تويت
مسجون ومتحاصر صحيح
للشاعر محمد جودة
للشاعر محمد جودة
مسجون ومتحاصر صحيح
لكن بتوقف عنفوان الريح
بكفّك العريان
وبجوز عيون متشبّعين إيمان
بتوقف العدوان
وتعيد كتابه الوطن ما بين حدود الخريطه
بفكرة سهله وبسيطه
إن إنتا رافض تعترف بإسرائيل
إنتا الدليل اللى باقى ف دفتر الأوطان
على إنها مش سبيل
حاضن مفاتيح البيوت
وبتعمل المستحيل
واقف كدا بالطول تطخ الطيارات
بكف أخوك اللى مات
وبدمعه أمك وبسكات سبحه أبوك
وبزفزفات البرد ف الليل الطويل
يا اللى انتا رافض تعترف بإسرائيل
كان شئ طبيعى إن الجميع
لما يشفوك واقف
بترمى شباكك المغزوله
من شعر البنات السمر
تصطاد القمر
يقفوا معاك
ويعطلوا بإ ديهم الأفلاك
ويموتوا من خوفهم عليك
ويموتوا من شوقهم فداك
لكن أخوك ف الجب يا يوسف رماك
وحرض القاتل عليك
ولف حوليك الشباك
كان شئ طبيعى إن القدر
يرمى بحجر
فى سكه الطوفان
لكن الزبد والريم
اللى مقضّى العمر يترقّص
على نغم السلام زعلان
إزاى بكلمه تفضحه
وإزاى تخلى إللى مضوا
ورق السلام يترنحوا
إنتا بصراحه يا صاحبى
أحرجت الجميع
وسط الوعود الخضر
فى صحرا السلام
والناس نيام ف الأرض
من طول السفر ف الحر
من ذل العطش
قمت إنتا صلّيت ركعتين
وغزلت للناس الربيع
الكل كان رايح يبيع
وإنتا اللى رايح تشترى بالدم أوطانك
الكل خانك
والعدو مش بس قدامك
فيه ألف كف بتطعنك فى الظهر
بيقولوا لو إسرائيل
كت بس تصبر شهر
واقفين بعيد
يتفرّجوا ع الصيد
والندل بيعلم ولاده
ف الحمام الوليد
إللى ف قلب القفص
وإللى ف إديه الحديد
كان شئ طبيعى
وإنتا وسط الضحايا
تلم باقى الحكايه
وترفع الرايه
كان شئ طبيعى
وإنتا وسط النار
والموت بياكل زرعتك ع الفطار
وع الغدا والعشا ياكل بقيت البيوت
وإنتا اللى غرقان ف الدموع
شايف ملاك الموت
عمال بيجرى ما يلحق
من هنا لهناك
ودموعه نازله على
حجم الدمار والهلاك
هو يشد العيال
الأمهات بتشد
يبكى وتبكى القلوب
والعدادات بتعد
كان شئ طبيعى وإنتا وسط الحصار
بإدين أخوك اللى بيبنى الجدار
إنك تسلّم للعدا أقلام وكراريس الصغار
وعيونهم اللى فتّحت
على حلمها تشوف النهار
ولا حد كان يقدر يقولك ليه
وما دمت مختار الوطن
يبقى بناءاً عليه
إعرف بإنك حلم بيراود بنات الحى
إعرف بأنك ضي
إعرف بإنتك نبى
ساكن ف آخر مدينه
إعرف بإنك سفينه
فى وطن غرقان
إنسان بيخطف حبيبته
من إدين الشيطان
فنان بيعزف ف آخر لحن ف الوجدان
رسام بيرسم مطر نازل على الوديان
يجرى ما بين الزروع
يروى شجر عطشان
إعرف بإنك فارس الفرسان
إعرف بإنك لسان
طالع جبال الخرس
إعرف بإنك حرس
حارس بيبان الناس
إعرف بإنك فاس
عازق عيدان الظلم
كراس تاريخ غير اللى فيه العار
غير اللى فيه العملا والتجار
وطريق لكل اللى حبوا عيشه الأحرار
يا اللى إنتا واقف فى قفصهم جريح
مسجون ومتحاصر صحيح
لكن بتوقف عنفوان الريح
تعليق