من ديوان مركب تايه
وفاء عبد الرزاق
--------------
( ملحمة الأبواب )
-------------
مشيت مراية للبيبان
روحي اتدﮒ عليها
وإيدي هيـّه تشوف
نافورة الحنين ونجمي ترس العين
رذاذه بلا لبن
طشّاشته من حروف
فزّ الحلم كاروكه يهزهز ليه
بنات سْهيل خرخاشة وحرز وﮔماط
وشمسة اتدغدغ برجليه
إبن الشمس يمشيله البحر ﮔيـّاش
جاهل شوﮒ ماينجاس
صاغت جنجله ودلاّعته من جروف
تعاتبنه بزعل واتراشـﮕينه الماي
واهداب السمه خطـّت عَـَليْ صَفـّين
مدري شلون مدري منين
ومدري دخـْلـَتْ الصوبين
آنه صْدَيَري وسْع العين
وصدره ﭼبير دﮒ ميزان ربـّه
وما وزن الحروف
غـْسَلتْ وجه النهر وبساع شو عنـّد
أهو هَم بيه جاهل شوﮒ ما ينرد
وأسَكته بخضرمة وأحتـَدّ
ويـّاه بكثر مََ احتـَدّ
تـِبـِزّم كشمرة بـﭼيسه
وحلـّت كشمراته دفوف
حوريـّة عنيت اسأل:
شفتوا جوَهلي اوكيـّح
شفتوا جوَهلي؟
شمس الله تعرفه
او وﮔع زيبـﮒ بالمراية
وغرﮒ معروف
مفتاحه غرﮒ
والكوسج اتولاّه
وباب التكـّي
طلاّﮔـة حـَلـَه متلوف
أتـﭼـّيله عـَلَيَّه يلوف
وَعْد الريح يصدﮒ ما ﭼذ َب الوعود
واختضّ الترف بالعود
وﮔـَفتْ جوعة جسر
والعِــبرة ماهي احبال
أوازنها بمشيتي
وبيها أروف الحال
لا عِشّ بي جسر
واعبرله حمامة زاد
ولا راحات إديـّه
طوَيرهن معلوف
لفت ﭼتفي على ﭼتفه
وزعـّليت الغيض
هجـّجت الفرح
من ﮔتله مشنا انطوف
ياقوتة وذهب فشلان من حايط
سبع طوفات طفته مغيـّبة بلا هُوش
=------------------
يتبع