يا شمس تحرير أرضنا .. ياللى شعاعك بارود
يا شقة بحر الليل .. بعد الرقاد والجمود
يا أم اللهب يحرق .. وِشوشْ نجمة داوود
******
يا شمس بكرة للتحرير .. يا مجيشة جيوشك
تنشرى ضيك مداين .. وتفردى ع الكون رموشك
لو تشدى شوية حيلك .. مستحيل شىء راح يحوشك
*****
يصحى الوطن لو تطلعى .. يتوضا من نورك
و يشتد عزم الولاد .. لو خطوا فى بحورك
إجدلى لينا ضفايرك .. وإفتحيلنا بيبان قصورك
*******
إطلعى مدى الدفا .. وإنشرى لينا شراعك
قلب الوطن يدفا .. لو يوصله شعاعك
والدم يجرى فى العروق .. والقوة من باعك
********
ياشمس تحرير أرضنا .. ياللى إنتى نور ونار
والخطوة بكرة مدة .. وهدة للأعادى ديار
والعرب وبيد واحدة .. يهزموا جيش التتار
*********
والليل يغور .. ولا يوم نشوف .. وشه القبيح
وتبقى ياشمس الكرامة .. ياسا طعة والضيا صريح
طول الزمان فوق قبة الصخرة .. ومهد المسيح
*********
وتفضل فلسطين القدس حرة .. ومهد الأمان
جنة فى الأرض والدين يصونها .. وروح الإيمان
وجنود عرب بالروح يحرسوها .. لآخر الزمان
*********
* جمال عمران *