أمجاد يا عرب أمجاد
ورجالنا فى وقت الا زمات
يتفرجوا على الافريكانو
ويميلوا هناك لما يميلوا
طبعا دا مفتاح النصر
والشاطر يرفع إيده فى الفصل
اوعى تقولى دا أخر فصل
قولىبداية الامجاد
ويا فرحة عدونا فينا
شمتناه بإيدينا
قولى يا بيه بقى قراراتك
العنترية و الفوضوية و المستحية
الباشا الملهم بيسقف
والتانى قاعد مكتف
ما تقولى بقى خزيان من إيه
ما تقوم تاخدلك راقصة معاهم
وإحنا حنعمل موش شايفين
وفى سرت حدانا السر فى بير
وغنى معاهم وقول وياهم
شعوبنا ودانهم دى من طين
يا الله فرفش يا الله نعنش
دا ساعة الحظ متتعوضش
وأمجاد يا عرب أمجاد
ضاعت غزة رمز العزة
شوفنا الكلب بيهتك عرض
وأسيادنا يغنوا يا ليلى يا عين
شوفنا عراق شوفنا دماء
ملت بدل النهر اتنين
شوفنا ترابك يا أم الدنيا
يتباع لعدوك بالملاليم
شحتوا غازك
فتحوا بوغازك للملاعين
يعذبوا فينا يقتلوا فينا
ما إحنا كده ضايعين ضايعين
خالتى ثنية ماشية فى حالها
قاموا أخدنها تحرى يومين
ليه يا ولادى تبهدلوا فيا
دا مهما كنت أنا برضه ولية
وبولول على ولادى الاتنين
اللى راحو فى حرب أكتوبر
وأرواحهم راحت بالملاليم
وكنت بقول تسوى الملايين
ويا ريتهم كانوا معايا الاتنين
كانوا أكلونى أو شربونى
كنت ألاقى قلب حنين يضمنى
كنت أتمنى كلمة حلوة تهذنى
كنت أغنى نشيد بلادى
كنت أغيظ به الاعادى
اللى مزعلنى مش دم أولادى للوطن
اللى مزعلنى أرض بلادى
اللى راحت ادامى هدر
وضريبة الدم اقبضها منين