تويت
بسم الله الرحمن الرحيم
المسلسل الإذاعي الإجتماعي "وسقطت من بين أصابعه"
عن قصة / ماجي نور الدين
الإعداد الإذاعي / المخرج الكبير أحمد علام
الحلقة الاولى ..:
[ باب حجرة يفتح ]
الأم : بسم الله الرحمن الرحيم ..ايه يابنتي .. مالك مهمومة
كدة ليه..؟!
هدى : [17 سنة ] عايزة حاجة ياامى ؟
الأم : مالك يابنتي ؟ انتي بقالك كام يوم كدة
لا بتاكلي ولا بتشربي ..
زي عوايدك ، وبقى حالك حال ..فيه ايه ياهدى؟
هدى: النتيجة يا أمى
الأم : نتيجة ؟!
هدى : الثانوية العامة
الام : مالها ياحبيبتي ؟
هدى : قربت تظهر ..أنا خايفة قوي ياأمى
يارب ..يارب .. نولني اللى في بالي
الأم : [ تحاول إدخال المرح على حديثها ]وانتي ايه اللى
في بالك بقى ياست هدى ان شاء الله ؟
هدى : اسكتي ياامى .. اسكتي الله لايسيئك أحسن أن جسمي
مفكك وقلبي بيدق زي الطبل الحزين
[ من الخارج كلاكس سيارة ]
الأم : دي عربية ع الباب ...ياترى فيه ايه ؟؟
المندوب : [ بصوت مرتفع من الخارج ] هدى عبد المنعم رسلان
هدى : [ صارخة في ترقب ] أمى
الأم : [وهي تبتعد ] ايه ياهدى مالك ..ايوة يالى بتنادي
أنا جاية اهه [ خطوات ويفتح الباب ]
المندوب : مش ده بيت هدى عبد المنعم رسلان ؟
الأم : ايوة يابيه .. هو فيه ايه ؟
المندوب : [ بصوت هادىء ] متخافيش ياستي كدة ..
دا انتي حقك تزغرطي ..
الأم : [ زغرودة ] كدة يابيه ؟؟
المندوب : تمام كده ..انتي والدتها ؟؟
الام : ايوة يابيه ..طمني الله يطمن قلبك هو فيه ايه ؟؟
المندوب : مبروك ياست أم هدى بنتك نجحت فى الثانوية
العامة .
هدى : [ قادمة تلهث ] أنا هدى ياأستاذ
الام : [ زغرودة ]
هدى : هو حضرتك مين ؟
المندوب : أنا مندوب العلاقات العامة بالمحافظة وجاي في
مهمة رسمية ، بتكليف من سيادة المحافظ
هدى : مهمة ... مهمة ايه ؟؟
المندوب : ابشرك بالنجاح
هدى : ايوة يااستاذ ... بس ... بس النتيجة لسة ماطلعتش
المندوب : الأوائل بتتعرف نتيجتهم وتعلن قبل اعلان النتيجة
الرسمية ياهدى .
هدى : [ بذهول ] وانا ..؟ طلعت من الاوائل ؟؟
المندوب : الأولى على الثانوية العامة على مستوى المحافظة
هدى : أنا ..؟
المندوب : وسيادة المحافظ مستني اوائل المحافظة كلهم دلوقت
في مكتبه علشان يهنيكم بنفسه ويديكم جوايزكم
هدى : أنا ياأستاذ ؟؟
المندوب : ومعالي وزير التربية والتعليم هايقابل الأوائل
على مستوى الجمهورية بكرة الصبح في مكتبه ، والتليفزيون
هايصوركم والصحافة والإذاعة هاتعمل معاكم أحاديث
هدى : بجد ..؟
المندوب : طبعا ... وفيه مفاجأة تانية ليكي
هدى: مفاجأة .. مفاجأة ايه ..؟؟
المندوب : انتي طلعتي التانية على مستوى الجمهورية
القسم العلمي ..
هدى : انا يااستاذ ...؟؟
المندوب : من فضلك ... جهزى نفسك بسرعة علشان
هاتسافري معانا انتي والمرافق اللى هاتختاريه .
هدى : [ صارخة في ذهول ] أبويا ...فين أبويا ياامى ؟
يتبع
تعليق