سألوني عليك وجاوبتهم بيك
ما يحتاج اجاوب وانته كدامي

وصار الگلب ورقة والنبض اقلام
وقعت بضميري ونشفت اقلامي

واذا گصوا ابهامي الجنت ابصم بيه
حباً بالعراق ايخضر ابهامي

واذا حبك اعدامي آنه احبك موت
والله انولد في لحظة اعدامي!

ما ميت كبل لتعد وراي ايام
بس ماتت حرب وامجلبة بايامي!!

كحلت الشمس من دم ضحايا الفاو
ونهر جاسم غرك بس شالته ابلامي

شهر رمضان اجه وطب وطلع ونعاد
وانا اتسحر بصومي وافطر اصيامي!

ما شدن احزامي اتعلم امن انخاه
يشد روحه عليه لوحَده احزامي!!!

في حرب وسلم فوك الخصر مشدود
اكل لحم الخصر واتعنه لعظامي!؟

اندل الالم بس النزيف ايتيه !
وياخذني النزيف وتيٌه آلامي

ومن شفت السهم ما وصل صدري وطاح
صرت كلي صدر واركض عله اسهامي

واحد من احبه اواحد المحبوب
واحد بالقصيدة اواحد الهامي

واحد كل عمرنه اواحد المعبود
هم واحد الموت اواحد اسلامي

واحد من نطيح اواحد امن انكوم
والواحد بواحد جدول ارقامي

مستوره الخيم وأنه بحلاة النوم
قميصي اعله الشرك ظل يحرس اخيامي!!

وبس رادوني ابوس ايد الظلم مذلول
بست الظلم بس بحلك صمصامي

ما رمشت اعيوني بالقصف من صار
رمش كل القصف من سحبة اقسامي


شعر شعبي للشاعر سعد الربيعي