تويت
يَمَّا ..
الوَجَعْ وَاقِفْ بْ دَرْبِي ..
شَاهِرْ بْوِجْهِي سْيُوفُهْ ..
والشَّرَرْ بِقْدَحْ فِ عْيُونُه ..
يِهْجِمْ عَليّ ، وْ يِغْرِسْ بْ قَلْبِي كْفُوفُهْ
جَنَّ الحِزِنْ يَمَّا .. كِيفْ أمنَعْ جْنُونُهْ ؟
يَمَّا ..
هَايِم لِيلِ نْهَارَ أَدَوِّرْ
عَ رْغِيفِ الخُبِزْ .. وْشَرْبِةِ المَيّْ
لَفّيتِ حتّى تَورَّمُوا رِجْلَيّْ ..
كلِّ الدّْرُوبْ بِوِجْهِي مَقَفّلِة ..
كَإنُّو الدِّنيَا عَمْ تِتْآمَرْ عَليّْ ..
يَمَّا ..
غَمُّوا عِينَيِّ ..
وْ عَيَّشُونِي بْرَحْمِ العَتْمِة
غَرَّقُونِي بِبْحُورْ هْمُومْ ،
وسَرَقُوا مِن عَ شْفَافِي البَسْمِةْ ..
وإِنْ سَألُونِي -والمُسَدَّسْ عَ رَاسِي - ،
أقُولْ .. رَبّْنَا يْدِيمْهَا نِعْمِة !
يَمَّا ..
عَايِشْ حَيَاتِي ..
مَاشِي جَنْبِ الحِيطْ
وَ أَقُولْ .. رَبِّي السِّتِرْ ..
مْوَطِّي رَاسِي ،
وَ أَعمَلْ حَالِي نَاسِي
وَأكَادَ أَمُوتِ مْنِ القَهِرْ ..
كِثْرَتْ يَمَّا المَآسِي ،
وْذِبْلَتْ أِوْرَاقْ الزَّهِرْ ..
يَمَّا ..
الفَقِرْ عَمْ يِنخَرْ عْظَامِي
واللّيلْ بِ لَوِّنْ أيَّامِي
طْفِرِتْ يَمَّا هَالعِيشِةْ
ورَحْ أدفِنْ بِالتّْرَابْ أحْلامِي ..
بِ رِضَايْ يَمَّا عَلِيكْ
خَلّي بِقَلبَكْ شْوَيِّة صَبِرْ ..
مَا تِعمَلْ بِحالكْ هِيكْ
بُكرَة تُفرَجْ
احْتِسِبْ يَمَّا .. واصْطِبِرْ ..
يَمَّا ..
بَعِرفْ مِشْ دَايْمِة هَالحَالْ
وْ لَوْ مَهْمَا صَارْ
أكِيدْ ..
مِنْ بَعدِ اللّيلْ
رَحْ يِطلَعْ فَجْرِ نْهَارْ .!
تعليق