تويت
السعادة موش بعيده
:::
شعر: د. محمد عاصي
:::
:::
شعر: د. محمد عاصي
:::
[align=center]
يابني جدك كان حكيم
كان حنيّن كان كريم
قضّى عمره بطوله شهم
وف طريق الحق سهم
عمره ماتعلّق بوهم
قال لي مره من زمان
كلمه رنّت ف الودان
كلمه أفضل م الفلوس
حكمه دامت من ساعتها
أغلى من كل الدروس
"قبل ما تكبر جسوم
ربِّ ف الأول نفوس
كبَّر ابنك بالأصول
قوِّ جوَّاه الإراده
شجعه ينطق يقول
رأيه واضح وبصرامه
علِّمه عزه وكرامه
موش يطاطي أو يبوس
أى إيد مهمن تكون
ـ
علِّم ابنك يبقى راجل
ينطق الحق بصلابه
موش يلألأ ف الإجابه
الحقيقه يقولها دايما
حتى لو فيها مراره
أو وراها فيه خساره
علِّمه يعرف يدوس
ع المزايا لو تمنها
إنه عن حقه يميل
راسه دايما تبقى فوق
حتى لو صادف صعوبه
حتى لو حكمت يجوع
لو رغيف من غير غموس
بس معجون بالكرامه
يبقى أطعم م الطعامه
واللي يستطعم يدوق"
ـ
قالها جدك موش كلام
فض مجلس والسلام
موش لسانه وبس قال
قالها فعله وقال سلوك
لازم الانسان يقاوم
الحرامي واللي ظالم
مهما كان ف الدنيا شوك
ـ
عارف الحاله صعيبه
ع الكبار والشبيبه
مافي يوم بتمر ليلته
إلا فيها كام مصيبه
ـ
لو بتتفرج تلاقي
اللي بيخليك تقول
مافي خير ف الدنيا باقي
المصايب والسرايق
والسيول والحرايق
والمراره ف الحقايق
ـ
ف الشمال والجنوب
الكوارث والحروب
ياما بتحطم قلوب
ياما بتيتم صغار
ياما بتضلم نهار
ياما فيها من حكاوي
شايله جوّاها بلاوي
خلّت المولود يشيب
ـ
يابني إنت واللي زيك
اتظلمتو بدون جريره
بس لازم تبقوا قوه
بالعقول المستنيره
باتحادكم وبإيمانكم
بالعزيمه وبعملكم
ف وش فاجر أو فتوه
يبقى مستقبلكو ليكو
والوطن يبقى اللي هوّه
ـ
شدوا حيلكو يا شباب
بالإيمان ويّا المحبه
بالإراده يا أحبه
تنهو ف الدنيا العذاب
تقفلوا للشر باب
ترسموا البسمه الجميله
فوق ليالينا الطويله
تزرعوا ف الضلمه شمعه
تمسحوا ع الخد دمعه
والأمم تبقى لكو سامعه
ـ
تبقى أيامكو سعيده
والسعاده موش بعيده
لما تخلص النوايا
حنلاقيها موش سراب
ـ
[/align]
تعليق