من غير ترتيب او اى ديباجة ***
انا بصراحة مش قاهم حاجة ***
وجى اسألكم كدة بسذاجة ***
*****
نفسى اعرف ايه متغير فى نفوس الخلايق
ليه باشوف الواحد منهم مخنوق مش طايق
ليه بلقاه زى السكران مع انه وربنا فايق
*****
شايف اوضاع الناس والله تحير
واكيد شىء فى نفوسها غظيم اتغير
ومانيش عارف الأمر كبير وللاصغير
***** شايف الناس عايشة فى سلبية
ماشية بشعار الاتكالية
والاخلاق صبحت مش هية
*****
لو واحد شر بيحصل له *** التانى بيقول انا مالى
ومادام الشر بعيد عنى *** خلينى فى حالى
وكفاية ابص لبيتى ونفسى ***واربى عيالى
*****
لو بتصحح لواحد غلطه *** وتفتح للصح عينيه
هيقولك طب وانت مالك *** واشمعنى انت تبص عليه
وده يمكن برضه يزودها *** ويستعمل وياك ايديه
*****
لو بتقول ياجماعة تعالوا *** نمسك قفة وفاس
وننضف مع بعض شارعنا *** ودى حاجة تفيد كل الناس
الكل يسيبك ويطنش *** وكأن ماعندوش احساس
*****
لو بتقول يااخواننا الامر ***ده صح لو انه يكون
هيردوا عليك باستهتار***يعنى انت هاتصلح فى الكون
ده ان مكانوش هيقولوا عليك *** راجل رجعى او مجنون
*****
حتى ان كنت واقف بتصلح حاجة بايدك
هاتفيد كل الناس وضرورى تفيدك
هتلاقى اللى يقولك سيبها لسيدك
****
وان قربت المركب تغرق باللى عليها
هتلاقى اللى يقول وانا مالى بيها
يعنى انا لوحدى اللى فيها
*****
يبقى خلاصته ان الناس عايشة مع نفسيها
بتلاقى راحتها فى انها تتلاشى بعضيها
*****
وفيه ناس فاهمة الدنيا على حقيقتها
وبتتصرف صح وعلى فطرتها
لكن مين يتبع خطوتها
*****
فيه حاجة غريبة مانيش عارفها
هى الناس ماشية بتصريفها
واللا الدنيا اللى ممشية الناس على كيفها
* جمال عمران *