حلم صيفي

مفتتح
"بِحُبِّك
ابتديت أبقى
بَحبِّك
و الدنيا مش فارقة
غير بس بيكي"


كل أمَّا تتلَّون سما
بترتيلي لتفاصيلك
يطلع نهار
يقيد الروح
ف نني اسوَدّ إكسيره
بطول ليله
لخوف عدَّى حدود شوقه لقناديلك
بعد ما كان النبض يدقّ بموت
إحساسه..
كان خطو خيال ع الأرض
وأنا كنت ف عرض
حبة ضىّ
و مكنتش عارف
إنك نبض الكون ده بحاله
أو كنت بكدِّب روحي
وبدون تشويش
أبدأ أحسّ
إنك فعلا كل الضىّ
و إن الجاى
مش هيكون لي خريف
و إن بطول العام الصيف
هيكون..
مبدور لعنيكي حنين
وإني هاصبَح ليكي جنين
مجنون
يملالك كل العالم
مصابيح
تسابيح
من شوقه البادي يزورك
وإن لزم الأمر
يعملّك مني مقام و ضريح
لو تسمحي..
هاجري حدود الوقت و المسموح
لو تمنحي
هبقى الضيا و آخر طريق للبوح
لو مطرحي..
تلاقيكي شابكة الروح
بحبل خلاصها
م التوهة وم الأحزان
أنا م الآن..
سأحبك
ما بقيت
رغما عني