يا مصر فاكرك في كل خطفة نور
فاكر سواقي البلد
وغنوة الطنبور
فاكر بنات بيلموا قطنك
في شمس دافية وناعمة
أحلى بنات الحور
كلمة صباح الخير فيكي ألف صباح
إللي صباحك عنب
واللي صباحك خير
واللي صباحك طرب
واللي زغردة عصافير
ألفين صباح وصباح
من كل متعلم في أرضها وفلاح
وكل تَعبان فقير غلبان
وكل سيد نغنغة ومِرتاح
كله صباح أو مِسا
في ضحكته المفتاح
لقلب كل غريب
يصبح لبلدي حبيب
يبعد ويرجع تاني
أنا بلدي أرض براح
فاكر كلام خلاني
مِنُّه اللي لسة نقوله
ومنه اللي عدى وراح
فلاح بمقطف أو غلأ
فلاحة بالمطراح
وكنون وفرن ومنأدة
في البرد والأفراح
مصرف و هِري ومصطبة
وزريبة ويَّا مراح
والست لما تغني
والزلعة ع الرَّيَّاح
أحلى سلام يا بلادي
في كل كَفر وْ وَادي
لو قالوا مَصر ما فيها
غير شعبها يكَّفِّيها
أحلى قلوب وعقول
والدنيا تشهد ليها
والحُب نيلها وأرضها
عِرض العرب من عِرضها
ما يوم تفرَّط فيه
والعربي ده وِلدها
ما للغريب ترميه
رجعت بلادنا لمجدها
خيرها يزيد عن حدها
واللي يريد نِدِّيه

مصر اللي فوق الفوق
عايزة العيال سالمة
لو كان جمع البشر
عد النجوم والشجر
فوق السحاب قايمة
أنتو يا مصريين
يا ولاد يا منتصرين
فوق النجوم نجمة

استاذي القدير و الشاعر الكبير / محمود النجار
احترت كثيرا في اختيا الأبيات
فكلها غاية في الروعة
قصيدتك سيمفونية عذبة الألحان تتغني في حب الوطن
بأرق الكلمات و ابدعها
دمت لنا شاعرًا مبدعًا
تقبل مروري و خالص تحياتي