تويت
(في ساحة التحرير)
يامصرعدَّى ليلك البارد
يا مصرعدَّى يومك المقهور
حَنِّي الشهيد اللي بيتشاهد
عَبِّي جيوبه أدعية وبخور
النيل عجيب
مشاركش في مظاهرة
النيل عجيب
واقف هناك جنب الميدان
بيبص للثوار
وبيبتسم ويكمل المشوار
وكأنه مطمن لعشاقه
يكتب بخطه يافطة للثوار
ملعون أبو البطاطين
ملعونة كل السراير
من سرير لسرير
ملعونة قعدات الدفا
ملعونة كل التكييفات
المجد للواقفين هناك
في ساحة التحرير
يا مصر
خيرك كتير
يا كُتر سُلابك
طول السنين
والعساكر واقفة على بابك
يا هل ترى بيحرسوكي
ولا متوالسين؟
يا خوفي ليكون حُمَاتك هما نُهَّابك
* * *
تلاتين سنة يا مصر واحنا رخاص
متكتفين بإيدين ولاد أنجاس
مخطوفة مني وقلبي متحني
خايف يغني يخطفه الحُرَّاس
شعر كمال عبد الرحيم
تعليق