يازمن الحب المنزوع من صدر البنى ادمين
يازمن الغل المنقوع جوا الشرايين
يازمن الود المقطوع والناس تايهين
******
احوالك يازماننا عجيبة بكل صراحة
فيك ناس طول عمرها مرتاحة
وبتهرب م الراحة لراحة
وناسي تشقى وتتعب فى الساحة
فيك ناس تاخد كدة ببجاحة
وناس تدى بضمير وسماحة
******
ناس فى الابهة مطرح ماتروح
وناس عايشين فى بروج وصروح
وناس فى عشسش فوق سطوح
وناس بتجيب اللقمة بزهق الروح
وناس تصرخ حسها مبحوح
وناس بتعانى مليانة جروح
******

ناس تلبس خيش وتنام على خيش
وتقف باليوم فى طابور العيش
والحال على اده مابيكفيش
وناس نفسها بس تعيش
وناس بتنام دايما على ريش
ويسموا الالف جنيه بقشيش
******
ناس دايما بتبات جعانة
وناس قاعدة تبص وشبعانة
وناس تتعب دايما شقيانة
وناس بتدور على شغلانة
ناس شبعانة وناس فى مهانة
******
ناس عندها اعمال مربحة
وناس طايرين فوق اجنحة
وناس بتلف على الاضرحة
*****
ناس فى نفوسها شر وريبة
تأذى الناس بطريقة عجيبة
وناس فى قلوبها سماحة وطيبة
وناس عايشة على الدنيا غريبة
******
ناس الدنيا واسعة قبالها
وناس بتزيد دايما اموالها
وناس تشتكى م اللى بيجرالها
وناس مايسرش ابدا حالها
وناس بتبيع م الفقر عيالها
وناس الدنيا ولا على بالها
******
ناس تركب ماركة خنزيرة
وفلوسها تبعترها كتيرة
تشترى فيللا خطيرة
تعمل حفلة كبيرة
تعشى الكلب لبن وفطيرة
وناس من فقر الفقر فقيرة
وناس من هم العوزة فى حيرة
وناس رابطة على البطن جبيرة
وناس تتغطى بطرف حصيرة
ما تيجى نفضها والنبى سيرة
********
* جمال عمران *