تويت
قالولي شايفة مصر( معارضة شعرية مع قصيدة تميم البرغوتي : سألوني بتحب مصر؟ )
قالولِي : شايفه مصر ؟!
أنا قلت : آه شايفه
ضاع التاريخ والنصر ؟!
أنا قلت لا ... آسفة
قالولي : بالعقل نحكي
قلت بحيَاد وبأدب
ما للبجاحة سبب
فن القوالة ، أدب
بالحب يحلىَّ العتب
الكره مش مِننا
والتلج لو شَدِنا ،
نِجفىَّ وما نِدفىَّ !
حرف التلِيج لو جِمِد
يجرَح وما نشفىَّ !
دي مصر نسل الوفا
حاشا الوفا يغفىَّ
ومهما جاروا عليها
تاريخها يشفع لها
دي بطولة ما تخفىَّ
في عمِيق بحارها لآليء
في بطون جبالها جواهر
بجوار حيطانها الأمان
وف كل وقت وأوان ،
الحق صوتها وجائر !
أكتوبر أكبر مَثل
وعَندَك ماتش الجزائر !
بالحب جبنا انتصارنا
والأخوة شايف يا (يوسف)
جانا قساهم قهرنا
في الجِدْ جَدْ وتَجِدها
لُحْمَة غرام عِشق واضح
أوعاك تصدق ما قالوا ،
من سِمْ كره اللي طامح
لو تضمن خواتها في أيدها
الأقصى كان لينا صابِح
أصبح لمعنى الإخوة ،
عداوة كالنصل ، دابِح
قالوا : بتجرح ولادها !
قلت وأحن أنتوا منها ؟!
حُضن الوفا حضنها ،
وهى طِيب الملامح
ريحة خبيزها تعشش
عاشقة والشوق فيها ، جامح
مين في الطيابه زيها
تشعر بها
تلقاها فيض
عليك تفيض من غمرها ،
نحس بيها ف لِغتراب
نرجع ونسجد ع التراب
ساعتها نشعر إننا ،
نار الغضب
اللي شطب
فينا إنتما
ماكانش ليها إنما ،
للي احتمي
بكِيت وكِيت
يرحمنا منُهُم ربنا
بس هي
تبقى هي
ولادها عينها وقلبها
لو ريح تطاول شعرة منهُم
تعتل روحها ، لجلها
ولدها يخرُج ويسعى
في الكون وأرضُه اللي واسعة
سَعي المجاهِد لرزقُه
وف أي أزمة ، بتنده
يقول حبيبتي عازتني !
لابُد أفوت كله وأرجع
ما أنساها حتى إن نسيتني
الكل يدي انتباه
والكل يستنفر
واللي يشِذ ف ولادها
قبل أما تدعي عليه
في اللحظة تستغفر
قالولي شايفة مصر
أنا قلت
آه
شايفة .
تعليق