تويت
هقولهالك كده بالبلدي
يا غالي ،ومن غير حداقة
صحيح الفرقة .. حراقة
بس أكيد.. هنتلاقى
ايوة بحبك.. وراس جدي
هتوحشني أوى يا والدي
هتوحشني لحد.. بعيـــــــــد
لحد السد والترعة،وريحة عيدان القش
ونار الفرن على"الخبيز" والعة
هتوحشني لحد .. هناك
لحد ريحة هوا" شربين" ، لما يطل من الشباك
يقول للشمس يلا أصحى، بقينا نهار
على إيه، بتبكي وتنوحي
وحس أبويا، مالي الدار
ورنة ضحكته الصافية
أغنية حلوة بتوب ..موال
يقولوا ..ده مات... واقول لأ، ده مسافر
يقولوا أخرس، يا مجنون ، متبقاش .. كافر
أقول ايه لعقولهم،جاوبني يا غالي
لولا غلاوتك عندي، ومقامك العالي
لكنت خلعت لهم " المداس"
وخليت رجليهم مكان" الراس"
إسألهم إنت يا أبويا، يا أبو الإحساس
هوة اللى كلمته حية .. من إمتى كان بيموت ناس!؟
تعليق