حالة صرع
********
جرايد عجايب مقالب زباله
تشوفنى وأشوفك شوية حثاله
فضايح مهازل مافيش إستقاله
وطالع ونازل يأزأز ف روحنا
وشايل مقاله تهد ف طموحنا
على الشط كرسى مسلطن سعادته
ونفسك ونفسى نشوف إستقالته
نعمل مظاهره تسد الشوارع
نصرخ نصيح نزيد ف القواله
وقوتنا يصيده بغمزه وإشاره
فى ناس رايحه جايه شوية سكارى
وناس فى السجاره
بتنفخ تعبنا
من الهم دقنا وشوفنا سمعنا
وجُعنا أكلنا شربنا شبعنا
جرايد أونطه
بميت ألف غلطه ومفروض علينا
نغمض عنينا يا ندن فى مالطه
دا خاين دا باين دا عقله دافاضى
دا راضى ودا قاضى
بيحكم عداله يقول إستحاله
يقدم سيادته شهادة نداله
جرايد عجايب مليها الصفار
تقول إنه يمكن هيطلع نهار
ماليه الغيوم معفر غبار
يدور علينا تعضعض دا فينا
جرايد زباله وسايقه الهباله
تنزل وظائف بقدم وخايف
لتطلع وظيفتى فى حالة صرع
وتهجم عليه تخزق عنيه
وتديه تمام
عمينا الواد اللى عامل جدع
جرايد عجايب مقالب زباله
مافيش مره واحده
نشوف إستقاله

محمود سرحان

( هذه بعض الجرائد )