بقلبى وعمرى حبيتك ..
عشقت عشانك الأيام
ندهنى الحب لبيتك ..
وعشنا فى بعضنا أحلام
وخدعتينى يا ريتنى..
ما كان ليا معاك غرام
*******
أنا أخلصت ليكى كتير ..
وكان قلبى فدا قلبك
أتارى أنا وقلبى الكبير..
عشنا الوهم فى حبك
وبتخادعى وليكى أسير ..
تانى بيمشى فى دربك
******
وأنا مرضاش أكون تانى ..
وأنا فى حبك وفى وإنسان
لـ فى قلبك أكون وحدانى ...
أو هجر وجفا ونسيان
واخترتى وكان عنوانى...
قلب مات فيه الأمان
******
وبتطوينى سنين أسايا..
والأحزان تطفى شموعى
أهرب منها جوايا..
وأستخبى فى ضلوعى
وآخد زادى ويايا..
بقية عمرى ودموعى
******
واقابل جوا نفسى الخوف...
وضلمة وقبر له شاهد
وسفينة أمل مخطوف...
لا ليها شراع ولا قائد
وترنيمة بصوت معروف..
لساك يا قلب بتجاهد؟
*****
والخطوة ما بين ضلوعى تطول...
واخاف لـ الضلمة تتبدد
أو اسمع قلبى تانى يقول ...
ياريت الحب يتجدد
لأن يا قلبى مش معقول...
تحب وغدر بيهدد
******
يا قلبى يا مجروح أوعاك تعيش ..
ده أنا وانت فتات ذكرى
هاقولك حل غيره مفيش ...
ويللا ننفذ الفكرة
هات جرحك على جرحى ومنخليش ..
ونقتل م الزمن بكره
***

جمال