تويت
يا مطره-شعر عامي مصري
يا مطره
------------
يا مطره رخي رخي
وادينا قد ما تدي
العطشان عايز ميه
والميه جوا القله
والقله فاضيه فاضيه
والسما فيها غيوم
والغيوم أمال بتزوم
افرجها من فوق يارب
يلي خلقت السما والأرض
-----------------
يا مطره رخي رخي
الجعان عايز غموس
والغموس جوا الصحون
والصحون فيها فتافيت والفتافيت ما بتشبع
والعيال فاتوا لقمه
واللقمه واقفه ف الزو
الأبله عايزه كشكول
والكشكول محتاج شنطه
والشنطه ليها جزمه
والجزمه ناقصه شراب
والغسيل عايز صابون
والصابون عند البقال
والبقال عايز فلوس
والفلوس جوا الجيوب
والجيوب فاضيه فاضيه
افرج يارب الكربه
إدي المحتاج والمحروم
وارحمنا ذل السؤال
-----------
يا مطرا رخي رخي
قالوا :شمسنا بتدفي
والواقف فيها بردان
والليل عندنا بيغطي
والمتغطي بيه قلقان
والنيل فايض بيكفي
أمال ليه دايما عطشان؟
كل غيطنا محروته
والزكايب مربوطه
واحنا بنطير عصافير
سبنا بقي من وجع الراس
الفاضي يعمل قاضي
يعني كلامنا دا بفلوس
المكتوب هو المكتوب
يارتني كنت ظالم
ولا بت يوم مظلوم
-----------------
23/1/2011
نهى رجب محمد
ريشة المطر
تعليق