الحزب الوطنى الديمقراطى

بيقول العيب فى الناس

بقت فاقدة الاحساس

مش قادرة تحس بالانجازات

اللى اشبة بالمعجزات

وعلى راى بعض القيادات

بيقولوا ان احنا مقصرين

فى التسويق والكلام عن التطورات والقفزات

انا من هنا بقترح عليهم

يعملوا فى كل محافظة من المحافظات

عدد من الاسواق يعنى بالظبط زى سوق التلات

ويسموه سوق الحزب الوطنى الديمقراطى للانجازات

علشان الناس تحس اننا بقينا دولة وعندنا امكانيات

وبالنسبة للشعب التعبان الصدمان العدمان الغلبان


اللى مش دارى بالحكومة وبالحزب اللى بيسابق علشانه الزمان

اللى بيوصل الليل بالنهار علشان يعدى بالبلد لبر الامان

انا بقترح كمان نعملوا ادوية على كل الاشكال والالوان

يعنى حقن فى العضل وفى الوريد تخلى الشعب دايما فرحان وسعيد وباصص لقدام

ويبقى فية كمان دوا شرب لكل افراد الشعب الشقيان

تخلية ينسى التعب يصرخ بأعلى صوت ويقول كلة تمام

وربنا يخلى الريس وجمال

ونقط للانف وللعين وللودان علشان تعرفوا وتسمعوا وتشوفوا

نص الكباية المليان

و بالمرةكمان لازم يتعمل منه تطعيم للعيال

وانشالله حتى لحد ما يمسك الريس جمال

وسعتها بس الناس هتبوس ايديها وش وضهر وتشقلط من الفرحة كمان

ومش هيبقى فية كلام فاضى ولا معارضة ولا كتابة على الحيطان

واللى بيقولوا لا للتوريث ومصر مش عزبة مصر مش الجابون

وطبعا دة كله لعب عيال

المعارضة الحقيقية تبقى بتسبح بحمد النظام


ياسلام هية الناس هتلاقى زى الحزب الوطنى فين ولا فية فى الدنيا زى جمال

دا عمل ثورة و طفرة فى البلد ولا ست لاف حصان

كله بالورقة والقلم ,و الا حصاءات

يعنى الراجل شغال انا الصراحة مش عارف هو شغال اية بس شغال

وسعتها الحزب مش هيبقى فى حاجة ابدا للمؤتمرات وتعيش الانجازات

وهيبقى الشعار الرسمى الدائم للحزب الوطنى الديمقراطى

هو من اجل حياتك وحياتى من يوم مولدى ليوم وفاتى

مع خالص تمنياتى وتحياتى