خبى إنكسارك
وإحتمل تعب الوقوف
وأصلب فى عودك
وإعمل كأنك
واد عفى
ولا فيكش خوف
ولو تدوق
فى الأكل سم
قول عسل..حرام تحوف
وإن قالوا
شارك فى الجنازة؟
خد معاك حبة دفوف
سنيد ..يجوز. . ماسح لجوخ
أوحتى صوف
خبى إنكسارك..
وإوعاك تشارك إضرابات
بتغنى..أووف
وإرسم على جناحك رِيَشْ
حتى ان..
شالوها إخوانا غصب
بالنتف أو حتى الحفوف
خبى إنكسارك
الطير فى سجن الإنهزام
لا منه طاير فى السما
ولا منه نام
على النوافذ؟!
فارد جناحه بالغُنَىَ
يدخل لزنزانته ينوح
م العصا.. وم اللجام
زى البهيمة ف هيئته
والإسم ..قال
ياناس حمام!
حمام ...يمام !
لو كان حيسمع الكلام
وينسى راح
من عمره كام!!
ويفوت حيائُه تحت رجله
يسقط..ويسقط
وإياه يقول...
مفيش حزام ؟!!!
إتفك غصب حزامى منى
حأربطه..وحأكون تمام
الطير
فى سجن الإنهزام
ينحت بمنقاره فى صخر
لأجل يبحث عن حبوب
تنزل فى جوفه
جوووول....تمام
والسُوس ..بِينخُرْ
وربى يـســــــتُرْ
فى عز ضوء الضُهر يسحب
لا حر شمس بلدنا هَمُه
والرَشْ لو... حترش
سِمُُهْ ..عَمَالْ.. يسرسب
فى الزوايا..كل زاوية..
تخُر ...منه
وهو ينخر..
يارب تمنحنا السلام
خبى إنكسارك
وبلاش تفكر فى الحاجات
اللى تنغص
عيشة أبوك
وأبنك وأخوك
وياالله نلعب
سند مد
قوى العضل
يمكن يكون
ماوصلش لسه للتيبس
والتصلب والهشاشة
فى العظام!
إيه؟ ده إيه؟!
ده كلام؟!!!
أنا مش عاجبنى!!!
أنا قصدى ده؟ ولا يكون
عكس الكلام؟!!!
لاء مش حأقول
خبى إنكسارك
ولو حأقول
قولى روح..ياعم نام
أو حتى روح
وأعمل دماغ
وبعد منها..تعالى قولى
يعنى إيه معنى الكلام؟!
بقى ده كلام؟
أخبى إيه؟
إيه ولا إيه؟
وأخبى ليه؟!
مش كفايه مستخبى
جوه نفسى؟!
ونََفََسِىِ جوه نَفْسِىِ نام؟!
مش كفايه
أشيل فى همى؟
وأعمل إيه لما يوم
حتدلهم عليا نفسى؟!!!
جاى تقول..
خبى إنكسارك؟!
ياعم سبنى
قبل منها..ألقى نفسى..
وأخبى نفسى
ياعم روح .. ده كلام؟
ياعم ...نااااااااااام
تعليق