عين بكرا خاصمها الأمل
و الضل فيها انكمش
بقي خرم إبرة
خروم الإبر مسدودة بالآهة
و أنا دليل الخيال فى غيط السفاهة
وهم انصلب
لو قربت مني التعالب
حتما هاتعرف بإني مجرد دراع ميت
و صدر مخنوق النبض متبيت
مشنوق على كباري العاصمة الكبري

ومزوي ياليل حوالين سعف الجريد
عاتت فى جلد الحطب
ياما نسجتك سمر
فستان بلون الشمس
جلابية بتستر قعدتنا
فى جناحك المستدفي
بمنقد اللمة
بالطيبة
بحكايات الشقاوة
ونوادر العيال المكسية بلون الأرض و السوسن
و كردان البت أم الهنا الفالصو
وزعقتها جانب التوتة
قنفد يابويا
قنفد يابويا
فى كوم السباخ متخفي
هاتوا يابويا
شمع اسماعيل ابن خوي مرخي
و الليل يابوى هايحط حدانا كتير
مستني زند اسماعيل حين تجدر فيه إبر السنط
و يلم شعر البنت
المرخي
جدايل
ضفاير
تعاليق تقاوي الهجين الداير على اكتافها
تتخفي فى ضله السناجيب
و سحالى من عهد هامان
ونعجة وديب
و إفراس النبى النطاطة
و الودعة أم قلب رهيف
واقفة تستناه
إمته يابوي

هاتوا يابوي
نفسي فيه رهوان
يخوض مع البرد والليل
يزيح ما يخلي فيها ابن كلب عويل
يرفع نشيدنا م التراب
زي ليلة قدر طاله من سدر السحاب
تلقي كفوف الدم مصلوبة الكرامة
جايبة النهار فرسان
بيارق
من عزمها طالل صلاح الدين
قطز بيبرس
جمال
كل الفوارس قلب مشدود باللى جي
ينشق قلب الحجر ضمير حي
جميل الضي والمعني
ماله فى الوجود زي

تملا سدورنا بالنشيد
وتلم كردانها العجوز
ودمعة واقفة مابين الرمش و النني
زي نجمة
زي كلمة لسه واقفة فى السدور
بتراعي لنا
الاتهام باين عليها
و تحط على كوم التراب
تحفن
وترمي
تحفن وترمي
لما دفنتنا بطولنا
أم الهنا أم قلب نضيف
فاهمة الحكاية كلها
ولوحدها
لكن ماهيش فاهمة إيه اللي كاسر جمعنا !!