الله يعطيكي العافية خيت

يسلموا دياتك عالأمتال اللي بترجعنا بجي عشرطعش مية سنة لورا

("طبعاً " بالحنين للأصل اللي كان فيه الزوء والفهم والذكى )

أهل أول ما خلوا شي ألا و جابوله متل


لهيك بدي ألئش معك بالنحوي وأئلك :

تحيتي

أختي الكريمة أمينة المحترمة
الله يمسيك بأنوار النبي (تذكرت هذه العبارات المحببة على قلبي ) وبعد :
لا تؤاخذيني في تأخير الرد على كلماتك المشحونة بذلك الود الحلبي الأصيل لأن الصفاء والنقاء الذي نهلناه من صغرنا ،لازال محفورا في أفئدتنا ولا يمكن أن يتلاشى مهما نأت المسافات ومهما طال الزمن ،إنه قدرنا الذي أعتز به ، وقد كان لي صديق اسمه كامل خشفة عله من أقاربك .
لك كل الود والاحترام .

وتسلم يا خيو مصطفى عل اللئش الحلبي القح اللي أخدني لباب المقام وبانقوسا حتى وصلت لجب الأحمدي وتذكرت نانتي الله يرحمها في قبرها وقت كانت بتقول : اللي ما عندهو كبير يشتري كبير ...
والله صدقتِ رحمة ربي تنزل عليك يا نانتي ....

ياه يا أخي الكريم غسان وأنت تعيدني إلى الوراء لأسمع أمي رحمها الله حينما كانت تزور الجيران تقول لهم : الله يصبحكم بالخير وبأنوار النبي يا جيران ....
ستبقى والله هذه الكلمات محفورة في قلوبنا لا يمكن لنا أن ننساها لأنها تبقى جزءا لا يتجزأ من عاداتنا وتقاليدنا التي نفخر ونعتز بها ....
وأنت هنا ياأخي غسان قد وصلت أيضا إلى شرش العائلة ... نعم كامل خشفة هو من العائلة وأولاد العمومية لوالدي - حفظهما الله - .....

العزيزة ( بنت الشهباء )
بنت البلد الأصيلة

خيتووووو

هلق انا لازم ارجع لورا واقرا كل الصفحات بلكي بيطلع معي شي متل حلبي ع التقيل وماقلتيه ...

يالله ... خاطرك خيتووووو
لا تواخذينا على هالجية الخطف ...

ديري بالك ع حالك يوووم
كملي كملي ...


رعد يكن

اسمعي يا كنّة لتفهمي يا جارة
اشبك واقف مثل عمود الصَّرْمَدا
اشبكْ : ماذا بك ؟ . الصرمدا : قرية بسورية
اشترى بدرهم بلح صار لو ف الحي نخل
اشتغلْ بفلس وحاسب البطال
اشتغل حتى تكل ولا تقعد بالذل
اشتغل لتموت ولا تحتاج لعكروت
العكروت : المخنث
اشتغل ولا تكلّ ولا تقف وتذل
اشهد لي بكعكة أشهد لك برغيف
اصبر ع الحصرم بتاكلو عنب
اصبر ع جارك العكروت ، يا بيطق ، يا بيرحل ، يابيموت
اصرف ما ف الجيب يأتيك ما ف الغيب
اضرب ولدي بالسكين وأكره اللي بيقول : آمين
اضربو ع راس يهودي بيأسلم
بيأسلم : يصبح مسلماً
اطلب العلم ولو بالصين
اطلعوا بشوري وانزلوا بتوري
شوري : مشورتي . توري : أمري
اعرف صاحبك واتركو
اعمل خير وارميه بالبحر
اعمل متلو وبيع بسعرو
اعمل مليح وارميه بالبحر
افتح بابك واشهرو ، أو سكرو واسترو
سكرو : أغلقه
افرح للي ببكيك وما تفرح للي بضحكك
افرك عينيك وطلِّع إيش في حواليك
اقتل الغريب واحرق تيابو لو كان فيه خير كان نفع بلادو
اقطع راس القط من ليلة العرس
كناية عن غلبة الزوجة من أول ليلة
اقعد أعوج واحكي ساوي
اقفل دارك وأمِّنْ جارك
اقلب الجرة ع تمهّا بتطلع البنت لأمها
تمها : فمها
اكمش ملح ولا تكمش نشح
نشح : وسخ

بالله عليكي ....
منين عم تجيبي هالأمتال

نانتك عايشة ( الله يطول عمرا ) شكلك ملازمتيها

تحية

رعد يكن

وميت السلامة يا خيو رعد
ولو جيتك خطف بس بنت الشهباء خيتك مبسوطة كتير بتمسايتك الحلوة
بوعدك رح ما أوقف وأجيب الأمتال كلها من طقطق للسلام عليكم

نانتي فطوم الله يرحمها يا خيو رعد تعيش أنت ويطول في عمرك
ولو قلبت للصفحة التانية شفت مصدرالأمتال منين جبتها ..
الله يخليه ويحفظه اللي جمعها

كني العاده ماعبتعرفي تلئشي حلبي عالطئيل ؟؟

عزااااا ...!!!

يابووو بس لو كان جنبي جمجاي هاللَّئ ,

ماراي تعرفي أش بدي أساوي فيا هااااااا

بوجَّ مين ما بع وين راي تجي ؟ (كني بدا تخبط بوجَّي .. بس ربك حميد مو شوبك )

من شان خاطر نانتك فطوم ( الله يرحما) ماراي أحكي معك طاول

اللئش الحلبي بدو حناك متعودة ع تكسير الجوز واللوز مو حناك متعودة عطئ العلكة

لك خيت تعيلك شي نهار عئاضي عسكر لعن نسواننا بتتسليلك أتره وبتاخديلك تم حوسة وبتشطفي باب صئائ (خدعتك بمحمد تجي ) وتتتفرجي شلون بلئشو ... هيك ببجو الكلمة بج .. مو متلك بتاخدي الكلمة أول شي عحمام السوء بتعمليلا " دوس ودوس وجيه " وبتهندزيا وبترستئيا وبعدا بتئوليلا دي أنئلعي ( أنجئ أذا غضرتي تئولي هالكلمة )

لا تئضيا بالعزيزية والسريان ... خيتووووووووووو

بي هدوك المطارح ما بياكلو حرائ أصبعته و مخلوطة... يووووووووووم

ما بياكلو ألا من عند وانيس وأنجئ يطأئو بعضون بالنحيات ...عجب دنائين خيــــــــــت ؟؟ أنا أ ش عبئول لحالي ؟ إي إن طئيت عينون مابئى يتدولئو عدس بحامض و أشة وسندوانات


صدقاً أضحك و أنا أكتبها تعجبني جداً أحبذ ثقلها المعبر الذي ينهي مهمة اليدين( للإشارة والتعبير لكن للأسف الرأس لا يكف عن الحركة )

شكراً من القلب أختنا (بنت الشهباء )

أبدعتي بنقلك هذه التحف التراثية

وأدعوا الجميع لأن يتعرفوا على اللهجة الحلبية التي هي لسان الأقتصاد في سوريا بل هي الجسر الأمتن في مشوار طريق الحرير (سابقا وحاليا )

هنا لي تعقيب على الأمثال : المثل الصحيح يقول : الكلام للجارة لتسمع الكنة
وأيضاً :(صرمدا ) تكتب ( سرمدا ) وهي بإعتقادي قرية أو بلدة من ضواحي إدلب بها عامودٌ أثري لا يزال شامخاً وضرب به المثل ( واقف متل عامود سرمدا )

تحيتي

[align=justify](الدنّاءة) ــ بتشديد النون ــ كلمة ما سمعتها منذ ربع قرن وأزيد! كنا نقول: فلان دنّاء أي نفسه دنيئة، وفلانة دنّاءة الخ. ومع ذلك فإني أتذكر أن أصلها بالهمز وليس بالقاف.

وشكرا لك يا بنت الشهباء على هذه الدرر البلدية التي تمتعنا نحن الغربتلية أكثر من غيرنا.

وهلا وغلا.[/align]

بتصدق بالله خيو مصطفى صلي زمان مادست حارة قاضي عسكر ولا باب الحديد وقارلق والمشاطية ، وما سمعت لئش الحريم ولا الزلم ، بقى قلي شلون الئش حلبي !!؟؟..
أئلك مرة اش قالتلي نانتي ولسه ما فقست أنا عنل البيضة وكانت العالم صايمة بآب اللهاب وقبل ما يضرب الطوب : وقفي عند باب السقاق وشلحي قندرتك من اجرك لأنهو هلق حاست الحوش مرة عمك وما بتريد حدا يدوس بقندرته ويجقجقلها وفوتي عل الئوضة وائعدي عل الارض مو عل الكراوتية مشان ما ينخرب الدامسقو ، وما تقربي من تجليلة الفرش المزوزقة ، واستني شوية صغيرة يبجي جدك وبجيب معهو الأمردين منعصره ومنساويه شراب ومنفت فيو خبز ميكن ببرد علينا الشوب الحريق لأنهو ميتين مل العطش وما خرج ناكل زفر بهل الشوب مع أنهو طيبخين حراق بأصبعته وبرغل ويخني ...
بعدين ما ترتعبي وقت بأدن المغرب لأنهو جيرانا اللي بلزق بيتنا عندن ولد سعدان بشتري من عندل سمان فتاش وبجيب معهو كبريته بياخدها من جنب البابور بغياب أمهو وبشعلوا بزيق الحارة....
ما أحلى أيام زمان وهوالواحد بتذكر أهل أول وشلون كانوا ما بيعرفوا الكدب لأنهو كان قلبن طيب طيب طيب ......

ياه يا أستاذنا الفاضل
الدكتور عبد الرحمن السليمان
عدت بي إلى ما كانت أمي – رحمها الله – وهي توصيني وأنا لم أبلغ بعد الخامسة من عمري يا بنتي يا أمينة خلي عينك شبعانة واش ما شفت خلي نفسك عزيزة وكريمة حتى ولو كان الدهب كله أمامك بعدين بقولوا عنك الناس دناءة وعينك جوعانة .....
والحق يقال أنها أجمل وأعظم وصية لأمي علمتني العفّة والعزّة والكرامة.
وحتى أنني أذكر حينما يأتينا أي ضيف ومهما كانت منزلته عند العائلة كان يجب علينا نحن الأولاد الصغار أن لا نأكل من الفواكه أو الحلويات التي تقدّم للضيف ، ونجلس أمامه لفترة وجيزة بأدب واحترام دون أن نعمل أي ضجة أثناء الجلسة ومن ثم ننصرف إلى غرفة ثانية ....
وبصراحة الآن قد تغيّرت المفاهيم وأصول التربية ولم تعد كما كانت من قبل في زمن التربية الحديثة !!!!؟؟؟؟؟؟؟؟؟؟؟؟؟..............

.
أما عن كلمة " دنّاءة " فكما تفضلت هي بالهمز وليست بالقاف
وتعني بالحلبي هو من كانت نفسه دنيئة وعينه جوعانة ما بتشبع أبدا ..
وأنا أعلم بأن هذه الدرر الحلبية قد لا يهتم بها إلا من هم أهلها وأصحابها ، ومن عاش فترة بين أهل حلب وخاصة في الأحياء القديمة التي ما زالت تتكلم اللهجة الحلبية ...