تويت
من مذكراتي في الـ
ياسلام علي حبي وحبك مابنمش الليل من حبك
يا حبيبي هواك حيرني
والشوق ملاني جراح
وحياتك تبعد عني
وتسبني خلاص ارتاح"
في الصف الآول الاعدادي
كانت اول قصة حب لي
مكنتش اعرف ايه معني حب
وانا اساسا معـتـرفتش اني بحبها حتي لنفسي
انا بس دلوقتي لما بتذكر الذكريات دي قولت
يــــــــــــــاه دي اول قصة حب ليه؟
كانت زميلتي في المقعد
انا كنت آمين الفصل
كان لما المدررس يسبنا ويمشي وابقي انا المسؤال عن الفصل وعن هدؤه كنت في الاغلبيه بطلب منهم انه يتكلموا بهدؤ
لكن لما يعلي صوتهم بضطر اكتب اسماء المشاغبين
الظريف انه لو كانت هي من بين أسماء المشاغبين يبقي الكل ضمن انه الاسامي دي مش حتروح للاستاذ( انا مكنتش اعرف الحكايه دي)
لما كان الاستاذ بيسألها كنت بخاف عليها قوي احسن متجاوبش مع انها كانت شاطره قوي
من مسببات حبي لها انها شاطره ( الصراحه كانت اشطر مني )
اما انا بطبعي كنت مهمل عمري ماذكرت في حياتي كنت بس بعتمد علي ذاكرتي وذكائي
المهم انا كنت شاطر قوي في الانشاء (التعبير) وبحب قوي الاذاعه المدرسيه وفي مره طلبت مني اكتب لها موضوع تعبير
انا لما كنت اتكلم معاها
مكنش يطلع مني غير كلمه لـ جمله واحده:
صح....مضبوط....كلامك صح
تاني يوم خدتلي علقه سخنه من الاستاذ لآني نسيت اكتب موضوع التعبير بتاعي
اللي كان حيخليني افرقع في اليوم ده انها خدت احسن موضوع تعبير في الفصل
ياريتني كتبته لنفسي
برضه أنا كنت متميز جدا في الاذاعه المدرسيه
كنت بطلع كل يوم خميس
انا ولله الحمد الوحيد اللي كان الطلبه بينتظروا اذاعته مع انهم كانوا يعترضوا علي صوتي في الميكروفون بس كانوا بيحبوا افكاري الاذاعيه
كنت بعمل مسابقات في الاذاعه
مجرد سؤال اللي يعرف اجابته يكتبه ويكتب اسمه ويجبلي الورقه وحاعلن الفائز الخميس اللي جاي
بس لاحظ الاستاذ المختص بالاذاعه انه الطالبه اياها فازت 3 مرات في شهر واحد
وهربت من العلقه التانيه لما عرف الاستاذا اني كنت بغششها
اعترفت له هي لما واجهها
علي العموم ساعات كنت بهتم بيها قوي
وساعات كنت بغير منها
بسيط كنت بغير عليها
ياه
كانت جميله والله واللي كان مميزها ومخليها جميله .......عيونها الخضراء
عارفين أكتر مره في حياتي حبتها قوي
لما غششتني في الامتحانات ...........وانا اللي كنت فاكر انها انانيه في حكاية الدراسه دي لكنها مكنتش كده معايا
حصل اني كرهتها في مره
لما خدتلي ماده لاول وآخر مره في حياتي في الماده اللي كانت بتغششني فيها..........كانت بتغششني غلط
يــــــــــــــــــــــاه
كانت ايام جميله والله
هي حاليا
الصراحه مش متابع اخبارها ولاتهمني اخبارها
انا بس مهتم بالذكريات اللي فاتت
................................................2
" سيبها حاتحبك ياقلبي
حبها تسيبك
هي دي حبيبتك ياقلبي
وهو ده نصيبك "
الاولي مكنتش قصة حب بالمعني المعروف
قصة الحب الاولي في حياتي تعتبر دي
كنت في آواخر الصف الثالث الاعدادي
انا انسان اجتماعي
صحابي كتار
كل واحد يقعد يحكيلي حكاية حبه ولوعه مع محبوته
واللي يقولي عملت كذا وكذا
الصراحه غيرت رحت قلت لازم احب
عافيه كده حاحب
بصيت هنا وهناك لقيت بنت الجيران
واحد جاري قعد يحكيلي انه نفسه ومني عينه يحبها
كانت بنت الجيران اللي كنت اسمع انها مدوبه نص الشارع
شعر اصفر وعيونه خضراء وبتروح اسكندريه كل صيف حاجه كده اوربي
قلت يبقي دي
واحد صاحبي كان معايا لما كنت بفكر فيها قلتله_ وانا بمثل اني في حاله مايعلم بيها اللي ربنا_:
انا بحب ياصاحبي
قالي : مين؟
قلتله بعد ماطلعت عينه : بنت الجيران " كذا "
ومن ساعتها حطتها في دماغي
ايش جاوبات وايش اتصالات وكله من مجهول
عرفت بعد مده انها كانت عارفه اني انا اللي ببعت الجوابات واني انا اللي كنت بتصل
المهم
شكلها قالت : احبه ماحبوش ليه ( علشان اصغر مني ) مش مهم اهو سد خانه علشان انا الايام دي في ملل رهيب.
وقبل مانبدأ حب كويس وكلام ناعم
عرفت انها حبت واحد تاني
اتضايقت
واتحرقت منها
عرفت انها بيتكلموا كل يوم الساعه 6 المغرب
الله يعلم لما التليفون رن في الميعاد ده
جسمي خرب كله
قلت اقطع الحكايه خلاص
حاولت انتقم منها
لكني معرفتش ولا قدرت
فيما بعد عرفت انها كانت بتحب كذا واحد في نفس الوقت
كله كلام
كان مبدأها هي إنها مش خسرانه حاجه كله كلام وبس
كنت كل مااسمع اسمها يزيد كرهي ليها
بس حاليا خلاص بقت صفر عل الشمال
بسمع اخبارها غصب عني
حكم الجيره
علي العموم آخر خبر سمعته وشفته عنها هو انها
أتــنـقبت
ومبقتش تسمع غير قرآن وشرائط دينيه
ربنا يهديها
بس تصدقوا الناس مش راحماها حتي وهي متنقبه
واحد قالي دي اتنقبت علشان تتجوز
استغفر الله العظيم
.................................................3 .....................................
"انا فعلا عمري ماعشت في يوم غير ليك
ولا عشت حلاوة الدنيا الا بيك
شفت في عينيك معني الحنان"
أحلي قصة حب ليه كانت حوالي لمدة ربع ساعه
كنت بشتري قصة " اسمه ادهم" لـ أحمد خالد توفيق
خمنت محتوي القصه من الرسومات والآسم
فتحمست للقصه قوي في اللحظه دي وقربت التقطها ومديت يدي
لقيت يد تانيه التقطتها قبل مني
بنت !!!!!!!!!!!!!!!!!
لآول مره اشوف الجمال في بنت قبل مااشوفها هيه ايه اساسا
يعني ملاك ولا ايه بالضبط
شفتها خجلت من نفسها وبمنتهي الرقه اتمدت ايدها وادتني القصه
متهيألي في اللحظات دي انا كنت اخرس ومعاق واهبل
ماعرفتش أقول اي حاجه حتي كلمة شكرا قولتها بتهتهه
بعدت شويه وقعدت تدور في باقي القصص
مش عارف ازاي جاتني الجرأه بعد 5 دقايق من الخرس واروح لها وأقول : لو سمحت ممكن اعرف اسمك
بصتلي بصة غضب حرقتني وخلتني اندم للحظات وبعد كده قالت في جد : ليه ؟
قولت لها : بصي يانسه انا والله مش بعاكس ...انا اساسا مبعرفش اعاكس حد ....انا بس عايز اعرف اسمك...ممكن؟
مش عارف ليه حسيت انها صدقتني وقالت
: لآ ...............
( بس بجد حسيت انها مصدقاني )
وسبتني ومشت
بس والله شفتها ابتسمت
آه ابتسمت
اللي مضايقني اني ممشتش وراها
ليه؟؟؟؟؟؟؟؟؟؟؟؟؟؟؟؟؟؟؟؟؟؟
مش عارف
مشت وانا واقف
ولا عرفت اي حاجه عنها
حد يسألني حبيتها ليه وانت متعرفهاش
" يمكن علشان كانت حتشتري لـ احمد خالد توفيق ".........
مش عارف
الثالثه بقـ
هوبا
القلم شطب