
يللا اجرو يلا هيصوا
وغنوا ياما وارقصوا
وقولو بأعلى صوت
يا سلام عليها الحرية
كورس : (يدخل) و لا أجمل منها فى الدنيا
لو طلتها خدها بالقوة
يا سلام عليها الحرية
كورس2 : حرية !! حرية التعالب !!
كورس : لأه 00 كده غلط 00 كده غلط 00
حرية التعلب كدبة
يسرق بها أحلام غيره
الكون ينام ويطمن
وهو بيربى فى طيره
وكرشه أوسع م الدنيا
وضميره أطول من ديله
كورس2 : حرية تعرفها فى دينك
كتبات جدودك هاتدلك
وتاريخ عريض يملا عيونك
لو من عدو بكرة يذلك
أرنب4 : للفرد لو عرف المعنى 00
يعيش كما خلقه المولى
زهرة جميلة مندية
لو خفت من كونك أرنب
م الاسم وحده راح تهرب
وتشوف أوام مليون مهرب
تقضى حياتك من غيرها
حرية يعنى 00 مفيش تردد
لاخوف ولا 00كلمة تودد
حقك وواجبك 00منهم تحدد
تحب تكره 00 تدوس تمجد
كورس2 : الله على سحر الكلمة 00
لها طعم جميل نغماية
كورس : و المعنى بيرسم ورداية
تسقيها 00 ترعرع00تتجلى
أرنب4 : وتعيش فى أوانك
لا هاتزعل من ديلك
ولا من كبر ودانك
أو ضعفك 00 أو قصر لسانك
كورس : هاتحب الاسم 00 اسمك
وتحب الرسم 00 رسمك
وتحب وتعشق أوطانك
كورس2 : مش زى أصحابنا
أرنب4 : أرجوكم 00 القسوة حرام
كورس2 : لساك بتدافع عنها
أرنب4 : أهلي 00 ومش هاتبرى منها
كورس : عايشين أوهام
كورس2 : أيهى لعبة !! ياخالت لا بانت !!
كورس : و اللعب جميل !!
أرنب4 : مش لعبة 00 مش لعبة
دى كدبة ؟
كورس : نقصد اللعبة الكدبة ؟
كورس2 : لعبة وكدبة 00 بيكا وسيكا 00
وشغل أونطة على بوليتيكا
أرنب4 : إزاى ؟
كورس : هاتشوف إزاى !!
بلاك

المشهد الثالث
فى ديار الأرانب
أرنب6 : (يصيح) يا أرانب 00 يا أرانب 00 الحقوا 00 حوشوا المصايب
(تقبل الأرانب بعد التكرار)
أرنب1 : جرى إيه ؟
أرنب2 : حد مات لك 00 ولا شاكلك ؟
أرنب3 : ولا خد لوحتك 00 و أكلك ؟
أرنب6 : لا حد مات لى 00 و لا شاكلى 00 ولا خد لوحتى وأكلى
أرنب1 : أمال إيه ؟
أرنب6 : بس أقول و أعيد فى إيه ؟
أرنب2 : قول ياسيدى 00 ولا أجيب لك مسكافيه 00
شيشه حمى 00 ولا .....
أرنب6 : الأرانب 00 الأرانب
أرنب1 : مالها الأرانب 00 و لا تقصد التعالب ؟
أرنب6 : الأرانب 00 الطاووس !!
أرنب3 : تقصد اللى علقت لوحة الطاووس ؟
أرنب6 : اختفت 00 اختفت
الأرانب : اختفت !!
أرنب4 : يعنى إيه اختفت ؟
أرنب6 : اختفت 00 مالهاش أثر يا جاموس
أرنب1 : إزاى يا معدوم النظر ؟
أرنب6 : اختفت مالهاش أثر 00 ماتفهمونى يا بقر !!
أرنب1 : دا مصمم على رأيه 00 وع القباحة !!
أرنب6 : أنا حاسس بالخطر
أرنب7 : (يقبل جاريا) يا أرانب 00 يا أرانب
أرنب2 : ماله راخرى 00 جى يجرى 00هيه شوطه جايه بدرى
أرنب7 : يا أرانب (يلتقط أنفاسه) الأرانب الحمامة ......
أرنب3 : تقصد اللى علقت لوحة الحمامة ؟
أرنب7 : اختفت 00 مالهاش أثر
أرنب4 : يعنى مش الطاووس لوحده00 كل واحد منكم
يجهز ف لحده
أرنب3 : دى مصيبة !!
أرنب2 : دول أرانب هجاسين 00 سيبكم منها
يللا بينا 00 لننعدى من جنونها
أرنب4 : حد برضه يقول كده ؟!!
أرنب2 : يعنى إيه دول ودول يختفوا ؟
أرنب4 : يعنى فيه فى الأمر شىء00 ولازمن تكشفوه
أرنب2 : أنت طول عمرك كده !!
كل شيء بتحرفه 00وتلت فيه!!
أرنب4 : مش هادافع 00 أو أرافع 00هاتفرج وبس !!
كورس : السكات ماعادتش نافع00السكات هايكون جريمة
أرنب4 : يعنى أعمل إيه 00 قولوا لى ؟
أرنب6 : قبل ماالشكوك تاخدنا 00 وندور رحاها
أرنب1 : نشوفهم راحوا فين !!
أرنب3 : فاتت إزاى علينا
أرنب2 : هيه إيه ؟
أرنب3 : الأرانب اللى شايله فى صدرها لوحة التعالب
و الأسود !!
أرنب2 : تقصد إيه 00 تقصد اللى0000000
أرنب3 : مش وحوش
أرنب6 : يا نهار مالهوش لون 00أما تبقى واقعة واقعة
00لأ وسوده كمان وفاقعة
أرنب3 : مفيش غيرها الأرانب (ميم يتجادلون 00
يتعاركون 00 ترتفع حدة العراك)
أرنب4 : ياناس 00 جرى لكم إيه 00 الأرانب زى ما هي
00 الأرانب عمرها ماتاكل ف بعض
أرنب1 : صح .. الأرانب00 الأرانب عمرها00 ماتاكل
ف بعض
أرنب3 : تقصد إيه ؟
أرنب4 : بص 00 طاوع 00 شوف ف المراية
بص فيها00 شفت إيه ؟
أرنب3 : شفت نفسى
أرنب4 : شفت أرنب 00 ولا تعلب ؟
أرنب3 : شفت أرنب
أرنب4 : يعنى مش قرد مسلسل ؟
أرنب3 : لأ00 مفيش قرد مسلسل
أرنب4 : كلام جميل
أرنب1 : احنا نقعد زى مااحنا00 ننتظرهم قد يوم أو
يومين
أرنب6 : و إن ماجوش ؟
أرنب3 : دوغرى هاندور عليهم
كورس : دوخينى يالمونة 00 دوخينى يالمونة
أرنب4 : طب ماتاخدوا نفسكم دلوقتى حالا
دوروا .. وبلاش سكات
أرنب2 : رأيكم يعنى ندور ؟
أرنب4 : أمال إيه !
أرنب6 : ولو إن 00 ولو إن الدماغ عمال يزن
فى الخلية ألف جن
ولو إن 00ولو إن
المشاهد لسه باهتة
والكلام ناقصة له حتة
والدماغ فى ألف سكة
مش تمام00 عمال يزن
أرنب4 : يللا بينا كلنا 00 كل واحد من طريق
الأرانب : أيوه يللا
أرنب4 : دوروا فى كل المسالك 00 والمهالك 00
ودعبسوا عند الصديق
والعدو !!
الأرانب : العدو !!
أرنب3 : دا كلام غريب وحامض
أرنب2 : أنت ناسى إننا فى سلام ويا التعالب
00ولا ناسى ؟
أرنب4 : المهم 00 يللا بينا 00 و بلاش ناكل فى بعض
الأرانب: يللا بينا
بلاك

المشهد الرابع
كورس : يللا بيهم 00 يللا بينا
كورس1 : عامية عنهم واضحة لينا (فرد من الكورس)
كورس2 : كل واحد زاره ظنه (فرد من الكورس)
كورس3 : دوغرى قفل الكابينه
ملهى باللوحة الجميلة
غصب عنه
كورس : دوروا !!
كورس1: اتكسروا م اللف ياما
كورس : رجعوا بكيانين غلابا
(الأرانب تدخل في حالة تهالك وضعف)
أرنب4: يعنى ضاعوا؟
أرنب1: كده هو من غير وداع
ومن سكات
أرنب6 : لا ما أطنش00 هيه يعنى أرضنا كانت رزية 00 و لا رزية ؟!!
أرنب4 : على قولك يابن عمى 0ولا تاهوا فى سكة تانية ؟
أرنب1 : تقصد إيه ؟
أرنب4 : أقصد اللى فى بالى وبالك
أرنب1 : بالى وبالك 00وأنت إيش عرفك باللى فى بالى ؟
أرنب4 : اللى شايفه على وشك 00 وف عينك 0
أرنب1 : يعنى تقصد 0000000
أرنب4 : اللى فى بالى وبالك !!
أرنب1 : أبو التعالب ؟
أرنب4 : أبو التعالب !!
أرنب1 : بس يعنى 00 دا 00000
أرنب4 : بس إيه ؟
أرنب2 : أبو التعالب 00 لأ ما أطنش 00 أنت ناسي إنه
أرنب4 : إنه إيه ؟
أرنب2 : حلف اليمين !!
أرنب1 : وف سدره بترفرف حمامة
أرنب4 : يجرى إيه 00 لو نسأله ؟
أرنب1 : نسأله !!
أرنب4 : يجرى إيه 00 هو السؤال حرام علينا !!
أرنب6 : بصحيح 00 يجرى إيه !!
أرنب2 : يللا بينا
الأرانب : يللا بينا
كورس : يللا بينا 00 يللا بيهم
ألف رحمة ونور عليهم
يللا بيهم 00 يللا بينا
عامية عنهم 00 واضحة لينا
بلاك

المشهد الخامس
أبو التعالب يجلس أمام الدكان وحوله الأعوان
التعلب : (يغنى غنوته : افرح ياتعلب يامكير 00 آن
الأوان من بعد غيبة تنول مناك)
الأرانب : (تقبل) السلام والتحية
التعلب : (يرحب) ياميت أهلا وسهلا (لأعوانه) الكراسي
اللى هيه للحوم المجانية 00 ياسلام 00 أما
ليكم وحشة وحشة
الأرانب : الأرانب !!
التعلب : قلتوا إيه ؟
الأرانب : الأرانب الطاووس والحمامة !!
التعلب : إشمعنا ؟
أرنب4 : الأرانب الطاووس والحمامة !!
التعلب : مش هاريحكم 00 إشمعنا
أرنب1 : الأرانب الطاووس والأرانب الحمامة
التعلب : راحوا فين ؟
أرنب4 : إحنا جايين نسألك!!
التعلب : ما أنا عارف 00بس بستعبط 00تسألونى
.. ليه بقى هاتزعلونى ؟
أرنب2 : لو سؤالنا يزعلك 00 بلاشو خالص 00بس يعنى
00 قصدى 00 يمكن 00 شفتهم 00 ولا حاجة
التعلب : (يلعب لسانه) قال شفتهم 00 قول كلتهم !!
أرنب4 : ولا يعنى السؤال حرام ؟
التعلب : حرام 00 لو فى عرف الناس حرام أحلله
كورس : أى نعم 00 حلل وحرم 00 يجرى إيه ؟ قل لهم
00 قل لهم 00 راحوا فين ؟
التعلب : راحوا مطرح ماراحوا
كورس : راحوا فين ؟
التعلب : ماأنتوا عارفين راحوا فين 00هيه عجبة00 و لا
غاويين المشاغبة
كورس : مش فى صالحك الكلام ده !!
التعلب : مش فى صالحى 00 أعلى ما فى خيلكم أركبوه!!
كورس : يابجاحتك !!
التعلب : أنا حر
كورس : أنت حر 00 وهو حر
والمساكين الغلابه بالفزع عايشين فى مر
كورس2: شفت خوفهم 00 جو جوفهم 00 أعلى من
صوت الأدان
التعلب : الغلابه 00 المساكين 00 ياحبايبى 00طعمكم
يهوس بالحب هان
البقاء للأقوى دايما 00 و أنا الأقوى !!
كورس : لأ بقى 00 مش هانسكت !!
التعلب : أعلى مافى خيلكم أركبوه
كورس : ورقابتك 00 يعنى مش خايف عليها ؟
التعلب : عايز أقول لجناكم حاجة 00 علقوها فى ودانكم
الكبار مابيخافوش 00 ولا أنتم نسيتم
00 إننا جو غابة00أنتم ليه مابتفهموش!!
كورس : الكبار مابيخافوش لحد أمته ؟
التعلب : لما ليوم القيامة 00 بالمخالب ينهشوا 00
يخطفوا 00 يعملوا كيف ما بدا لهم
00أصلهم مابيشبعوش 00 أقول إيه ؟
كورس : ومجلس الغابة الوقور ؟
التعلب : فروة بس 00 منظرة 00 و جواز مرور
كورس : فروة 00 منظرة !!
التعلب : طبخة 00طبخناها زمان
لجل كل شيء يبان بالقانون
كورس : بالقانون
كورس3 : تضربوهم بالقانون
كورس2 : تقتلوهم بالقانون
كورس1: تدبحوهم بالقانون
كورس : تهدموا جحورهم فوقيهم بالقانون
تسرقوا خيرهم وبيرهم بالقانون
أرنب2 : قلت إيه يا بوالتعالب 00 يا أمير ؟
التعلب : أمال إيه 00 شفتهم !!
الأرانب : شفتهم!!
التعلب : شفتهم (يتحسس بطنه باستمتاع) وهضمتهم !!
الأرانب : همه فين ؟ طمن قلوبنا 00يطمنك رب السما
التعلب : الأرانب الحمامة 00 لو تبصوا فوقكم ياما
تلاقوها فى السما00 وفى وشها أحلى ابتسامة
شوفوا طايره 00 الله عليها
زى نجمة 00حوليها00 سرب طاير بيلاغيها
بصوا بصوا .. ع الألاطة والأيامه !!
كورس : كداب فى أصل وشك
التعلب : (يغيظ الكورس) عقبلكم زيها 00 وتطيروا عندها
الأرانب : يا سلام 00 الله عليها 00 الله عليها
أرنب3 : حاجة تهوس 00 حاجة تخبل 00 هيه صح
(لأرنب4) شف .. لجل ماتبطل معافرة 00 ومناكفة
فينا !!
أرنب4 : صبرك عليه يابن عمى
والأرانب الطاووس يا أبوالتعالب 00 راحوا فين ؟
التعلب : راحوا فين 00 أما أهبل (يتحسس بطنه) الأرانب
الطاووس 00
الأرانب الطاووس 00 آه 00راحوا الجناين 00
راحوا الجناين !!
أرنب4 : راحوا الجناين !!
التعلب : فيه مسابقة للجمال على بعد أميال من هنا
كلهم راحوا عليها 00 دوغرى 00هاينولوا المنى
أرنب4 : كلهم ؟
التعلب : ماأنتم عارفين الطاووس 00 و أنتم سيد العارفين
00طبعه إيه 00بيحب إيه 00 عايق ورايق 00
غاوى زى حاوى 00 بتلاقيه عمال يزوم ، فجأة
ينفش ،ويدور كده 00 ويعمل حاجات ومحتاجات
بالشكل ده00 يا سلام 00 أما دنيا !!
أرنب6 : الحمامة والطاووس يا سلام 00 الدور على 00
الدور على !!
التعلب : ارتاحوا خالص 00 كلوا واشربوا00 وبقلوظوا
00 واسعدونى
أرنب2 : البركة فيك ياعمنا
التعلب : بالمناسبة 00 الأرانب الحمير
الأرانب : تقصد اللى علقت لوحة الحمير؟
التعلب : أى نعم !!
أرنب1 : هق 00 هق
التعلب : أيوه أنت ياحمار
بكرة هاتغادر عالمنا
دوغرى وتروح الغيطان
وعزانا00 وعشمنا
تخضر الأرض البوار
و الأرانب السمك 00بلطى وشبار 00رنجة ومحار
راح تسيبنا (يبكى) للبحار
أرنب6 : الله عليك يا أبو التعالب يا بطل
أنت عنوان الحضارة و المهارة
والكياسة والشطارة00 أنت الأمل
التعلب : عشت يابنى
أرنب1 : يعيش أبو التعالب
الأرانب : يعيش أبو التعالب
كورس : اقتنعتم ؟
كورس2: بعد جوعكم 00 أوام شبعتم ؟
أرنب4 : ياخسارة 00 ياميت خسارة
أرنب2 : أنت إيه 00 عايز إيه ؟ فوتنا وارحل 00 بكفيانا
اللى احنا فيه
أرنب6: أنت لا بترحم 00 ولا بتسيب الرحمة تنزل
00 فوتنا وارحل
أرنب3 : فوتنا وارحل 00 فوتنا وارحل
أرنب4 : زى بعضه 00 ما أنتوا أهلى (يضربونه
ويطردونه)
أنتوا ناسى 00 على راسى 00
بس خلوا بالكوا منه00
وحرصوا (يضربونه) حرصوا00
حرصوا منه ياأهلى
00 حرصوا منه ياناسى !!
أرنب7 : يعنى ماكفكشى لسه؟
التعلب : طب وماله 00 البحر بيحب الزيادة
والخلاف غاية السعادة
الأرانب : يللا بينا 00 السلام والتحية يابو التعالب
التعلب : السلام كلمة شقية
حروفها مشغولة بايديا
فى السلام باكل كتير
واشرب كتير
واسرق كتير
الأرانب : السلام والتحية
التعلب : وعليك ياغبية !!
بلاك


المشهد الأخير
أرنب 4 ينادى على أهله ،
وهم يعرضون عنه ،
ويحاولون إزاحته ، وهو مصر
أرنب4 : ياناس ياهوووه
أرنب1 : ياكالح00 يابارد 00 لسه قاعد
أرنب4 : لو هاموت 00 مش هاسيبكم
أرنب3 : واحنا مش طايقين وجودك
أرنب4 : زى بعضه 00 دا أنتوا أهلى
أنتوا ناسى 00 بس يعنى
فيه سؤال محبوس ف حلقى
الأرانب : تانى
أرنب6 : أنت إيه 00جبلة 00 و لا علة 00ولا عملنا
الرضى
أرنب4 : اسمعونى
أرنب6 : بص ياد ياأرانيبوا 00 شوف إخوانا الحمام
أرنب1 : بص بص 00 حاجة تفرح
أرنب6 : دورنا جى 00 والله جى 00 ياسلام
أرنب4 : سؤالى بخصوص الحمام
أرنب2 : مالك أنت والحمام ؟
أرنب4 : الأرانب الحمامة 00شفناها طايرة
فى بقها غصن الزتون00 مش كده ؟
الأرانب : أيوه شفنا !!
أرنب4 : والسمك بكرة يبلبط فى البحيرة
أرنب6 : و أنت مالك 00 أنت غيران مننا ؟
أرنب4 : بالمناسبة 00هو ليه أبو التعالب
للنهاردة00لسه قاعد00 وماطارش؟
أرنب1 : إيه ؟
أرنب4 : ليه ماطارش 00مش معلق على صدره حمامة!
أرنب2 : آه صحيح 00 ليه ماطارش ؟
أرنب1 : ليه ماطارش ؟
أرنب6 : ليه ماطارش ؟
أرنب3 : يخرب مطنك يابن عمى!!
أرنب4 : كلكم سكتوا طبعا
بكرة هاتروح الأرانب اللى شايله
ف صدرها لوحة السمك .....
و الحمير هيه راخره !!
أرنب2 : هيه 00 ما تكمل كلامك ؟
أرنب4 : و اللى هايتبقى منكم
اللى شايلين لوحة التعالب
والأسود 00 صح الكلام؟
الأرانب : أيوه صح !!
أرنب4 : فكروا فيها شوية
قبل مايفوت الأوان
كورس : ياه 00 دى وصلت
بس ياريت يفهموا
كورس2: بس ياريت يفهموا اللعبة الكبيرة
كورس : بس ياريت يفهموا قبل مايفوت الأوان
الأرانب : ياسلام !!
احنا فعلا أغبيا 00 شفنا بعض زى مااحنا
00 شفت نفسى فى مراية
00برضه خانى زى عادته 0
كورس : الذكاء نعمة م الرب العظيم
كورس1 : اوعى ترميه فى التراب
أو تدوسه بالقدم
كورس2 : شغله يديك كتير
كورس3 : النصاحة والفلاحة
كورس4 : والنجاح و الحماية
أرنب2 : م النهاردة 00ابتدى بيه الحكاية
بالذكاء والعلم تطلع لى مخالب
أرنب4 : أيوه صح
أرنب 3 : بالذكاء والعلم أطير ويا الحمام
كورس : أيوه صح
الأرانب : يللا بينا ع الجحور نبنيها تانى
أرنب4 : يللا بينا 00قبل مايهجم علينا
ونقول ياريت 00 اللى جرى
ما جرى لى 00000
(ستار)
تأليف/ ربيع عقب الباب