الإهداء إلى العزيز جمال فرح.
كنت وعدت بمساهمة بالعاميّة وهذا النصّ دارجة باللهجة التونسيّة.


غدوة تنسى عذاب اسنين
وتنسى خصامي
وتنسى هجري
وتنسى حتّى دمع العين
غدوة تعرف بعدي أخرى
تهديلك أشواق وزهرة
واتنسّيك حبّي لحزين
وانضيع وسط الزحمة وحدي
ونسهر عالشطّ مع سهدي
نتذكّر فستاني الوردي
في ربيع عشيّة جمعتنا
عالشطّ ويدّك في يدّي
وشعري يطّاير عالخدّي
وعينك كانت تطلب ودّي
ومبهورة بقلبي لحنين

غدوة تنسى عذاب سنين
وتنسى خصامي وتنسى هجري
وتنسى حتّى دمع العين

ونرجع ال قهوة لغدير
نطلب قهوة وكأس عصير
تتذكّر مقهى الغدير
والنادل لسمر لقصير
يعطيك انت كأس القهوة
ويعطيني كأس العصير
نضحك منّه أحنا لثنين
طيّب أمّا فهمو رزين
كيف راني وحدي المسكين
سأل عليك وما صدّقشي
كيفاش ضعنا احنا الاثنين
وذكّرني بأحلام بعيدة
وقصّة كيف عمري لحزين

غدوة تنسى عذاب سنين
وتنسى خصامي
وتنسى هجري
وتنسى حتّى دمع العين

يوم حرقت المسافات
والجنوب طريقو طويل
تسبق قلبك والآهات
باش تخلط حتّى بالليل
تجيني تقلّي علّي فات
وادّاوي قلبي العليل
تتذكّر وقت الّي وصلت ؟
تحدّيت كلام القبيلة
ونسيت الدنيا وكلّ العيلة
ولبست الفستان الوردي
وفي الشارع نجريلك وحدي
عنّقتك نسمع في قلبك
يردّ على قلبي المسكين
حسّيت إنّك ملكي وحدي
وأنا عندك نور العين
زعمة تنسى أجمل ليلة
في عمرو قلبي لحنين
ليلة كيف حلم الطفولة
بين شطوط خيار الدين

تفسير بعض المفردات :
غدوة/ غدا
زعمة/هل؟
امَّا/لكن
تخلط/ تصل
عنّقتك/ احتضنتك
شطوط/ج شطّ
خيار الدين/ ضاحية من ضواحي العاصمة والأصل خير الدين باشا.