في الصفحة دي ممكن نحكي كلنا المواقف الي حصلتلنا وكانت مضحكة وطريفة، أو حتى محرجةـ لأنها بتكون مضحكة جدا :d

خليني ابتدي معاكم بموقف..
أنا بشتغل في مدرسة، ومن ضمن شغلي اشرافي على الموقع الالكتروني بتاعهم، المهم إنه كان في مجلس امهات وقالولي لازم اطلع قدامهم واشرحلهم عن الموقع والتقسيمات وازاي يقدرو يستفيدو منه ويتابعو بناتهم وكده.. طبعا انا اتخضيت لأول وهلة لكن بعدين قلت يابنتي اجمدي والعمر واحد والرب واحد ورحت :d
واقفة على طاولة أمورة أوي كدة وقدامي لابتوب وماسكة ميكرفون والي بشوفه قدامي معروض على الحيطة ومفروض هتكلم بئه عن (أقسام الموقع)، أول كلمة طلعت معايا هي: "طبعا يا جماعة زي منتو عارفين موقع المدرسة ده اتعمل من سنتين وأهدافه هي: "/ أهدافه؟؟ يانهار مش فايت/ هو ايه الي أهدافه أصلا أنا جاية اتكلم في حاجة تانية خالص انا مليش دعوة بالأهداف أنا يادوب باخد منهم المادة واحطها وانسقها لكن مش حافظة الكلام الي جوا......

المهم حاولت ابتسم وألم الدور/ وأبص قدامي ألاقي صحبة المدرسة ومديرة المدرسة والمشرفة والمدرسات وأمهات البنات كلهم بيبصولي وأنا قاعدة أقول / أهداف الموقع هي: آآآآآآآآآآآآآ
آآآآآآآآآآآآآآآآ
آآآآآآآآآآآآآآآآآآآآآآآآآآآآآآآآ
لدرجة الست صاحبة المدرسة وشها احمر وقعدت تشاورلي (الأهداف ياهدى)/ يانهار فايت/ آه الأهداف.. الأهداف طبعا إن ولادكم يتعلمو كويس ويلا بينا على الأقسام/ لوووول
و برغم من إن أول القصيدة كانت كفر إلا إني الحمد لله انطلقت بئه في الكلام الي أنا عارفاه والي عملته، بس يجدر بالذكر ان ده كان مجلس امهات كي جي، وكان لازم بعده اعمل نفس الحوار مع امهات بقية المراحل لغاية اعدادي/ لكن طبعا محصلش..

متفهمونيش غلط، هم الي حرموا
آآآآ
آآآآآآآ
وسلامتكم :d