** كتبت الاخت وفاء عن صباحات مصرية ، وللتواصل ، هاهو مساء مصرى **
*************
مساء الخير يابدر مرايته صفحة نيل ..
مساء الخير يانجمة ضيها مواويل ..
مساء الخير على مصر أم قلب جميل ..
****
مساء الخير على جدع صاين العهود ..
ديدبان ماينمش ليل حارس الحدود ..
ساعة الشدايد يبقى هو ومدفعه شحنة بارود ..
****
مساء الخير على فلاح يادوب راجع فى إيده الفاس ..
على عمال فى وردية بيشتغلوا بكل حماس ..
مساء الخير على تلميذ بيكتب واجبه فى الكراس ..
****
مساء الخير على ام السعد على ماكينتها مكفية ..
بتخيط فستان زفاف لبنت جارتها حمدية ..
مساء الخير على طفلة بتملا القلة بالمَيّة ..
****
مساء الخير على اللى جايين من بعيد ..
من القنال ومن البحيرة وم الصعيد ..
قاصدين ضريح السيدة بشموع تقيد ..
****
مساء المسك والعنبر على مدنة فوقيها آدان ..
وناس بتصلى فى المسجد ومتحاوطة بضَى إيمان ..
مساء الخير على كنيسة ودير رهبان ..
****
مساء الخير على جبينك بينضح عطر من ضَيِك ..
مساء الخير على ولادك بتشرب شهد من رَيِكْ ..
مساء الخير يا أطيب قلب .. يامصر قوليلى مين زَيك ؟؟
*************