تويت
لقمة عيش
لقمة عيش
أشعار الدكتور صبرىإسماعيل
*****
لقمة عيش بتبّعد فينا----------------ولأخر الدنيا تودّينا
وتجرّحنا وبترمينا-------------وعشانها الملايين بتعيش
همّ الخلق فى لقمة عيش
*****
اللى ليلاتى رِغيفه مغمسّ---واللّى اللحمة بتاعته مِدمّس
واللى متيّس واللى مهيّس------واحزانه جوّه النغاشيش
همّ الخلق فى لقمة عيش
******
واللى انتعشت ليها الرشوة---واللى بينهب ناسُه بقسوة
ولا حطّوم فى عنيهم حصوة---وواخدهم غيم التحشيش
همّ الخلق فى لقمة عيش
*****
واللّى عشانها الدمّ يسيل---------واتفجّر بترول أربيل
واتيتّم أطفال الجيل------------والإرهاب نازل تلطيش
همّ الخلق فى لقمة عيش
*****
واللى يدمّر أمّه بحالها----مايهِمّه اِن ساءت أحوالها
تتخرب ويقولوا رِجالها-------ويجيبوا ذِئاب التفتيش
همّ الخلق فى لقمة عيش
*****
واللى يبيع الكِلمة ب لقمة---واللى يِتاجر قال بالحِكمة
واللى يزوّر إسم الزُكمة----واللى موارب ليها الشيش
همّ الخلق فى لقمة عيش
*****
عزّ الله سُبحان العاطى----إدّاه قوة فى يوم مايطاطى
مهما يِخنّق فيه الواطى--------ويِهدد فيه التشويش
همّ الخلق فى لقمة عيش
تعليق