مهروسة مفروسة مطحونة مفعوصة
مِنْداسة مِحْتاسة مجْسومة بالفاسة


شجْيانة× تعبانة تِلْجَاهَا رَضْيانَة
مِ المُرّ عَمْ تِشرب ما بتخلص الكاسا


مِ الفجر تِعْجِنْها دِنْيـِتـْها بالجَسْوَة
من نيلها تتحَمَّا تِلْمَعْ بِنُورْ مَاسَا


ونهارْها بتدوَّر فى كْفوفْ رحاياها
واللِّيل دِى بتروجْ لُه وتـْلالى ونَّاسا


حبُّوبة لهلوبة مطلوبة مرغوبة
ومكانها فى الجَلْب عل العين وع الرَّاسا


لو تنجِرِحْ* تصبر بالدمع تِكَّحَّلْ
والجلب مِ الطيِّب ما بيخلص إحساسا


لو يـِنْحِكِى عنها تِتـْلمّ خَلايـِجْنا
وان كتبوا عن حالها ما بتكفى كرَّاسا


لو كِلْمِتِ الحَجّ بتجُولْها ولا هَمَّها
ان شا الله مِ العَسْكر والعُمْدة والسَّاسا


وحبيبتى كِيف نيلها، كِيف طَمْيُه، كِيف أرضه
من جام نهب خيرْها ما بيزوى خناسا


لويـِنْحِرِجْ جلبها وتِنْكِوِى عِينْها
بِتـْبَخَّرِْ الجَاعَة وتْجُولْ دا وِسْوَاسَا !!

　
أميمة
××××××××××××

ملحوظة: * تعنى أن الجيم أصلية فتُعطَّش كما فى "تنجرح" ، و× تعنى أن الجيم ليست أصلية لأن أصلها فى الفصحى قاف وفى العامية تنطق همزة كما فى كلمة "قلب" باختصار النص باللهجة الصعيدى والمستخدمة فى جنوب مصر.