تويت
وحلمت بمصر ياعم خليل ..
وحلمت بمصر ياعم خليل
اما صحيح كان حلم طويل
حلم تعود فيه مصر بحب جميل
حلم نعيشه ولو للحظة .. حلم أصيل
حلم مصر بتضحكلنا في نور القناديل
وتخلي الهم ينسانا ، وتزرع بسمة جوانا
ومن تاني تجري عيالنا بالشخاليل
*****
حلمي بمصر تزيد الدنيا صفاء وورود
وتروح الآه من قلب الناس أبدا ما تعود
والبسمة تزيد ومعاها ضحكة مالها حدود
والفجر يعود بالخير يرجع مسعود
ومايبقاش في حياتنا طريق مسدود
ويرجع كل غايب مفقود
ويكون أملنا يادوب مولود
*****
حلمي بمصر ألاقي الحب من تاني
وألاقيها فاتحة ايديها وف أحضانها واخداني
ياأحلى أم يا أمي يا مصر ياروحي وكياني
وألاقي الشوق ف قلبك وتمحي أحزاني
وأنسى إني كنت عليل وجراحي تنساني
وأكتب بكل الفخر مصر عنواني
*****
اما صحيح كان حلم جميل ،
فيه الشوق واخدنا لفوق ودي مش أقاويل
وده في حبك يانور عيني مجرد قطرة مش أكتر
مجرد كلمة في عشقك ،
مجرد دقة من قلبك ،
ونفسي الحلم يتحقق ، ياعم خليل ..
--------------------------------------
تأليف : محمود فايد
تعليق