تويت
لتحميل المادة الصوتية
أنا من يوم ما قالوا لي
سفينة الحب هتسافر على غزة
حجزت تذاكر الأشواق
و م الفرحة منيش قادر أخبيها و أكتمها
فشافني صحابي و احبابي
قالوا لي عنيك بترسمها
بترسم شوقك المكتوم
على جدار الهوا الساري
أنا قلتلهم الأشواق بتفضح كل أحبابها
أنا رايح اشوف النور فـ أرض النصر و العزة
هسيب ابني ما بين أهلُه و اشوفه هناك
أشوفه ف دمعة الأيتام
اشوفه ف ريحة الألغام
اشوفه ف ريحة المسك اللي بيعطر أراضيها
اشوفه ف نسمة الأشواق اللي بتخطف قلبنا ليها
أشوفه شايل الأعلام مقابلني
فأخدو جوا أحضاني
و نسبح في بحار الحب و نغني
و كنت اتمنى أحط إديا فوق راسه
و اكتبلو في كراسه
زمان الفرح جاي بكره
أنا سايبه ورايا جاي
و قلت أسبق أمهد له
فجبت الريشة و الألوان
عشان امسح من الكراس
حروف الظلم و الأحزان
و ازيل كل السطور منها
فتفضل صفحته بيضة
ما يفصلش ما بينها حدود
تشرَّق فيها و تغرَّب حروفي ويَّا ألحاني
و كنت اتمنى أطوف وياه على كل اللي بيعاني
و اقول يا غزة وحشاني
فسبت الدنيا و قصدتك
ما هو انت كل عنواني
و موجك حرك الأشواق فجه عندي و ناداني
و كان نفسي أوزع ع البنات فساتين
و ارسم فوق شفايفهم هَنَا و تفاريح
و ازرع م القلوب بساتين
فتملا حياتك الفرحة
و اسمع كلمتك ليا تقولي لي أنا مسامحة
فاجيب الريشة و الألوان
و اخَضَّر جنتك ليوم الدين
و سافرنا و كان أملي
أحقق كل ما تمنيت
و يبقى لي فـ عيونك بيت
و موج البحر لما يجيني يحكي لي عن اللي هناك
أقوله خلاص أهي هانت
فيرقص م الفرح و يطير
و يسبقني على شطك
و أنا قلبي يطير بعده
و أستنى ساعات الشوق
توصَّلني لأحبابي
لكن فجأة ....
ألاقي الغدر بيخبط علي بابي
فَدَاق البحر طعم الدم
و زاد الهم فوق صدري
فموِّت كل أمنية تفرحنا
و يجرحنا على جراحنا
لكن ربِّك فتحي لي باب
من الدنيا على الجنة
و انا دلوقتي بتمنى
أجيلك تاني يا غزة عشان بترابك أتحنى
تعليق