تويت
ترويض الكلب
كلاب الشارع- وإللى أنا عارفهم بالاسم- كانت النهارده زايده كلب جديد .. أنا حاولت اتعرف عليه لكنه كان شرانى جدا كأنه ما شافش بنى آدمين قبل كده .. كل ما احاول أمد إيدى ناحيته يزوم ويحاول يعضنى ...***
صحيت النهارده على أخبار فتح النار على المصلين فى المسجد الأقصى .. أنا غسلت وشى بسرعه ووقفت فى البلاكونه مستنى بتاعة الجرايد لما تعدى علشان أشترى جرنان .. كانت كل كلاب الشارع -وإللى أنا عارفهم بالاسم- قاعده تلعب مع بعض ، لكن الكلب الجديد كان واقف لوحده فى نهاية الشارع وقاعد يهوهو على كل واحد فايت وبيحاول يعضه .. الناس وإللى متعوده على كلاب الشارع – وإللى أنا عارفهم بالاسم - ده كانت مندهشه احنا ليه سيبينه مدام شرانى كده !!؟
**
بالليل وقبل ما أنام ... اطمنت من أخر نشرات الأخبار إن المساعى السلميه بتجرى علشان يعم الهدوء المنطقة من جديد بعد المذبحة ونمت وأنا بحلم بالهدوء مخيم على بيتنا ، لكن الساعة 3 بعد نص الليل أنا صحيت مفزوع .. كان الكلب الجديد واقف تحت البلاكونه بتاعتى وقاعد يهوهو .. قمت بصيت .. كل شئ طبيعى ..
"بيهوهو على إيه ابن المجنونه ده" .. حدفته بطوبه جرى واستخبى جنب البيت لكن فضل يهوهو ، دخلت وقفلت البلاكونه وحاولت أنام لكن صوت نباحه كان واصل لودانى وقلقنى....
فين ع الصبح ساب بلاكونتى وراح يهوهو فى حته تانية .. ماكنش ممكن أنام لأن معاد الشغل جه لكن أنا قررت بعد إللى حصل طول الليل إنى أروض الكلب ده علشان على الأقل يبقى ذى أى كلب من كلاب الشارع –وإللى انا عارفهم بالاسم - ..
**
الجزار إللى فاتح فى شارعنا وإللى طول عمر علاقتى بيه محصوره فى " صباح الخير " .... "صباح النور " .. بس .. استعجب جدا لما لقانى داخل عليه الدكان وبصبح وحلف طلاق ثلاثة لازم أشرب حاجه ، لكن لما سمع طلبى لفه من غير كلام وسابنى مشيت ..
بالليل أنا ربطت العظمة بحبل ونزلتها م البلاكونه .. شافها جرى عليها .. رفعتها قدامه لكن ماكنش ممكن يطولها .. قعد يشب وينط بيحاول يمسكها وفى كل مره يفشل يزيد سعاره وجنانه فيشب أكثر وينط أكثر ... لما اطمنت للموقف دخلت وقفلت البلاكونه ونمت ..
الصبح أول ما صحيت م النوم .. كانت نشرة الأخبار بتأكد إن الوضع مشتعل فى القدس وقطاع غزه والضفة الغربية .. فتحت البلاكونه .. كان نايم بيبص للعظمة .. سحبت الحبل ودخلت غسلت وشّى ورحت الشغل
**
واحد صاحبى قاللى .." إن حكاية العظم دى ما تنفعش وإن انت كل ما هتديله عظمه أو تحسسه إنه ممكن ياخدها هيطمع فى غيرها وإن ماقدرش فى الأخر ياخد منك عظم هياكلك أنت .. فكر كويس الحل إنك تعمل على إنك تمشيه م الشارع ... أو ... تقتله ..... "
وأنا راجع م الشغل كان قاعد ما بيهوهوش لكن بص لى وسابنى عديت
بالليل أنا نزلت العظمة زى إمبارح بالظبط وسبته ودخلت نمت ...
**
الصبح رفعت العظمة ... كان واقف جنب الحيط وباصص لى .. غسلت وشّى ورحت الشغل ... صاحبى قاللى .." إللى بتعمله ده خطر جدا ... أكيد الكلب ده فى الأخر هياكلك ..لازم تبعده عن شارعكم والا ...."
وأنا راجع م الشغل مشى ورايا .. مديت ..وهو الآخر .. جريت .. جرى ... كان على وشك أنه يحصلنى لما وصلت لباب الشقة .. دخلت وقفلت ورايا .. فضل واقف ع الباب .. قلت شويه ويزهق فيمشى وبدأت امارس روتين حياتى العادى ..
كلت وشربت وسمعت نشرة الأخبار إللى أكدت إن الجيش الإسرائيلى فرض طوق أمنى حول مناطق الحكم الذاتى .. أنا بصيت ع الكلب ، كان لسه قاعد على باب الشقة .. " يا ترى بيفكر فى إيه ؟"...جبت العظمة م البلاكونه ورمتها قدامه فى الشارع .. جرى جاب العظمة وقعد بيها على باب الشقة ...
بالليل وقبل ما انام ... قفلت الباب بالترباس وسمعت الراديو .. كان الحصار لسه مفروض .. طفيت النور ونمت ...بالليل والأوضة بتشغى ضلمه .. أنا حسيت بحركة فى باب الشقة .. قمت بالراحه أبص .. كان فاتح باب الشقة وجى على أوضة النوم ... " أعمل إيه ..؟" ... جريت دخلت البلاكونه وقفلت علىّ .. دخل الأوضه ... بيشمشم .. بيزق دلفة الشيش ... أنا مالقتش قدامى الا الحبل إللى كنت رابط فيه العظمة ... أنا لفيت الحبل حوالين وسطى ونطيت م البلاكونه .. متعلق أنا فى النص بالضبط ....
" الحـ قـ و نــ ى..............."
تعليق