تويت
وانا ف الحلم بفضل فوق
وعمر ما كان منايا تحت
وده مش عشق للي فوق
دا بسِ خوف من اللي تحت
ولو حلمي هيفضل فوق
همد إيديه للي تحت
وخايف أنطرد من فوق
وتنساني الخلايق تحت
وليه ميكنش فرعي فوق
ويفضل جدري ثابت تحت
نهايته معدتش أنفع فوق
وبرضه مش هينفع تحت
واديني وقفت مستني
لابطلع فوق ولا انزل تحت
ومين قال إن ليّا أحلم
ومن أمته يجوز لينا !!؟
ياعم خلاص .. بلاش أحسن
أبوس إيدك تواسينا
متكتبشِي عشان خاطري
كلام فى الغربة يبكينا
تعال أكدب أو أخدعنا
ونضحك كلنا علينا
ونخفي راسنا ف الرمله
وندفن جرحنا فينا
ف عز البرد إوهمنا
بإن الحر كاوينا
وغطينا بكام فرحه
ونرحم م البكا عنينا
كلامك كل يوم يدبح
يموتنا ويحيينا
يخوفني أنام واحلم
لأن الحلم مش لينا
بلدنا من زمان ماتت
وحفرت قبرها ايدينا
وبايعها .. نصب أفرح
ولا جه يوم يعزينا
نهايته... خد همومي معاك
وربك وحده يرضينا
ولو بيتنا نقول ونعيد
هتعمل أيه حكاوينا ...
وأحلامنا , وأمته ف يوم
تفر لفوق شواشينا ! ؟
متغرقشِي ف مدد الشوف
وتهرب تحت رجلينا
نعانقها تموت م الخوف
وتتخفى حوالينا
لقيت فى الحلم يوم إني
عزفت اللحن من غير عود
بقيت اكتب لفوق قلمي
وللورقه رسمت وعود
وفارد للحمام حضني
وطاير بالأمل وعهود
وطول العهد بتمنى
أطير أبعد من المحدود
لحد الليل م يوم ولى
وطار عني وسابلي قيود
فضلت أسأل كتير عني
يقولوا برضه مش موجود
وهاكتب للي يفهمني
ولو كانوا عجم وهنود
واخاف الناس لتسألني
وانا عاجز ما عندي ردود
وارد ازاي وانا عارف
كلامي بالحروف معدود
بيسمعني يقوم يمشي
يتوه عني وانا المفقود
يقع حلمي ويتكسر
فى عين الناس وهما شهود
أتاري فى المنام برضه
مليش وسطه ولا مسنود
وطول ما الليل عليه حارس
أكيد أحلامنا مش هتعود
تعليق