تويت
تايـِهْ بدوَّرْ عليكي وانتي قدامي
وجوّا قلبي ، يا فرحةْ كلِّ أيامي
عيني انكوت م البكا ، والحزن زي الليلْ
ورايا بيـْضلـّم الدنيا وقـدّامي
***********
بشوف ملامحك كأني شفت مرجيحه
دايخه ما بين ألف تطويحه وتطويحه
واشوف عظمتك ألاقيني بدون تفكير
ويـّا أنينك بناجي الله بتسبيحه
************
إنتي الحياهْ والأمل والفرحه والدنيـَه
عمرك ما بتغيبي عني حتى لو ثانـْيه
ولو تشوفي ضلوعي وْهيّ شايلاكي
راح تعرفي إنك المحبوبه والغاليه
***********
قالوا : الغرام ، قلت : ما لهوش طعم من غيرك
ولا الأغاني بتحلى إلا من طيرك
حبك : موده وِرحمه لو بنتعلم
وكل أهل الهوى عايشين على خيرك
*************
يا مصر يا ام الغلابه والطيابه مين؟
يقدر يضرك ولو كانوا ألوف ملايين
وولادك الطيبين أبطال بيجمعهم
حب الوطن إِللي هو أصل زي الدين
************
شبابك الحر أرواحه بتفديكي
وبكل نقطة عرق وبـْدَمـّو يرويكي
وبكل ثورة شريفه حره تـِتـْجدد
فيه العزيمه مع الإيمان بتحميكي
************
ثورة شبابك بترسم للتاريخ صفحه
حروفها بالعزه مكتوبه وِبالفرحه
وكلِّ إيدْ من شعاع الشمس مفروده
تغزل خيوط الأمل ويا العمل طرحه
**********
زلزال شبابك لا بيخرب ولا يدمر
إلا دعاوى اللي فاكرْ نفسه بيعمر
وهو أس الفساد والنهب والتخريب
وعْصابه عماله بتطبل لّو وِتزمّر
**********
عمرك ما كنتي في يومْ عزبه ولا وْسيّه
أو كنتي تحت زعيم ، أو ملك حزبيّه
دا احنا اللي ملكك ، وأولادك وخدامك
وكفايه إنك تضمينا بحنيّه
*********
ثورة شبابك ما هيّاش بس في التحرير
يمكن تكون البدايه منّو للتغيير
اسكندريـّه وأسوان ، سينا والسلوم
وكل قرية وْمدينه يعمها التعمير
****************
مشتاق حبيبتي أشم ترابك الغالي
واسقي غيطانك ، وأحضن سدك العالي
وف كل حته بأرضك زي موج النيل
أمشي ، وأقعد ، واغني : مصر موالي
تعليق