قالوا عانس قلت يا خوانَّا مش ذنبها
ذنب اللي خِلي بيها وخيِّب وعدها
ذنب ناس كتيرة
صغيَّرة وكبيرة
وإعلانات ومسلسلات لعبت بعقلها.

قالوا لها يلزمك شاب من عيلة
فلوسه بالكوم، وتتوزن بالكيلة
ويكون وسيم
وبتاع ريجيم
وكل ما حلّ له هيصة وهُلليلة.

وسيبك من بتاع الدين أبو لحية
هيحبس حريتك وهتبقى داهية
وشه مكشر
وتوبُه مأزعر
وهيقول اتحجبي، وبلاش حجج واهية.

اللي يهنِّي أيامك واد أليط ومدردح
يجيب القرش م الهوا، وفي الهوى يتمرجح
وبتاع دلع وصاجات
وبهرجة وحفلات
تلاقي نفسك معاه برنسيسة ولا أملح.

ولازم شقة وجهـاز من بلاد بـره
وعربيـة آخر موديل، شياكة بالمرة
واللي ما عندوش
ما يلزمْهُـوش
وتكسري وراه –البعيد- ميت جرة.

والخطوبة في فندق نجومه من غير عدد
وان فلِّس المحروس سيبيه يجيب المدد
دا انتي قمر
فُلَّة وقـدر
واللي يطول ضفرك مُسعد أكيد للأبد.

والشبكة حتماً تكون دهب معاه سوليتير
هو انت يعني شوية؟ دا انت وش الخير
حلاوة وقيمة
ونجمة سيما
دا العرسان على بابكو واقفة بالطوابير.

ويوم دخلتك يلزمك فرقة آخر موديل
وزفة وزمبليطة وطرحة طولها قال بالميل
ورقص شرقي
ودرويش بيرقي
وسعد الصغير وشعبولا وفرقة المساطيل.

وتعوِّدي المحروس: الكلمة أيــه؟؟ ... كلمتك
لا فيه لا "لأ" ولا "يعني"، وترويضه يكون شغلتك
أصل الرجال تعابين
وبعيـون فارغين
خديه يا حلوة بالصوت، واعمليه كمان لعبتك.

والخِميه بالعيـال، والشكوى كتير م المال
يبقى حلقة صباع، وينعدل معاكي الحال
وما تنسي تعارضيه
وف كل شيء خالفيه
إن قال مـرة يمين، تقولي ألف شمـال.

وغير كل ده حكايات بالميّـة بالألافـات
وتعيش في وهم البنت، وما تخلص الطلبات
وياما سمعنا مواجع
ولسه يا ما فجايع
ويضيع الولد والبنت، وتكتـر الأزمـات.

كتبت ووصفت وأحسنت كاتبنا الكبير وشاعرنا الموقر