تويت
في بادئ كلامنا نصلي ونبارك
وندعي لكل الخلايق تشارك
واقول للمطبل واقول للمهلل واقول للجبان
انا فى الميدان
.......
ولا انا شمال ولا انا يمين
ولا انا فى حزب شعاره سيفين
ولا اسمى خومينى ولا اسمى حسين
ولا فى اسرائيل حلفت اليمين
ولا ليه وصله مع التركمان
لكنى اكيد
انا فى الميدان
......
بتسألنى ليه انا فى الميدان
ومش راح اناظرك واقولك عشان
ومن غير ما اقولك لانه وكان
هاقولك انا ليه بقى فى الميدان
بقالى كتير بقرقش زلط
وشايف كبارنا عيارهم فلت
حلال الحرام وحلو الغلط
وصاحبنا قاعد وسايق العبط
فجه الاوان
بنرفع ادان
يشق الودان
انا فى الميدان
...
حياتنا بقت زى موتنا تمام
وصاحبك ماسكنا بعصايه ولجام
وعاملى فيها كبير المقام
ربطنا بخوف ..خلقنا فيران
ولا فجر جه ولا صبح بان
عشان كل ده
انا فى الميدان
....
طلبنا وابسط من كده ما تلقيش
لا قلنا نركبله ديل ولا ريش
ولا قلنا ينكش بإبره العريش
طلبنا انه يرحل
ويبقى مفيش
وعملوها قصة وحكاية ومقاله
طلبنا بسيط مهوش استحالة
ما يرحل وياخد فى ايده الزباله
وتبقى حكايته تاريخ من زمان
عشان كل ده انا فى الميدان
عادل موسى
تعليق