(1)
درويش أنا
وبقالى كام مليون سنة بسعى
بلضم ضفاير حلمى فى الحواديت
وبشيل وأحط فى أرضك الواسعة
وببوس عيونك ويا كل نهار
وبحن لك وأنا شايل القصعة


(2)
قلبك بيشبهنى
نبضك بيشبهنى
روحك شبه روحى فى شيل الهم
أنا وأنتى حبة دم فى زكيبة
يا معلمانى ازاى أحب النور
ومحسسانى تمللى بالخيبة

(3)
زيك
مانيش لاقى ف أراضى الله عيون سودا
مولد يا ست الكل وبعودة
مولد وعقبال ميت سنة قدام
وتمام تماااااام
كل اللى فيكى صبح تمام
واحنا اللى ردينا لوره
مستنظرانى ازاى
وليه مستنظرة ؟
ما خلاص ما عدتش بحلمك خالص
ولا عاد فى نفسى يا غالية
غير حتة لمونة معصفرة

(4)
طراطير ونبوت الغفير
والناس كتير جوا الميدان
فى السيرك فوق السلك ماشى البهلوان
خمسين حصان بيعفروا فى آخر المدى
وبنات بيستنوا النهار
وبنات بتهوى البغددة
وفرح ونور ومعددة وضحكة جبان
ع السلك ماشى البهلوان والناس كتير
وقف الطريق المفتخر
عدى الأمير
واحنا اللى واقفين ع السكك
نستنى سواق الحمير

(5)
باعت جواب بالأمس فى البوسطة
وحياة أبوك
كرباج ورا يا أسطى
كرباج ورا وشد اللجام ع النار
لحسن تكون الجنة بالواسطة

(6)
يا ساكن القصر الكبير
كيفك
ملينا من كدبك وتحريفك
الدنيا حر وجسمنا مكتوم
وأنا هرضى عنك لو تقوم م النوم
تصفح لنا وتدينا تكييفك

(7)
ضحكت آلاء بنتى
وضحكت أنا وأنتى فى نص الليل
ضحكة آلاء تشبه لميت قنديل

(8)
(( هنا القاهرة )) (( هنا القاهرة ))
فى نفسى انى أجيلك وخايف قوى
لأقابل فى حضنك ولاد المرة