تويت
فيتــو
فيتــو
أنا باستعجب على إللي يدي لنفسه الحق أنه يصادر أراء الآخرين , أنه يعين نفسه رقيب على الناس أجمعين . أنا ماعرفش مين إللي إداهم الحق ده , و منين جابوه , أو اغتصبوه..؟!
أنتم عارفين أنا بتكلم على مين..؟! أنا بتكلم على الأمريكيين , إللي متحكمين في العالم عن طريق عصابة الأمم المتحدة , و ابنها البكري مجلس الأمن و قرراتهم الظالمة الجائرة اللي بتصب في اتجاه واحد ؛ مصلحة إسرائيل و من بعدها أمريكا.. باعتبار أنها الولية الواحد و خمسين - أقصد الولاية - أما القرار إللي ما يجيش على هواهم , أو يعكر صفو مزاجهم فعلى طول الفيتو الأمريكي المتين..!!
أنا بس عاوز أعرف هما جابوا الحق ده منين..؟! ماتقوليش الدول المنتصرة في الحرب العالمية التانية..طب و أحنا مالنا..؟! دي حاجه عدى عليها سنين وسنين..طيب هيا حتى الصين كانت من المنتصرين..؟! و بعدين هما ليه اعتبروا العالم تركة أبوهم و قسموه على بعضهم على مزاجهم إللي تحت الحماية البريطانية , وإللي فرنسية , وإللي امريكية . و قال أيه عملولنا أمم متحده ..!!علشانا يجبرونا أننا ننفذ كلامهم. يعني هما يكدبوا الكدبة و عايزنا أحنا إللي نصدقها..؟! طب ليه لو اجتمعت كل الأمم- إللي بيقولوا عليها متحده - على رأي واحد و فيه دوله واحده - كلنا عارفينها طبعاً - مش عاجبها الكلام ده على طول يطلع الفيتو الأمريكي..!! - إللي مش عارف العدد بتاعه بقى كام دلوقتي ..؟! - فأمريكا هي أكتر الدول الخمسة استخداماً لهذا الحق الجائر..!! و مين قال أنه حق أصلاً..؟!- قصدى الظلم البين – و بتنفذ عن طريقه - بمساعدة الأمم المتحده و مجلس الأمن طبعاً - كل أطماعها الاستعمارية..و تسيطر و تتسلطن على العالم..!!
أمريكا دي بتفكرني بواحد زمان - ماكانش صاحبي - كان أسمه (حماده كالو ) كان بيحب يلعب بالكورة بتاعته , و يختار إللي يلعبوا معاه على مزاجه , و إذا - لا قدر الله - جه فيه جون , و خلاص هيتغلب. يقوم واخد الكوره , و يقول مش لاعب..!!
لحد ماحنا قررنا كلنا في يوم ؛ أننا نلم من بعض و نشتري كورة للكل . طبعاً (حماده كالو ) مالقاش حد يلعب معاه و راح لأمه و قعد ياعيني يعيط..!! و من بعدها انقطعت أخباره , و راح إلى حال سبيله , و اترمى في مذبلة التاريخ..!!
أنا مش عارف أمتى هتبقى الكورة في ملعبنا ..؟! و أمتى هنبطل يتلعب بنا الكورة..؟! و أمتى هيبقى القرار قررنا ..؟! و أمتى هنوحد كلمتنا..؟! و أمتى هنقدر نقول للظلم فيتـو..؟!
تعليق