تويت
تونس يا بلاد الزيتونْ
بلاد الطيبةْ والحريةْ
بلاد النخلة والعرجونْ
بلادي وبلادي أماليّةْ
الغالي عليها والله يهونْ
تونس يا مهد الحضاره
من "عليسة "لابن خلدونْ"
من" بنزرت "لبن قردانْ"
خضراء وفي "جربة ميدونْ"
تونس درّة وامحلّيها
جوهرها الغالي المكنونْ
طيبة، ونبوغ ، وثقافة
غزلانك تبهرْ لعيونْ
تونس يا نعمة ويا جودْ
يا خضراء ترمي بأولادكْ
للظيم وخيرك موجودْ؟
ما انظنّش ترضى بالحسرة
للّي عاشوا العمر جنودْ
صبر، ونضال، وكفاح
برجالك يا خضراء تسودْ
لحقوا المستعمر بالجُرّةْ
وعلّوا أسوارك عالحدودْ
جَنوبِكْ ،غربكْ، شَمالكْ
من نفس الكرمة العنقودْ
اليوم الخبزة صارت مرّة
وأكبادك ملّوا الخضوعْ
تونس ناسك أهل عزيمهْ
والصبرْ اصْبَرْ ..وموجوعْ
يسأل يا خضراء ويتمنّى
بخيراتك ينعم أسبوعْ
ينسى المرّ وينسى الليعهْ
وما يحسّش روحُو مخدوعْ
مخدوع بوعدك وزمانك
مخدوع بلمسة حنانكْ
مخدوع وياسرْ مخدوعْ
البراّني يرتع في أحضانكْ
وولدك جلدة فوق ضلوع
واحد بأعمالُو وأموالُو
وواحد يتضوّر مالجوعْ
ومن حرقة قلبو يا خضراء
النار كلاتْ اليوم زروعْ
أغصانك تحرق أشجاركْ
وأشجارك زادت في نارك
نبكي على تونس بدموعْ
أكبادكْ تحرقْ في أكبادكْ
وزاد اليأس قتل أعيادكْ
يا خضراء وفرحوا حسّادكْ
ليذاقوا خيرك ينبوعْ
تونس خلّي ترابك جنّةْ
لأولادك يا أرض الحنّهْ
لا تنسي شكوة مظلوم
ولا تخلّي ظالم يتجنّى
على جايع والاّ محرومْ
يا ما صبر وياما استنّى
بأوهامو يرقد مهموم
ياما حلم وياما تمنّى
وأحلامُو دفنها بالكومْ
اليوم نطق صرخ وغنّى:
يا تونس راني مكلومْ
وحقّ ترابك مانتهنّى
وما نشبع حتّى بالنومْ
ساير حاير قلبي اتعنّى
يا ويل حياة المحروم
خيّرْتْ النار على المحنةْ
والموت ياما يجلّي غيومْ
لا لقيتك يا خضراء جنّةْ
ولا جاني منّْك مشمومْ
تعليق