تويت
(مونودراما) ++++++
هذيان قائد ( الحركة ) بعنوان :
المنظر : غرفة واسعة يظهر بوضوح أنها أعدت خصيصا لعقد الاجتماعات .
تزين الغرفة مقابل الجمهور ، صورة رجل توحي بأنه أحد قادة الحركة المتوفين، أصلع في مركز الرأس وعلى الجانبين بعض الخصلات من الشعر وكأنها تتطاير مع الريح! . إلى جانب الصورة رجل ذو لحية سوداء طويلة، ينظر إلى الأفق.
على الجدار الأيسر: صورة دبابة وقد علق على فواهتها يافطة كتب عليها كلمة "سلام "؟.
على الجدار الأيمن خارطة للكرة الأرضية
يدخل ابن اسحاق يلبس قبعة كتب عليها ـ "في عقل هون" ـ يرتدي قميصا مزينا بصورة حمامة على الصدر . وصورة رشاش على الظهر.. يبرز من تحت قميصه درعا واقيا من الرصاص . ويبدأ الحديث :
الصديقات والأصدقاء الأعزاء ، بعد ما أحييكو .. بدي اقلكو إني دعيتكو عشان أوضحلكو الامور الجوهرية اللي بتميز تجمعنا عن تكتلهم.. احنا في حركتنا بيجمعنا وبيكتلنا معهم عدة شغلات .. ولكنا بنختلف معاهم في التكتكة .. لأننا نعتقد إنو اللي ما بيعرف فن التكتكة .. هو متكتك ( وهو يشير إلى رأسه ) يعني ما في عقل هون .. فإحنا مش مثلهم اللي في قلبهن على راس لسانهن .. هِنِّي مفكرين إنه الصراحة قبضنة.. لا يا حبيبي.. الصراحة مش كياسه.. الصراحة تياسة .. الصراحة بتبعد الراحة .. وهذا ما أثبتته التجارب في كل محل.. وبما إنه أحنا متواجدين في غرفة مغلقة، وما في حدا غريب.. وما في إعلام.. ولا أغيار.. إحنا بنقدر نحكي بصراحة..( يصمت قليلاً ) على شان إكون في عقل هون ( وهو يشير إلى رأسه ) لازم .. الإيد تدبح واللسان يمدح ( وهو يمرر كف يده اليمنى فوق زنده الأيسر ) هذا هو الفن.. هاي القدرة.. هاي الشطارة.. لأنه في نهاية المطاف.. اللي بيعلق في ذهن البشرية.. هو شو احنا بنقول..( وهو يحرك اصبع المشير ) مش شو احنا بنعمل.. يعني احنا نعتقد انه تياسة في السياسة.. نعمل اللي بنقوله.. ونقول اللي نعمله..( ويرفع صوته ) هاي هي القاعدة الأساسية في طريقة عملنا.. وهذا أهم شيء يميزنا عن غيرنا.. مش مهم شو بنقول .. المهم انه رد الفعل لازم يكون حازم.. احنا بنفضل نحكي قليل ونعمل كثير.. لانه المهم هو السطر الأخير..( يرفع قبضة يده ) والامتحان في الميدان (يصمت قليلًا) المزيد من فرض الامر الواقع على الأرض.. بمعنى اخر.. زيادة الاستيطان ( يرفعصوته مجددًا) هذا أكبر برهان، عشان هيك احنا بنقول، أفضل إذا كان القصف الكثيف يرافقه حديث لطيف.. بدها عقل الشغله,, بلاها طولة اللسان .
( يستعمل يده وكأنها مدفع رشاش )
تشو .. تشو .. تشو .. ترررررررررررررررررررررر
( يلوذ خلف الطاولة ثم يطلق النار.. وهو يجلس القرفصاء )
تشو .. تشو .. تشو .. تررررررررررررررر
( يقفز خلف طاولة أخرى ويستمر )
تشو .. تشو .. تشو .. تررررررررر
( يقف ويعود إلى الحديث ) :
ولكن أحسن إذا كان القتل بدون هيزعة.. لازم يكون القتل مع كاتم صوت.. هاي هي المعادلة اللي بنأمَنْ فيها .
( صوت انفجار قنابل )
سامعين.. سامعين.. أنا كنت قائد في الجيش.. ومين بيتقن المهمة أكثر مني؟ بعدين انا أتعلمت لغتة العدو وآدابه، وتاريخ المنطقة عشان اعرف كيف الأعداء مركبين.. ودخلكو شو بده يصير.. كله مش راح يفيد.. رأي عام ( ويشقرق من الضحك.. ثم يستمر في حديثه ) قال رأي عام.. قال.. ( ويصمت قليلا ).. أمم متحدة.. طز.. طزين.. ثلثه.. مظاهرات.. قرارات إدانة ( ويعود إلى الضحك ) دخلك خليهن يتخذوا القرارات اللي بدهن إياها.. ما هي الإدانات لفوق راسنا والمبلول ما بيخاف من الشتا ( يصمت قليلا ويفتح عينيه ) .. آه.. افطنت .. ومين قال راح إكون في هناك إدانة.. ما هو " الفيتو " (وهو يشير إلى جيبه ) في الجيبه.. هون.. هون، تلفون واحد.. حتى بدون تلفون .
( يصمت قليلا ثم يضحك ضحكا متواصلا بشكل هستيري ويعود إلى الحديث )
قال أولاد عمنا إسماعيل بدهن يجتمعو .... طيب ويجتمعو .. وشو عليه .. ما هو لما يجتمعوا بيْعَرِّفونا قديش هِنِّه ضعاف .
( يصمت قليلا ويضع سبابته على رأسه )
إحنا في كل محل في النا ناس.. وشو لزوم التحديات.. لمَّا بتلفون واحد بنخلي كبيرهن يفشل الاجتماع.. هاي الخمة اللي بتجتمعو فيها وبسموها قمه.. بدكوا تشوفوا كيف ؟؟.. طيب (وهو يهز برأسه بلهجة الواثق من نفسه ) .أن شا لله.. يبقيه منور وسيد ع العبيد وتكون خطواتو غايه في الحسن والبركه (وهو يرفع راسه نحو السماء) يااااااا رب.. انصر شعبك المختار لابد الآبدين ودهر الدهرين .
( يتجه نحو الهاتف ، يرفع السماعة وينشغل قليلا واثتاء ذلك يسمع صوت نباح كلب )
- هلو .. يا كبير أولاد عمنا.. أنا ابن إسحاق .
· مين ؟ ارفع صوتك .
- (بصوت عال) ابن إسحاق.
أهلا.. أهلا.. لمن بتحكي معي أرفع صوتك.. كيف الحال .
- مبسوط وكيف انت.. ان شالله تبقى منور وسيد ع العبيد وتكون خطواتك غاية في الحسن والبركه ياااا رب .
* شكراً.. شكرا.. شو بتريد .
- اسمع .. سمعت إنكو بدكو تجتمعو .
* اة صحيح .
- طيب بدنا تفشلولنا اياها.. هاي اللي بتسموها " القمه " .
(يسمع صوت نباح الكلب )
- قلتلك بدنا تفتشلولنا.. هاي اللي بتسموها القمة
* حاضر.. تكرم عينك.. بس ما انت عارف.
- آه .. آه .. ادعو شعبكو للتعقل والتروي وامنحونا الفرص.. فرصة بعد فرصة على بين ما نكون خلصنا.. وتكون الارض بحححححح .
(يسمع صوت نباح الكلب )
*مين انبحح؟
- مالك بطلت تسمع امنيح قلت الارض بحححح .
* مين قح .
- انت كبرت وبدك سماعه.. قصدي بنكون بنينا وفرضنا الأمر الواقع .
* بس بدنا انسبكو ونثقل العيار.
- وماله .. خلي شعبكوا يفش غُلُّه .. أحسن ما يقوم يعمل عليكو انقلاب. ترى انتم الكو تاريخ طويل في الانقلابات.. دير بالك على قفاك إمنيح .
*بدكو تتفهمو ظروفنا.
- احنا متفهمين ظروفكو . عشان هيك احنا بنكون زعلانين إذا ما سبيتو علينا .
(الكلب يواصل النباح )
- عليّ صوتك.. احكي في صوت عالي.
* يا عمي ابعد الكلب.. حتى تسمع امنيح .
- الكلب.. ماله الكلب .
* قلت ابعده حتى تسمع امنيح بكفيش سمعك الثقيل؟
- هذا البرنس
*(بصوت عال) : مين؟
- الكلب اسمه البرنس
* الله يخليلك اياه .
- كان مريض وبعثناه على الخارج يتعالج .
* ايه.. في الخارج.. ليه؟ هذا كلبك مدلل.يمكن جوعان.. شو بتعميه؟
(يستمر الكلب في النباح)
- بطعميه كل يوم دجاجة وكيلو لحمة مع 10 أكواب من الزبادي والمربى؟
* ( باستغراب) الكلب؟
- اه.. الكلب..
* يا زلمي.. كيف هذا ؟ والشعب ميت من الجوع
- انا بالنسبة لي الكلب أفضل من الشعب ؟
* شو هالحكي يا زلمي .
- لانه الشعب من الممكن كل ساعة يخونك.. بينما الكلب لا يمكن أن يخونك .
* ( وبصوت عالٍ ) طيب على كل حال نعود إلى موضوعنا.. لازم شعبكو يسب عشان ينفس.. (يسمع صوت تنفيس).. وششششششششش أحسن ما يفقع ويطيركوا ( وهو يبتسم ) شفت ما ألزَّها الديمقراطية.
* اه ولله لزيزه.. وبدنا نصدر بيانات شجب.
- خلي بيانات الشجب اتلعلع للسحاب ( وهو يرفع يده ) لسابع سما.. عشان الطابق ما يكون مكشوف.. وينك.. ( وبصوت خفيض ) بس بلاش تسبوا علينا من تحت الزنار.. هُمّْ واوا.. دير بالك.. هُمّْ واوا ( وهو يضحك )
* مش سامع امنيح.. قلتلك عليّ صوتك لمن تحكي معي .
- (بصوت عال ) قلتلك بدكو تسبو.. سبو بس بلاش تسبوا علينا من تحت الزنار.. هُمّْ واوا.. دير بالك.. هُمّْ واوا .
* ولا يهمك.. المهم لا حرب بعد اليوم.. وحنا سنفسح لكم المجال.. ونتعامل معكو بوحي من تعاليم السيد المسيح إذا ضربتونا على خدنا الأيسر رح ندير لكم خدنا الأيمن، وإذا دستم على رقابنا رح ننزع أحذيتكم ونقبلها..
- لا يا زلمي أنت كبير القدر.
* انت عارف كل ما تشتد ازمتكو بيجي الفرج من عنا.
- واضح.. واضح
*بس بدي اتسيرو أمور الأولاد في الخارج.. شويه عقارات ترى انتم شاطرين في التجاره .
- شاطرين في كل إشي .
* هاي مش مختلفين عليها، بس مثل ما احنا بنفهمكو على الطاير كمان انتو لازم تفهمونا على الطاير وانت عارف أنا مش مخويل؟!
- مش ايه.. مش فاهم عليك.. شو قصدك؟
* في مثل عنا بقول ثلثين الولد لخالو.. أنا صحيح سميت ابني الثاني على اسم خالي ولكن الولد كمان مش مثل الخال.. الولد كثير شاطر.. فرتيك ..علمناه دكتور في الرياضيات عشان يعرف فن الشفط والهط ويتولى المهمه بعدي،، بعدين.. خالي كان معاكس انا ماشي مثل ما بدكو على المسطره.. لا بزيح هيك.. ولا هيك.. وشو بدكو أحسن من
هيك .
- وأحنا رح نفهمكو في كل اللي بدكو اياه.. حكلي تحكلك.. بدنا تبنولنا جدار حديدي عشان المخربين ما يتسللو من أراضيكم .
*الك يكون جدار فولاذي كمان ومش حديدي .ولكن بعدك بتقول حكلي تحكلك . وكمان بدنا اتقوسولنا اللي عم يتسللو من اراضيكم تيجو يسكنو عنا .
* قوسوهم انتو .
- احنا عمنقتل كفاية من جيرانا ما بدنا انقوس كمان اللي بيجو من دول العالم تيسكنو عنا.. ما بدنا نسود علاقاتنا اكثر .
* طيب بس في عندي طلب.
- احنا رح نعتبرك رئيس حرس الحدود عنا.. عشان هيك رح نخصص لك معاش سري في بنك في سويسرا .
*شكراً.. شكراً .
- وإنتو حصتكو محفوظة.. إنتو ثاني دولة بتاخذ مساعدات .من عند ابن العم سام واحنا راح نطلب من ابن سام يزيدلكو الوراق الخضر.. بس أسمع بتعمل لي حصه.. مثل ما بتعمل مع اولادك بتحمل قسم على حسابي البنوك في أوروبا .
*حاضر.. حاضر بس آه.. آه.. آه..انا قصدي.. آة..آه .
- احكي يا زلمي شو السيره.. شو بدك صبغة لشعرك.. ولا طقم اسنان.. ولا صبغة وكمان وطقم اسنان؟
* بدنا انزبط الحساب .
- أي حساب؟ قلنا انتو ثاني دولة بتاخذ مساعدات من ابن العم سام .
* خليهم يبحبحوها وحنا بنشيل 5% الكو من تحت الطاوله.. 5% لحساب الأسره ..انت عارف احنا ماشين مثل ما بدكو على المسطره.
- قديش عدم المؤاخذه وصل حساب الأسرة .
* شو بدكم تعرفوا لبيضه مين باضها .
- اه
* 70 مليار ورقه خضره.. ارتحت؟
- (يصفر ويأخذ بهز كف يده اليمنى بسرعة) لا يا زلمي ما بصير يكون هيك حسابك وشعبك ميت من الجوع .
*بكره لمن يصير الحساب 100 مليادر بنوقف الشعله .
*(ويغني مازحا)
دمرتم لبنان.. دمرتم لبنان.. وضيعنا فلسطين
وأنا وأنت يا حبيبي سالميييين
عقارات في أمريكا..ارصده في وأوروبا وصناعات في الصييييين .
- (يكمل ابن اسحاق) وسحبنا من الرحم الأم الجنين
وفرحنا من اللون الأحمر الجاري وطربنا ع صوت الأنيييين .
* (يرد ) وزدنا الأرصده، من ملياردات وملايين
وأنا وانت يا حبيبي سالميييين.
- (وهو يضحك) دمرنا لبنان.. دمرنا لبنان وضيعتم فلسطين
لا يهنأ لنا عيش بدون القتل حتى المختبئين في الملاجئ امنين
وزاد شوقي الك والحنين
انت الحُسن.. انت البركة.. انت النور وسيد الحلوين
- ( ويشقرق من الضحك ) كيف محسوبك بتقن لغتكو امنيح .
* ولله ما انت قليل .
- اسمع.. بدي قلك شغله.. بكره بعملو عليك انقلاب .. احنا فكرنا حالنا طماعين طلعت اطمع منا.
* صار لي 30 سنه مهيص على ظهور الشعب ولا حدا حكى انتو ما تسربو المعلومات وانا بالف خير .
- شو هلحكي يا زلمي؟
* انا بعرفكو.. بكرا إذا ما مشيت مثل ما بدكو على المسطره بتسربو المعلومات .
- اه حلوه هاي اللي ع المسطره.. خليك ماشي على المسظره وحنا وانت بالف خير.احنا على زمان خالك اللي كان مغلبنا دبرنا حالنا اشترينا زوج ابنته وكان يوصلنا كل شارده وكل وارده .. كل حركة كانت كبيره أو صغيره.. وعلى سيرة المسطره.. بدنا الغاز بدون ثمن.
* كيف يعني ؟
- مثل ما انت سامع .
* هيك بتكون فضيحه وعليها شهود.. خليها بسعر التكلفه وبنقول هاي صفقه ضمن اتفاقية السلام وحنا مثل ما حكينا لازم واحدنا يفهم الثاني على الطاير.
- طيب موافقينا .
* وبالمقابل.. ( وتظهر علية علامات الارتباك ) ايه.. ايه.. ايه .
- (باستغراب) ما لك يا زلمي ليش انعقد لسانك احكي يا زلمي.. احكي ما في بيناتنا سر .
* ايه.. ايه.. ايه .
- قول يا زلمي ما تستحيش..ما في سر بيناتنا .
* سوسو ختيرت .
- مش فاهم عليك
* ايه.. ايه.. اية
- قول يا زلمي وما تستحيش.
* انا بعدها نفسي خضره بدي وحده.. طويله.. شقرا.. وعنيها زرق ووسط .
- ايه ؟؟.. ( يفتح عينيه استغرابا ) ايه ؟؟ .. طويلة .. شقرا وعينيها زرق .. وسط .. شو يعني وسط ؟؟
* يعني لا ناصحة ولا ضعيفة .
- .. فهمت .. فهمت .
*والدرات ناصحات .
- (يفتح عينيه ) الدِّرِّات؟؟ .. شو يعني الدِّرِّات ؟؟
* الصِّدِر ؟؟
- (يجفل ثم يقوم بحركات موحية )
* والاوراك بدي اياهن كمان ناصحات .
- ( يفتح عينيه ويفغر فاه ) أنعم وأكرم.. طيب.. طيب.. خلص .. شقرا.. عينيها زرق.. لا ناصحة ولا ضعيفة.. الصِّدِر مليان.. والوراك ناصحات.. إِلَكْ إتكون أحلى من ملكة جمال العالم .
- اتفقنا ؟؟ .
* اتفقنا.. سلم على كل الأخوة المعتدلين.. آه .. لولا شوية انسيت أقلك.. نسيتني من كثر طلباتك.. بدنا نحضِّر لمؤتمر ضد الإرهاب..وبدنا يكون عندكو.. في واحة الصحرا .
- بس..
* إنت اعمل اللي بنقلك عليه واحنا مش راح نقصر معاكو .
- اتفقنا.. يللا باي .
* استنا شوي.. شو باي..في بعد امور بدنا اياك تعملها
- شو هي؟
* ( بصوت خفيض ومتقطع ) بدنا.. في ليلة عيد الميلاد.. تنسفو كنيسه.. على المصلين.. عشان.. نتهم المحاصرين بعد ما تكونو اقمتو الجدار.. شو قلتلي بنسمية الجدار الفولاذي بدل الجدار الحديدي.. بنتهم المحاصرين بحفر خندق تحت الأرض، وتهريب الأسلحة والذهاب لتفجير الكنيسه..( ويرفع صوته قليلًا) وهاي العمليهفيها افاده.. للطرفين.. النا والكو.. احنا نقدم تبرير للعالم.. حول استعمال الأسلحه المحرمه دولياً ومحاصرة وتجويع المحاصرين.. وانتو بتظهروا مدافعين عن الجماعة ضد التطرف والإرهاب .
- ولله فكرتك فكره.. من فين بتجيب هاي الافكار..
* ولك احنا اخلقنا قبل ابليس بساعه .
- هاي بشهدلكو فيها.. فعلاً إحنا لازم نلهي الشعب حتى تتحول انظارو ونقدر نسيطر على الامور إلى الابد .
* بس دير بالك (بصوت خفيض) هاي الأمور بدها تخطيط وحذر كثير.. فهمان .
- طبعاً.. ولا يهمك عندي وزير داخلية كان لازم يخلق عندكو.. بعرف كيف ازبط الشغلة.. شو إحنا اولاد؟
* طيب يالله.. لا تنس.. سلم على كل الإخوة المعتدلين..
- تسلم
* الله يسلمك
- قلتلي كيف صحت سوسو؟
* وضعها ثابت.
-طيب..إلى اللقاء.
( يقفل السماعة ثم يتجه إلى الجمهور بلغة تدل على الثقة بالنفس والاستعلاء )
شايفين..( يرفع قبضة يده ويهزها ) كل إشي لازم يمرق من هون ( وهو يضع يده على خاصرته ) من تحت باطي .. كل إشي لازم يمرق من بوابتنا.. والكل لازم يرقص على دربكتنا.. ( ويتمايل )مثل جايزة نوبل بأشكالها وألوانها - السلام – الادب – العلوم – وغيره وغيره .. ما هو احنا مسيطرين عليها والقرار بيدنا.. شوفتو كيف "محفوظهن" اللي عاملوه قد الدنيا .. ما حصل على الجايزة ولا كان بيشمها قبل ما رضي عنه "سومخنا".. وكان مستنيها درويشهن.. قالنا له يستنكر قصيدتو.. في البداية رفض.. ولَمَّنْ رجَّعناه اتلكع ولَنَّها.. ولكن لَمَّا شاف فيش فايدة إلا غير يفوت من بوابتنا.. رِجِع وتجاوب معنا.. وخلينه يصير اروح سكي مكي لهون.. لعند أهله ويتجول ع السكت لوين بدو.. احنا بنعرف كيف اولاد عمنا مركَّبين.. ومحسوبكو كان ضابط في المخابرات.. وهناك تعلمت لغتهن.. وتعلمنا لهجاتهن.. عندهن مِيتْ لهجة، في قرى المثلث.. بيقولوا عن الكوكا كولا " تشوتشا تشولا ".. وتعلمنا حتى أغانيهن.. كلها بكبكة وتنويح.. اعطف علي وارحمني من قسوة قلبك.. (وكأنه يبكي ) وأنا وهم.. أنا سراااااااب.. وأنا من ضيع في الأوهام عمره .. وتعلمنا أمثالهن الشعبية.. هناك المهزله.. يا حبيبي.. هناك.. قال.. بوس الكلب.. قال بوس الكلب..هههههه.. بوس الكلب من ثِمُّو تتنول حاجتك مِنُّو.. هههههه.. أمثال كلها تدعو إلى الاحباط.. قال.. الكف ما بيلاطم مخرز.. والايد اللي ما بتقدر عليها بوسها وادعي عليها بالكسر.. ههههههه.كله بوس.. بوس الكلب.. وبوس الايد.. وِلاَّ هذا المثل اللي بيقول.. الباب اللي بيجيك مِنُّو الريح سِدُّو واستريح.. وتعلمنا تراثهن عشان نعرف كيف هِنِّي مْرَكَّبين.. وْيِسْهَل علينا سحقهن.. احنا لازم نعرف كل واردة وكل شاردة.. لأنُّو كل ما اجتمعت مع عشرة منهن بتلاقي فيهن أربع شعراء.. قال هؤلاء مبدعين ههههه مش عارف انا شو مالي اليوم غلب عليّ الضحك قال مبدعين.. ما بعرفو يصنعو ابره.. أوراق يمسحو فيها.. وقال مبدعين قال: قفا نبكي ( ويشقرق من الضحك) ههههههه.. في المخابرات من المفروض تعرف تدبِّر حالك.. والشغلة بدها موهبة خارقة.. مش كل واحد يقدر عليها.. بدكو تسمعو أغاني من نظمي مستمدة من تراثهن الشعبي ؟؟..( يصمت قليلًا ) طيب ( يتناول دربكة ويجلس ثم يبدأ بالنقر والغناء ) :
على دلعونا على دلعونا
على دلعونا على دلعونا
بدنا ندهكهم بدنا نسحقهم
نقلع ونخرب شجر الزيتونا
راح نذبح كل اللي بيكرهونا
بدنا نمحقهم ونشرش هونا
توه .. هلا .. هلا .. هلا .
( يقف ويخرج مسدسه ويطلق النار ، ثم يعيد المسدس إلى مكانه . يصمت قليلا ثم يتوجه إلى الجمهور ) :
طيب يا جماعة.. قولوا الحق.. هاي اللعبة بيقدرو جماعة التكتل عليها ؟؟ .
( يصمت مرة أخرى ) :
إذا احنا ما أتقنا اللعبة..(يهز برأسه) كيف بدنا ننسجم معهن ونحاربهن من جُوَّه .( يجفل ) آه.. وعدت كبيرهن أتوسط له عند ابن سام .
( يتوجه نحو الهاتف ينشغل قليلا ) :
· هلو .. ابن اسحاق بيحكي..كيف الحال.. كل إشي تمام ؟؟ .
- على كيف كيفك .
* بدنا تزودو الوراق الخضر اللي بتبعثوهن لكبير أولاد عمنا.. الزلمي امنور علينا وقادر يعمل على شعبو سيد وخطواتو كلها حسنه ومباركي.
- الحاله إسا مش كثير منيحه .
* أي حاله؟.. (يرفع صوته) يا زلمي من ذيلو عملو شباق.. يعني قلهن يرخصو ذهباتهن السود .
- انت شو دخلك؟
* كيف شو دخلنا ؟؟.. ما احنا في تحالف استراتيجي.. وولادنا أولادكو.. وولادكو أولادنا.. بعدين العم سام كان صاحبنا.. وانتو ما بتخالفو التقاليد.. احنا الولاية ال53.. ولو.. شو انسيت؟؟.. الانتخابات على الطريق.. انت فاهم علي.. الانتخابات على الطريق.
- شو بتهدد؟.
*لا يا زلمي .. ليش رحت بعيد؟؟.. قصدي لازم واحدنا يفهم الثاني على الطاير.. الزلمي مش بطال.. عمبتجاوب معنا.. وبيقول 99% من أوراق اللعبة معاكو.. يعني ناقص بس أقول .. لا إله إلا أنتم.. بعدين ما انت عارف البراطيل بتفك الشراويل .
- احنا لازم انشن حمله صليبية على بلاد الرافدين حتى انسيطر على منابع الذهب الأسود هناك..ولازم هني أنفسهن أساعدونا على قتل انفسهن لانو الله أخطأ لَمَّن خلقهن فوق الأرض.. وخلق الذهب الأسود تحتها.
* أيوة على هذا ما في نقاش..( وهو يضحك ) شو كان صار لو جدي ما خلفهن.. وصارت كل المنطقة إلنا.. ولاَّ لو كان مات قبل ما خلَّف هالخلفة النجسة ؟؟
- دير بالك لازم مرات نعمل حالنا مختلفين عشان نزبط اللعبة
*( يعاود الضحك ) اسمع.. انسيت أقلك.. قال هذا ابن عمي .. بدو وحدة.. شقرا.. طويلة.. عينيها زرق.. لا ناصحة ولا ضعيفة.. قال وعندها دِرِّي.. مثل ما قال.. يعني ناصحة في الصِّدِر.. ( ويلهث ) اه اه اه اه.. وبدو اياها أوراكها ناصحات كمان ( ويشقرق من الضحك )
- طيب.. طيب.. المهم انتم مش لازم يكون الكو دور لمن انشن حرب على بلاد الرافدين لأننا سنقنعهم ونجبرهم يحاربوا نفسهم . وإذ تحركتم تفشل الخطه .
* طيب ما بصير إلا مثل ما بدك.
- طيب يالله باي .
( يجلس وهو يتأفف ) :
أفففففففف.. والله تعبنا.. ولكن في النهاية أقنعناهن.. رغم إنهن مقتنعين.. بس بدهن يتغندرو علينا.. هاي بتمشي علينا!!.. يله مش مهم .. شايفين كيف بالهداوه.. كل إشي بصير مثل ما بدنا ؟؟ .
( صوت ينطلق ، ينظر إلى أقصى القاعة ) :
ما لك إنت هناك.. شو مش عاجبك ؟؟.. احنا مش مثلكو.. ما فيكو غير الجعجعة.. مثل الضفادع .. صغار وصوتكو كبير .
( يعود ويظهر بعض الانزعاج ، ثم يشير إلى أقصى القاعة ) :
طلع ضفدع من المستنقع يقعقع .. قع .. قع .. قع .. إنتو في الوسيعة بتكبروا في كلامكو.. لأنكم مش في موقع المسؤولية.. شفناكو لَمَّن كنتو في موقع المسؤولية كيف ورطتونا ( وهو يشير بابهامه إلى أسفل ) قطعتو علينا تحقيق حلمنا وهدفنا الكبير.. والله لو وقفت علينا.. غير انمدها من النهر للنهر.. مثل ما هو مرسوم في العلم .. الخطين الزرق فوق وتحت النجمة منرسموش على الفاضي.. ( يقف ثم يشعل سيجارة )
والله الحياة صعبة .
( يصمت قليلا ثم يسترسل في الحديث )..دخلكو وليه ما نمدها ؟؟.. احنا أولاد عم . وجدنا واحد.. يعني احنا إخوة.. وكل الشرائع بتقول الإخوة لازم يتقاسمو الورثه.. وإحنا ما بدنا نتقاسم معهم كل إشي.. إحنا ما بدنا نتقاسم معهم بالتساوي.. إحنا مش طماعين.. إحنا بدنا من النهر للنهر.. لا غير.. وها شو بتشكل نسبة مئوية من الأرضيات؟؟.. ( وهو يشير إلى الخارطة ) اطلعوا على الخارطة.. اطلعو إمنيح.. أقل من عشره في الميه من المساحة المذكورة.. يعني اثنين ثلاثه سانطي عالخارطه,, وثنين ثلاثة سانطي هاي أقل من واحد في الميه من مساحة الكره الارضيه.. آه شو يعني أكثير علينا هذا؟.. قولو الحق.. إحنا اتعذبنا وتغلبنا وتقهقرنا وتشحشرنا وتمرمرنا.. يعني حرام انعيش يومين حلوين؟.. بعدين صحيح إحنا بدنا انقسمهن عالمي.. المي الله خلقها للجميع.. إحنا بدنا المي وما بدنا إنقسمهن عالذهبات السود.. ذهباتهن السود خليهن لبعدين.. أول إشي خلينا نخلص من مشكلة المي، ناخذ فترة استراحة وبعدين الحساب على الذهب الأسود (يتأفف ) اففففف .
( يصمت قليلاً وهو يدير ناظريه ثم يعود إلى الحديث )
منافسينا على الحكم ورطونا.. وصلونا لنص البير وصارو يزاودو علينا.. صارو يدعو انه هنه اللي نطو.. وهنه اللي حطو,, والحقيقه هي إنه هنه اللي جربو.. وهنه اللي خربو.. وهنه اللي بخو.. وهنه اللي .....(يفتح عينيه وهو يغلق أنفه) بعيد السامعين.. قال بحكو عالقادمين الجدد بذّعو انه في عهدهن ازداد القادمين.. وكأن القادمين بطلو يجو في عهدنا.. كم مره بدنا نشرح انه ما في حاجه للشوشره.. يعني إذا جبناهم ع السكت هذا مش إمنيح؟! إحنا بدنا ناكل عنب ولا نقاتل الناطور؟.. بعدين شو بعد في أراضي عند اولاد عمنا هون؟.. ما هو شفطناها كلها ولعنا طولها ولعنا عرضها.. وكمان هون هنه اللي خربو الطابق.. مين اللي فرض ضرائب على الاراضي اللي بقت عند اولاد عمنا ومين اللي الغاها.. مين اللي صوت مع اولاد عمنا اللي عنا في "البيت".. ها.. قولوا الحق.. كمان عميحكو ويتشدقو في إنياعهن.. كل الوقت إحنا بنحرث وهنه بركو.. صابنا فيهن مثل حراث الجمال.. وبعدين خلينا نرجع لورا.. لورا.. مين اللي حط القنابل ونسف الكنيس على المصلين قبل ما نيجي لهون ونشلش امنيح؟ ويطلعلنا قرون، عشان يجو جمعتنا لهون من بلاد بين النهرين.. كانو جماعتنا عايشين امنيح هناك ومسيطرين على الأسواق وما بدهم يجو لهون فقمنا بنسف الكنيس عليهم عشان نقول العرب بدهم يقتلونا ونجحت الخطة وكلهم اجو.. وفي منطقة الجنوب كان بدنا مبرر عشان نسيطر على المنطقة فقمنا بنسف الباص اللي محمل اولادنا.. صحيح اخسرنا كمن ولد ولكن كسبنا الأرض لابد الآبدين.. ومين بجهل زعيم سابق في حزبنا اللي اتعاون مع الخنزير في قتل جمعتنا في هنغاريا حتى نصور لشعبنا انه في خطر الإبادة.. كله عشان نيجي لهون..(ويصرخ) فتحو عنيكو امنيح.. مثل هاي الأمور ما بتخطر على بال أخونا إبليس.. (ثم يشير إلى رأسه ) هاي بدها ناس في عقل هون.. المشكلة انه هنه كل أشي بنسبوه الهن.. قال فرقة " الحصادة " هنه اللي أقموها.. قلولي مين حصد أكثر في كل محل.. مين اللي حط "اللبان" في السماعات.. بدهن يحكو ولا يخلو الطابق مستور.. طيب مين اللي نسف مدرسة "يم الثيران" على راس الاولاد عشان معنوية الشعب هناك تنهار وسعتها اذبح مثل ما بدك":
وطاب شرب الدم.. طاب من الصبح للغياب
(يتناول زجاجة مشروب باللون الأحمر ويرفع رأسه ويشرب، ثم ينزل الزجاجة ويضعها على الطاولة ، ثم يمسح فمه بكم القميص ويسترسل في الحديث )
بدي اقلكو اشي.. أنا وحدي قتلت من أولاد عمنا أكثر مما قتلو منا اولاد عمنا مجتمعين ( يسمع صوت استنكار خافت ).. ايه.. مين قال هذا عمل غير إنساني.. ليش في الحرب في.. أما أبا.. لا يا حبيبي (بلهجة ساخرة) في الحرب ما في.. أما أبا.. في الحرب ( يصمت قليلا ثم يشير بإصبعه الوسطى ) في بعبيص للجعاميص.. في غم .. في هم.. في سم.. في دم .. تعالو نقارن شو هنه عملو مقابل شوا حنا اعملنا ( يصمت قليلاً ) بما انه الحديث على الصعيد الشخصي وعلى الصعيد العام.. أنا بدي اقلكم اني كنت أأمر الضباط يأخرو نساء اولاد عمنا الحوامل على الحواجز عشان أطرّحو ( ويطلق مسبة) أحسن واحد فيهن.. أما على الصعيد العام في الأحزاب، فمين قلع شجر زيتون أكثر؟..قلولي.. مين في الحرق كان أقدر؟..( وهو يقوم بحركة موحية وكأنه يذبح) في الكخ معمع.. مين كان أشطر؟.. مين دلق الزيوت؟.. مين منع القوت؟.. مين هدم البيوت؟.. مين كسر العظام؟.. مين أثبت جبروت؟.. هنه بتبجحو وبقولو كمان احنا قتلنا في المخيمات وشربنا دم.. أي شو هنه قتلو هناك.. ثلث اربع تلاف.. ثلث اربع تلاف هنه حرزانات؟.. اه .. فطنت.. بيني وبنكم هذلول اللي قتلوهن وتبهدلنا عشانهن دخلناهن في دعايتنا الانتخابية عشان انخوف اولاد عمنا اللي عنا .. يعني زي ما تقول سياسه.. مش تياسه.. وهاي مناسبه انه أحنا لازم نربح في الانتخابات لأنه الكل بعرف مدى تضحياتنا من أجل الوطن.. أنا خضت كل الحروب وانتصرت فيها لاني شخصية خزرماتيه (ينظر إلى الشمال واليمين) بدي احدثكم عن احدى المعارك لمن قمنا بقتل الاهالي.. كانو الاولاد مروحين من صفوف البساتين قالي أحد الضباط شو بدنا نعمل في الاولاد.. قلتله اقتلهن.. قلي حرام اولاد اصغار,, قلتلو - اق تل هن - قوام.. مثل نسوم الريح.. في الحروب ما في عواطف.. إذا بدنا اندور ورا العواطف أكثير انتصرنا.. بعدين هذلول الاولاد بدهن يكبرو وشو بدو يكون موقفهن بعد ما شافو كيف قتلنا اهاليهن.. رح يعيشو مع حلمهم المرعب يصيرو مخربين بالتاكيد ( يصمت قليلاً ويتأفف) افففففف.. ومين ضحى أكثر مني؟ بدي اسمع جواب.. ليه الكل ساكتين؟ (ويرفع صوته) أنا لازم اربح.. أنا لازم أربح وانتم لازم تقدرو تضحياتي.. مش معقول أنا أخوض كل الحروب واخاطر في حياتي وانتصر.. ولمن اخوض المعركة الانتخابية أخسر( ينظر يمينا وشمالا ويكمل ) ولله أنا مش فاهم واحدهن سخل وعامل حاله فحل.. راحو غرزونا تحت الارزات ثمنطعشر سنه ولولا ما نكون قد حالنا كنا بعدنا املبطين.. شو إحنا لازم نقتل وننقتل؟ لا .. لا يا حبيبي.. أحنا لازم نقتل ميت الف وما ينجرح ( وهو يشير إلى اصبعه ) اصبع واحد منا.. بعدين لمن أحنا بنقدر نقصف من فوق وقت ما بدنا بدون حارج أو بواب لليش انورط حالنا على الارض ( يصمت قليلاً ثم يتناول ماسورة مبيد للحشرات ) اسمع يا ابن عمي الصرصور بدك تفوت على القنينة وتصير تدور ولا بدك اتخليني اثور؟ ( ثم يرش) وشت.. وشت .. وشت.. مين عميقتل أكثر؟ قلولي وخليني أسمع.. قلوها بصوت عالي.. خلينا نعمل احصاء.. مين قتل أكثر.. قديش قتلو لمن حكمو.. وقديش احنا قتلنا لمن حكمنا؟ أي وحياتكو والحكي جد.. في هاي المسألة بالذات ما بيجو نقطة في بحرنا.. شو بدهن اكثر من هيك؟ احنا انزلنا على جيرانا بالمروحيات والدبابات.. كنا نستغل رمي حصوه عشان نوجد مبرر للخبط من فوق.. ولمن ما كان حدا يرمي حصوه كنا نبعث فرقة الحصاده عشان يرمو الحصو تنلاقي مبرر نقتل الأطفال قبل ما يكبرو.. (هو يشير إلى رأسه ) هاي بدها يكون في عقل هون.. خلينا نكون واضحين.. بعدين لمن احنا نقدر نقتل من فوق بدون ما حدا يدري.. لليش الشوشره أحنا لمن بنقدر نقصف من فوق بالصواريخ السرطانية.. بنضربهن اليوم وبعد كمن سنه بمرضو وبموتو ليش نقتل مباشرة ونتحمل البهدله والصحافة وجاي يا غلمان جاي.. الشغله بدها حبكه فنيه.. بدها تكتكة..(وهو يشير إلى رأسه) بدها يكون في عقل هون.. أي ولله ومالكو عليّ يمين.. اللي بتقتلة فرقة الحصاده اللي اسسوها وخليناها عايشه بطلعو فراطه مقابل اللي بنقتلو على طريقتنا ( يرفع صوته وهو يشير إلى رأسه).. لكان في عقل هون.. يا عمي اليوم في تكنولوجيا.. كلها كبست زر.. ما في حاجة للمشاه.. من فوق دب كم طن ورجع من دون ما تخاطر في نفسك.. أي هنه حكمو كمن سنه خففو المخابرات ليش؟ كنا عارفين كيف نخلف اولاد عمنا ونفرقهن عن بعضهن البعض ولكن لمن خففو المخابرات رفعو اولاد عمنا راسهن ( ويرفع صوته) اولاد عمنا لازم اموتو على السكت.. لازم اموتو بدون انين.. لازم لمن نضربهن يقولو اح.. مش اخ.. اخ هذا تطرف.. كمان لمن نقتلهن ممنوع يصورو الجنازات لانو هذا عمل ارهابي خطير.. اولاد عمنا لازم لمن نذبحهن يقولو دير بالك يا سيدي تجرح ايدك.. والفرق بينا وبينهن احنا قبل ما نذبح بنسن السكين وشختي وحده.. يعني ذبح حلال.. شو يعني مش حرام.. اسألو ابو طقيه.. حلال ولا حرام.. لازم الذبح شختي واحده ( وهو يرفع يده اليسرى حتى الوسط ويمرر كفهالأيمن فوق زنده).. بعدين بدهن نعمل في اولاد عمنا مثل ما عمل فينا الخنزير.. لا.. لا هاي ارواح الله خلقها مش لازم نعمل منهن صابونه ( يلتفت نحو الجمهور) شو ما اسمعت امنيح.. مين قال انو اولاد عمنا بدهن يتفقو.. كلام فاضي.. انتو شفتو مقدرتي حكيت مع كبيرهن عشان يفشل الاجتماع.. وكل الاتهامات اللي بتقول انو بدنا نعمل سلام معهن اتهامات كذابه.. احنا عارفين انو السلام بجيب اخرتنا..بناكل بعضنا البعض.. ولكن احنا مجبورين امام الرأي العام نظهر وكاننا بدنا سلام.. لا سلام ولا حمام هاي هي الحقيقه ( يستدير ويشير إلى ظهره) بس شو اللي بدكو اياه انقول هذا الكلام قدام العالم.. هذا ما بصير أحنا اتعلمنا اصول اللعبه امنيح.. وانا مثل ما قلت اتعلمت لغتهم وادبهم وتاريخ المنطقه عشان اعرف كيف عقليتهن مركبه لازم تعرف لغة عدوك عشان تعرف كيف اتحاربو وتنتصر عليه .. قصة السلام للاستهلاك الاعلامي.. بعدين وين الحمام؟ ما كله دجناه.. في الوسيعة خليهن يطيرو مثل ما بدهن.. خليهن يحلقو في العلالي.. المهم وقت الحزي واللزي بهدو وكل واحد بعرف دوره ( يرش قليلا من القمح ) تيعه..تيعه تيعه.. شفتو لمن دهكنا اولاد عمنا ولا واحد فتح نيعه.. في الوسيعه احنا بنقلهن يحكو ويطيرو.. ويعلو.. ويصرخو.. ويعنو كمان، في لغتهن ويغني:
طير وعلي يا حمام.. طير وعلي يا حمام
قوس واقتل عالدوام.. عيشتهم ولله حرام
طير وهدي بارض الشام.. وجبلي اخبارهم هالدوام
طير وهدي عبيروت.. حتى نعرف كيف انفوت
طير وهدي ع عمان.. وبوسلي ملك الزمان
طير وهدي يا حمام.. ع مصر وهد السلام
لكبير أولاد العم .. نشفلي من عروقو الدم
ما تنساش الوصيه خلصنا من القضيه
(يتوقف عن الغناء والسحج )
لكان؟.. لازم يكون في عقل هون (هو يشير إلى رأسه ) مرة قال أبو حاجب اللي قد الشبر لمن كانو حاكمين: " بدنا نفاوض ميت سنه" طيب بلكي تحولت الميت سنه لعشر سنين.. مثل ما حولنا الميت ليرة لعشر شواقل ، شو بنكون عملنا؟ بنكون تورطنا ورطه ما الها اول ولا الها اخر.. عشان هيك لازم نفاوض الف سنه؟؟ لازم كل ما تترقع نمزعها.. بنقول في اللحظه الاخيره _ ما في شريك _ لانه السلام مثل ما قلنا.. مناقض لاهدافنا.. ما انتو عارفين علم اليقين انه إذا كان في سلام مناكل بعضنا البعض؟؟ خلينا نكون صريحين يا جماعه.. الواحد يقعد أعوج ويحكي صحيح.. يعني احنا بلا ما ناخذ العصفور وخيطو ما بنشبع.. وبلا ما ناكل البيض وقشره.. والحله والحلال ما بنقنع.. وهاي واضحه مثل عين الشمس ليش نضحك على بعضنا.. في حد بقدر ينكر؟.. في حد بقدر يقول هذا مش صحيح ( يصمت قليلا ) ها سمعوني.. عشان هيك إذا ما كان هناك عدو لازم نخلق عدو حتى نقدر نتكتل.. لازم أكون في عقل هون ( وهو يشير إلى رأسه ) ولله لو بس تهدولنا بال شوي.. منا كلهن كشناهن.. في عنا مخطط جاهز لقلعهن من هون.. بس راح تيس منا كشف المخطط.. ولكن في ليله ما فيها ضي قمر.. هيك يكون العالم مشغول في ماساة كبيره.. زلزال.. بركان كبير(يغمض عينيه ويستسلم لأحلامه ) انفجارات نوويه.. أو ذريه.. ونبقى لوحدنا على وجه الارض .. والوديان جاري حمرا.. (ثم يرفع صوته) وطاب شرب الدم.. طاب( وبصوت حالم ) لا.. لا.. لا..لازم يبقى شوية بشر لانه إحنا بحاجة لخدام ( يستيقظ على صوت الانفجارات وينهض مسرعا ثم يفتح عينيه ويتحدث بلهجة استغراب ) يا الله ما أحلى هالحلم.. خسارة انه انتهى بسرعه.. وين صرنا يا جماعه .. وين.. وين ( يتوقف ) افففففففف.. اه.. قلنا انه تيس منا كشف المخطط فاجلنا التنفيذ.. ولكن مثل ما قلنا.. في ليله ما فيها ضي قمر والعالم مشغول في مأساه كبرى زلازل.. براكين.. اخ ما الزها هاي..( ويغمض عينيه وهو يصر على أسنانه ) بس ونته بدها تكون ونستغل الفرصه ونكشهن.. كش.. كش.. كش..اي يخلف علينا إذا كشناهن وما ذبحناهن.. انتو مفكرينها صعبه.. انا بحب اطمنكم.. المهمه مش صعبه لانه اولاد اللي عنا، مثل الأرانب بخلفو كثير وبخافو كثير.. اطلعو شو بنعمل فيهن في الانتخابات.. مثل الخاتم في اصبعنا.. بغضو النظر عن افعالنا على امل انه انحقق طروحاتنا النظريه الاعلاميه.. ولكن بعيده عن اسنانهن.. احنا بنخوفهن وبعدين نعتذر.. ومره ثاني نعود ونخوفهن ونعتذر.. وهيك بنخلق جو من البلبله.. يعني بنبلبلهن وبنوعدهن انخلصهن من البلبله.. وهيك بعيشو على امل انهن يقدرو يذرو.. فنوعدهن بتأمين الغطاء ولكن بعد الانتخابات بنتركهن مزلبطين ( ويشير بإصبعه الوسطى ) هذا بنعطيهن.. ليش لازم نعطيهن عشان يشرشو في الارض؟.. ما انتم عارفين هدفنا النهائي على المدى وان شاء الله يكون قريب ( صمت قليلاً) اقلكم أشي.. حنا كل ما قتلنا منهن كل ما صوتولنا انتو شفتو في الانتخابات الاخيره.. لازم انقوس منهن اكثر واكثر.. هذلول اللي في احزابنا تعتيع.. بنعطيهن شوية مصاري عشان اجبولنا اصوات اهاليهن.. (ويقوم بحركة تعبر عن اشمئزازه) ممنوع نعطيهن حقوقهن.. لازم انخليهن خايفين وجوعنين لانو إذا اعطيناهن وصار عندهن مصالح يعيشو منها وصار عندهن اقتصاد مستقل ببطلو بحاجه النا.. لا يا حبيبي لازم نبقى صرامينا على رقابهن.. المثل قال "جوع كلبك بلحقك "..بعدين لكل إشي الو ابعاد.. يعني إذا اعطناهن يتوسعو ويشقو شوارع جديده ويزفتوها رح نخسر كثر.. عشان هيك لازم تبقى الحفر في الشوارع لانه لهاي الحفر في فوائد كثيره. بتبقي حلقات العمل دايمه في كل محل ( يصمت قليلاً ثم يكمل وهو يبتسم) لان الحفر بتأدي لخراب في السيارات، وخاصه في اطاراتها وكابح الارتجاجات,, والتفافيح.. وقواعد المحرك والغيارات البلاستكيه.. وكمان بتأدي لتفكك مرابط الاسلاك الكهربائية والى حرق الاضواء.. ومش عارف ايه.. سامحوني إذا كانت معلوماتي الميكانيكيه ضعيفة.. والواحد بقدرش يفهم منيح في كل إشي.. ولكن المهم هو انه بتخلي اصحاب الكراجات يستفيدو.. صحيح انه مثل ما قالو" مصائب قوم عند قوم مصائب.. ولكن هون المصيبه فرديه.. بتقتصر على صاحب السياره.. بينما الفوائد هناك شامله من الممكن يستفيد منها ( ويمثل وكانه يسوق سيارة ) فم.. فم.. فم.. بيب.. بيب.. اخ ظهري ( يتحسس ظهره ) شو صابني من كثر الطجطجه..اخ ظهري.. هاي الطجطجه بتأدي لتصادم الاطلاع.. هذا اللي بسموه دسك ( ويصر على أسنانه ويعود ليتحسس ظهره) شايفين كمان هون بتستفيد صناديق المرضى والمستشفيات على اختلافها.. الاطباء.. الممرضين.. الممرضات.. وهيك بتجعل المهنه مطلوبه.. وكمان هاي الحفر بتقلص البطاله في القرى وهذه بدورها بتقلص الجريمه بكل فروعها وانواعها..السرقه.. المخدرات.. القتل.. وكل إشي.. كمان هذا بفيد اصحاب قطع الغيار في كل محل حتى انه الفايده بتوصل للشرك المنتحه للسيارات في الخارج وهيك بتتعزز العلاقات الانسانيه بين البشر.. كمان هون في الدوله.. مكاتب الجمارك والقيمه الاضافيه وضريبة الدخل.. وهذا بعود على الدوله ككل بالفائده الكبيره وبعزز اقتصادها.. وهيك كل المؤسسات بتصير اتعج في النشاطات والحركه وهذا بدفعها لاجراء الحسابات اللي بدفعهن لشراء اجهزة الحاسوب .. وشو بدي اعد لاعد.. هاي الحفر اللي بنخليها في وسطهن الها ايجابيات بعجز العقل عن استيعابها .. ونسيت اقلكو.. كمان اصحاب الشاحنات الجر مستفيدين من الحفر وهنه سعداء كثير من هذا الواقع لانهن بتقاضو مصاري كثير على كل جره.. شايفين كيف انه الفوائد تشمل كل القطاعات بدون استثناء (يصمت قليلاً ) اه.. نسيت اذكر المقاولين وعمالهن وهذلول بتوجدو بجانب كل بيت من بيوتهن.. مثل ما هي العاده عندهن.. الاول بجيب مشروب.. والثاني بجب كعك.. وهذا بدعم الحركه التجاريه والانتاجيه.. وهون كمان الفايده بتتخطى بلادنا لانه المقاولين وعمالهن بتوجبو بالقهوه كمان وهذا دعم للدول الناميه المنتجه للبن.. عشان هيك بدنا نخلي الحفر في شوارع اولاد عمنا .. لانه للحفر ابعاد نفسيه ايجابيه على السائقين المراهقين لانها تحد من تهورهن .. وهيك بتحد من حوادث الطرق ( يصمت ثم يجفل ويصفر ) وين صرنا.. احنا ابتعدنا عن الموضوع كثير.. شو كنا نحكي؟؟ شو.. شو.. اه تذكرت.. حكينا عن كيف احنا نتركهن مزلبطين وقت الانتخابات.. الشغله بدها شوية شطاره.. انتو ما تصدقو كل كلمه بنحكيها بالنسبه للسلام.. الواحد لازم يكون دبلوماسي عشان الاعلام لا أكثر ولا أقل.. يعني لازم نكون " من برا هلا.. هلا ومن جوا يبعث الله ". وللي مش فاهم يفهم.. لازم يكون " من برا حليس ومن جوا قريص" وبلاش نعيد الكلام اعطينا امثله كفايه.. بس خذوه المثل .. احنا لمن نقتل ما بنخلي أثر.. الولد اللي جنب الحيط قلولي وين الولد ووين الحيط؟ ( وينظر نطرة المنتصر) لكان ( وهو يشير إلى راسه ) في عقل هون.. صحيح صار شوية شوشره وهيزعه .. بس اليوم انتهت وراحت عللي راحت عليه.. المهم كيف نخدع الرأي العام ونطلق احلى الكلام ومثل ما قلنا في البدايه .. لازم ( وهو يمد زنده الأيسر ويمرر عليه كفه الأيمن ) الايد تذبح واللسان يمدح.. هاي بدي كل واحد يفهمها.. قلنا ايه.. الايد بتذبح واللسان يمدح ( يسمع صوت رنين الهاتف.. يرفع السماعة ويفتح عينيه) ايه؟ ,.. في إعلام.. طيب.. طيب (ثم يتوجه إلى الجمهور) يا جماعه.. احنا لازم نكون أصحاب وأحباب مع أولاد عمنا.. احنا مثلنا مثلهن ما في فرق ابداً.. كلنا اولاد تسع أشهر.. لازم نرتاح من الهم ومن الدم.. بكفينا .. اتعبنا من المماحكات وزمن الحروبات.. لازم نعيش سوا.. وناكل حمص سوا من نفس الصحن.. احنا تعبنا من الحروب ولله تعبنا..( وكأنه يبكي) ولله تعبنا.. لازم نفتش عن القواسم المشتركه.. في سراج وفتيله.. حتى نقدر نعيش بسلام ومحبه مع أولاد عمنا.. عشان تكون حياة أولادنا وأحفادنا سعيد .. ما بجوز نورث أجيالنا القادمه المشاكل والمأسي.. بكفي حروبات (ويصرخ) بكفي.. بكفي وجع راس..
(في هذه الأثناء يدخل المصور الصحفي ويقوم بالتصوير ويستمر في الحديث وكأنه يبكي وهو يردد كلماته بحرارة شديدة يعيد ما كان قد قال قبل لحظة )
يا جماعه.. احنا لازم نكون أصحاب وأحباب مع أولاد عمنا.. احنا مثلنا مثلهن ما في فرق ابداً.. كلنا اولاد تسع أشهر.. لازم نرتاح من الهم ومن الدم.. بكفينا .. اتعبنا من المماحكات وزمن الحروبات.. لازم نعيش سوا.. وناكل حمص سوا من نفس الصحن.. احنا تعبنا من الحروب ولله اتعبنا..(وكأنه يبكي) ولله تعبنا لازم نفتش عن القواسم المشتركه.. في سراج وفتيله.. حتى نقدر نعيش بسلام ومحبه مع أولاد عمنا.. عشان تكون حياة أولادنا وأحفادنا سعيد .. ما بجوز نورث أجيالنا القادمه المشاكل والمأسي.. بكفي حروبات (ويصرخ) بكفي.. بكفي وجع راس.. لازم شنلاقي حل لمشكلتنا مع جيرانا.
(وعندما يخرج المصور)
راح.. راح ( يقلب شفتيه وهو يهز برأسه ).
(بصوت عال وهو يمد يده) انقلع.. قلعه تقلعه.. هذا اللي كان ناقصنا..( ويتأفف) بعدين يا جماعه احنا إذا أتقنا اللعبه.. ( ويبتسم ) بقدر واحدنا يحصل على جائزة " نوبل" للسلاااااام .. انتم شفتو في عنيكو..لكل شعله الها اصولها وللي بتقن اصول لعبتو بنجح.. انتبهو منيح.. شوفو كيف احنا بنقتل ومندمر وفي النهايه بنحصل على جائزة نوبل للسلام.. لانو نجحنا نقنع العالم انو المذنب هو عدونا اللي ببعث اولاده يهاجمو بدبباتنا.. استطعنا نقنع العالم انو الحقائب المدرسيه قامت بالاعتداء على القناصة المتربصين خلف الجدران.. وانو زوادة طفل صغير قفزت من الشنطه وقصفت كتيبه عسكريه عمتعمل على زرع المحبه والسلام (يصمت قليلًا ثمويصرخ) هاي مين بقدر عليها ( يشير إلى رأسه) هاي بدها عقل هون.. هاي بدها عبقريه دبلوماسيه ..(وهو يضع سبابته على صدره) مثل اللي عند محسوبكم..بدي اقلكم احنا لمن مندمر البيوت.. بنقنع العالم بانو هاي الشغله مهمه إنسانيه.. لانه في تدمير البيوت دعم لمجالات حياتيه كثيره,, فتدمير البيوت يؤدي إلى اعمارها من جديد.. وهذا الموضوع بحاجه إلى احضار الرمل وهيك بصيرو اولاد اولاد عمنا يلعبو في الرمل.. مش صحيح انه احنا حرمناهن من طفولتهن.. لانه انتم عارفين انه الطفل بلاقي سعادته في اللعب على الرمل.. هذا من ناحيه.. من ناحي ثانيه تدمير البيوت يدعم الادب والفن وخاصه الشعر لانه يفتح قريحة الشعراء وبدفعهن لنظم القصائد المتباكيه على الاطلال..( وهو يهز رأسه) أي ولله لنجعلهن يبكو على الاطلال لابد الابدين .. هنه مختلفين والمعركه مولعه (ويشقرق من الضحك) ه.. والخلاف على ايه..(يصمت قليلًا ) القصائد اللي بسموها معلقات اللي بتحكي عن الأطلال سبعه ولا عشرة.. أي ولله لنرجعهن لهذيك الايام.. انا يا جماعه مش مثل غيري بحكي أكثر من ما بفعل.. ان بفعل أكثر من ما بحمي.. ولمن بحكي بعرف شو لازم ينقال..ووين لازم ينقال مش مثل غيري.. عشان هيك انتم عرفتو برنامحي.. من هون انا بدعيكم تصوتولي.. انا مش رح اكتفي في جلب روح السمك.. احنا بدنا نحاسبهن على المي كمان اللي تنبع في اراضيهن.. هي المي للازم تتغلغل في باطن الأرض تتوصل على بحرتنا.. ممنوع يشربو قد ما بدهن.. بكفيش بدهنش ينقرضو.. كمان بدهن يشربو مي؟!!( وهو يشير باصبعه إلى اسفل ) لازم نذلهن ونخلي كل دول العالم تتوسطلهن ويكون هناك مفاوضات طويلة الأمد مثل ما قالو مكوكيه ( ويبدأ باللعب بأصابعه وكأنه ينسج بواسطة المكوك).. عشان نعطيهن يشربو من المي اللي نبعت في اراضيهن.. لازم مباحثات.. وزعيمهن يتصور معنا وهو مبتسم ويقول.. جرت المفاوصات بروح وديه.. وهناك في تقدم كبير في الطريق نحو السلام العادل في المنطقة.. بتعرفو يا اخوان شو بدي اقولمو ( يصمت قليلًا ).. لازم يكون في سلام .. أنا مع سلام.. ما تستغربو.. سلام الفرس والفارس..(ثم يقوم بحركة وكانه يطارد على حصان )
دي.. دي ولا.. هوسا.. هششششش .
(ثم يعود إلى الجمهور ويتحدث بسرعة وهو يرفع صوته)
انا بدي اعمل عشان كل الانهر تصب في بحرتنا.. بدي ابعث الحيويه في الاغصان اليابسه.. بدي أكسر الصوان.. بدي أقضي على الحرمان..بدي اجيب لشعبي الحبيب الحليب..اللبن .. العسل والرمان كمان..عشان هيك لازم تمنحوني ثقتكم الغاليه.. لان مصلحتكم مرتبطه في مصالحنا.. وانتم عارفين انا عندي باعات طويله.. انا مثل الاخطبوط.. ( يرفع ذرراعيه ويمدهما) اذرعاتي بتلف على كل الجهات.. وشبكة علاقاتي الكل بعرفها.. بدي استغل هاي العلاقة عشان الشعب.. شعبنا تعذب.. وتقهقر..تشحر وتمرمر.. عشان هيك لازم نعيش وندعس على راس كل واحد بوقف في طريقنا ؟
(ويدوي صوت التصفيق وأثناء ذلك يسدل الستار.
هذيان قائد ( الحركة ) بعنوان :
في عقل هون
المنظر : غرفة واسعة يظهر بوضوح أنها أعدت خصيصا لعقد الاجتماعات .
تزين الغرفة مقابل الجمهور ، صورة رجل توحي بأنه أحد قادة الحركة المتوفين، أصلع في مركز الرأس وعلى الجانبين بعض الخصلات من الشعر وكأنها تتطاير مع الريح! . إلى جانب الصورة رجل ذو لحية سوداء طويلة، ينظر إلى الأفق.
على الجدار الأيسر: صورة دبابة وقد علق على فواهتها يافطة كتب عليها كلمة "سلام "؟.
على الجدار الأيمن خارطة للكرة الأرضية
يدخل ابن اسحاق يلبس قبعة كتب عليها ـ "في عقل هون" ـ يرتدي قميصا مزينا بصورة حمامة على الصدر . وصورة رشاش على الظهر.. يبرز من تحت قميصه درعا واقيا من الرصاص . ويبدأ الحديث :
الصديقات والأصدقاء الأعزاء ، بعد ما أحييكو .. بدي اقلكو إني دعيتكو عشان أوضحلكو الامور الجوهرية اللي بتميز تجمعنا عن تكتلهم.. احنا في حركتنا بيجمعنا وبيكتلنا معهم عدة شغلات .. ولكنا بنختلف معاهم في التكتكة .. لأننا نعتقد إنو اللي ما بيعرف فن التكتكة .. هو متكتك ( وهو يشير إلى رأسه ) يعني ما في عقل هون .. فإحنا مش مثلهم اللي في قلبهن على راس لسانهن .. هِنِّي مفكرين إنه الصراحة قبضنة.. لا يا حبيبي.. الصراحة مش كياسه.. الصراحة تياسة .. الصراحة بتبعد الراحة .. وهذا ما أثبتته التجارب في كل محل.. وبما إنه أحنا متواجدين في غرفة مغلقة، وما في حدا غريب.. وما في إعلام.. ولا أغيار.. إحنا بنقدر نحكي بصراحة..( يصمت قليلاً ) على شان إكون في عقل هون ( وهو يشير إلى رأسه ) لازم .. الإيد تدبح واللسان يمدح ( وهو يمرر كف يده اليمنى فوق زنده الأيسر ) هذا هو الفن.. هاي القدرة.. هاي الشطارة.. لأنه في نهاية المطاف.. اللي بيعلق في ذهن البشرية.. هو شو احنا بنقول..( وهو يحرك اصبع المشير ) مش شو احنا بنعمل.. يعني احنا نعتقد انه تياسة في السياسة.. نعمل اللي بنقوله.. ونقول اللي نعمله..( ويرفع صوته ) هاي هي القاعدة الأساسية في طريقة عملنا.. وهذا أهم شيء يميزنا عن غيرنا.. مش مهم شو بنقول .. المهم انه رد الفعل لازم يكون حازم.. احنا بنفضل نحكي قليل ونعمل كثير.. لانه المهم هو السطر الأخير..( يرفع قبضة يده ) والامتحان في الميدان (يصمت قليلًا) المزيد من فرض الامر الواقع على الأرض.. بمعنى اخر.. زيادة الاستيطان ( يرفعصوته مجددًا) هذا أكبر برهان، عشان هيك احنا بنقول، أفضل إذا كان القصف الكثيف يرافقه حديث لطيف.. بدها عقل الشغله,, بلاها طولة اللسان .
( يستعمل يده وكأنها مدفع رشاش )
تشو .. تشو .. تشو .. ترررررررررررررررررررررر
( يلوذ خلف الطاولة ثم يطلق النار.. وهو يجلس القرفصاء )
تشو .. تشو .. تشو .. تررررررررررررررر
( يقفز خلف طاولة أخرى ويستمر )
تشو .. تشو .. تشو .. تررررررررر
( يقف ويعود إلى الحديث ) :
ولكن أحسن إذا كان القتل بدون هيزعة.. لازم يكون القتل مع كاتم صوت.. هاي هي المعادلة اللي بنأمَنْ فيها .
( صوت انفجار قنابل )
سامعين.. سامعين.. أنا كنت قائد في الجيش.. ومين بيتقن المهمة أكثر مني؟ بعدين انا أتعلمت لغتة العدو وآدابه، وتاريخ المنطقة عشان اعرف كيف الأعداء مركبين.. ودخلكو شو بده يصير.. كله مش راح يفيد.. رأي عام ( ويشقرق من الضحك.. ثم يستمر في حديثه ) قال رأي عام.. قال.. ( ويصمت قليلا ).. أمم متحدة.. طز.. طزين.. ثلثه.. مظاهرات.. قرارات إدانة ( ويعود إلى الضحك ) دخلك خليهن يتخذوا القرارات اللي بدهن إياها.. ما هي الإدانات لفوق راسنا والمبلول ما بيخاف من الشتا ( يصمت قليلا ويفتح عينيه ) .. آه.. افطنت .. ومين قال راح إكون في هناك إدانة.. ما هو " الفيتو " (وهو يشير إلى جيبه ) في الجيبه.. هون.. هون، تلفون واحد.. حتى بدون تلفون .
( يصمت قليلا ثم يضحك ضحكا متواصلا بشكل هستيري ويعود إلى الحديث )
قال أولاد عمنا إسماعيل بدهن يجتمعو .... طيب ويجتمعو .. وشو عليه .. ما هو لما يجتمعوا بيْعَرِّفونا قديش هِنِّه ضعاف .
( يصمت قليلا ويضع سبابته على رأسه )
إحنا في كل محل في النا ناس.. وشو لزوم التحديات.. لمَّا بتلفون واحد بنخلي كبيرهن يفشل الاجتماع.. هاي الخمة اللي بتجتمعو فيها وبسموها قمه.. بدكوا تشوفوا كيف ؟؟.. طيب (وهو يهز برأسه بلهجة الواثق من نفسه ) .أن شا لله.. يبقيه منور وسيد ع العبيد وتكون خطواتو غايه في الحسن والبركه (وهو يرفع راسه نحو السماء) يااااااا رب.. انصر شعبك المختار لابد الآبدين ودهر الدهرين .
( يتجه نحو الهاتف ، يرفع السماعة وينشغل قليلا واثتاء ذلك يسمع صوت نباح كلب )
- هلو .. يا كبير أولاد عمنا.. أنا ابن إسحاق .
· مين ؟ ارفع صوتك .
- (بصوت عال) ابن إسحاق.
أهلا.. أهلا.. لمن بتحكي معي أرفع صوتك.. كيف الحال .
- مبسوط وكيف انت.. ان شالله تبقى منور وسيد ع العبيد وتكون خطواتك غاية في الحسن والبركه ياااا رب .
* شكراً.. شكرا.. شو بتريد .
- اسمع .. سمعت إنكو بدكو تجتمعو .
* اة صحيح .
- طيب بدنا تفشلولنا اياها.. هاي اللي بتسموها " القمه " .
(يسمع صوت نباح الكلب )
- قلتلك بدنا تفتشلولنا.. هاي اللي بتسموها القمة
* حاضر.. تكرم عينك.. بس ما انت عارف.
- آه .. آه .. ادعو شعبكو للتعقل والتروي وامنحونا الفرص.. فرصة بعد فرصة على بين ما نكون خلصنا.. وتكون الارض بحححححح .
(يسمع صوت نباح الكلب )
*مين انبحح؟
- مالك بطلت تسمع امنيح قلت الارض بحححح .
* مين قح .
- انت كبرت وبدك سماعه.. قصدي بنكون بنينا وفرضنا الأمر الواقع .
* بس بدنا انسبكو ونثقل العيار.
- وماله .. خلي شعبكوا يفش غُلُّه .. أحسن ما يقوم يعمل عليكو انقلاب. ترى انتم الكو تاريخ طويل في الانقلابات.. دير بالك على قفاك إمنيح .
*بدكو تتفهمو ظروفنا.
- احنا متفهمين ظروفكو . عشان هيك احنا بنكون زعلانين إذا ما سبيتو علينا .
(الكلب يواصل النباح )
- عليّ صوتك.. احكي في صوت عالي.
* يا عمي ابعد الكلب.. حتى تسمع امنيح .
- الكلب.. ماله الكلب .
* قلت ابعده حتى تسمع امنيح بكفيش سمعك الثقيل؟
- هذا البرنس
*(بصوت عال) : مين؟
- الكلب اسمه البرنس
* الله يخليلك اياه .
- كان مريض وبعثناه على الخارج يتعالج .
* ايه.. في الخارج.. ليه؟ هذا كلبك مدلل.يمكن جوعان.. شو بتعميه؟
(يستمر الكلب في النباح)
- بطعميه كل يوم دجاجة وكيلو لحمة مع 10 أكواب من الزبادي والمربى؟
* ( باستغراب) الكلب؟
- اه.. الكلب..
* يا زلمي.. كيف هذا ؟ والشعب ميت من الجوع
- انا بالنسبة لي الكلب أفضل من الشعب ؟
* شو هالحكي يا زلمي .
- لانه الشعب من الممكن كل ساعة يخونك.. بينما الكلب لا يمكن أن يخونك .
* ( وبصوت عالٍ ) طيب على كل حال نعود إلى موضوعنا.. لازم شعبكو يسب عشان ينفس.. (يسمع صوت تنفيس).. وششششششششش أحسن ما يفقع ويطيركوا ( وهو يبتسم ) شفت ما ألزَّها الديمقراطية.
* اه ولله لزيزه.. وبدنا نصدر بيانات شجب.
- خلي بيانات الشجب اتلعلع للسحاب ( وهو يرفع يده ) لسابع سما.. عشان الطابق ما يكون مكشوف.. وينك.. ( وبصوت خفيض ) بس بلاش تسبوا علينا من تحت الزنار.. هُمّْ واوا.. دير بالك.. هُمّْ واوا ( وهو يضحك )
* مش سامع امنيح.. قلتلك عليّ صوتك لمن تحكي معي .
- (بصوت عال ) قلتلك بدكو تسبو.. سبو بس بلاش تسبوا علينا من تحت الزنار.. هُمّْ واوا.. دير بالك.. هُمّْ واوا .
* ولا يهمك.. المهم لا حرب بعد اليوم.. وحنا سنفسح لكم المجال.. ونتعامل معكو بوحي من تعاليم السيد المسيح إذا ضربتونا على خدنا الأيسر رح ندير لكم خدنا الأيمن، وإذا دستم على رقابنا رح ننزع أحذيتكم ونقبلها..
- لا يا زلمي أنت كبير القدر.
* انت عارف كل ما تشتد ازمتكو بيجي الفرج من عنا.
- واضح.. واضح
*بس بدي اتسيرو أمور الأولاد في الخارج.. شويه عقارات ترى انتم شاطرين في التجاره .
- شاطرين في كل إشي .
* هاي مش مختلفين عليها، بس مثل ما احنا بنفهمكو على الطاير كمان انتو لازم تفهمونا على الطاير وانت عارف أنا مش مخويل؟!
- مش ايه.. مش فاهم عليك.. شو قصدك؟
* في مثل عنا بقول ثلثين الولد لخالو.. أنا صحيح سميت ابني الثاني على اسم خالي ولكن الولد كمان مش مثل الخال.. الولد كثير شاطر.. فرتيك ..علمناه دكتور في الرياضيات عشان يعرف فن الشفط والهط ويتولى المهمه بعدي،، بعدين.. خالي كان معاكس انا ماشي مثل ما بدكو على المسطره.. لا بزيح هيك.. ولا هيك.. وشو بدكو أحسن من
هيك .
- وأحنا رح نفهمكو في كل اللي بدكو اياه.. حكلي تحكلك.. بدنا تبنولنا جدار حديدي عشان المخربين ما يتسللو من أراضيكم .
*الك يكون جدار فولاذي كمان ومش حديدي .ولكن بعدك بتقول حكلي تحكلك . وكمان بدنا اتقوسولنا اللي عم يتسللو من اراضيكم تيجو يسكنو عنا .
* قوسوهم انتو .
- احنا عمنقتل كفاية من جيرانا ما بدنا انقوس كمان اللي بيجو من دول العالم تيسكنو عنا.. ما بدنا نسود علاقاتنا اكثر .
* طيب بس في عندي طلب.
- احنا رح نعتبرك رئيس حرس الحدود عنا.. عشان هيك رح نخصص لك معاش سري في بنك في سويسرا .
*شكراً.. شكراً .
- وإنتو حصتكو محفوظة.. إنتو ثاني دولة بتاخذ مساعدات .من عند ابن العم سام واحنا راح نطلب من ابن سام يزيدلكو الوراق الخضر.. بس أسمع بتعمل لي حصه.. مثل ما بتعمل مع اولادك بتحمل قسم على حسابي البنوك في أوروبا .
*حاضر.. حاضر بس آه.. آه.. آه..انا قصدي.. آة..آه .
- احكي يا زلمي شو السيره.. شو بدك صبغة لشعرك.. ولا طقم اسنان.. ولا صبغة وكمان وطقم اسنان؟
* بدنا انزبط الحساب .
- أي حساب؟ قلنا انتو ثاني دولة بتاخذ مساعدات من ابن العم سام .
* خليهم يبحبحوها وحنا بنشيل 5% الكو من تحت الطاوله.. 5% لحساب الأسره ..انت عارف احنا ماشين مثل ما بدكو على المسطره.
- قديش عدم المؤاخذه وصل حساب الأسرة .
* شو بدكم تعرفوا لبيضه مين باضها .
- اه
* 70 مليار ورقه خضره.. ارتحت؟
- (يصفر ويأخذ بهز كف يده اليمنى بسرعة) لا يا زلمي ما بصير يكون هيك حسابك وشعبك ميت من الجوع .
*بكره لمن يصير الحساب 100 مليادر بنوقف الشعله .
*(ويغني مازحا)
دمرتم لبنان.. دمرتم لبنان.. وضيعنا فلسطين
وأنا وأنت يا حبيبي سالميييين
عقارات في أمريكا..ارصده في وأوروبا وصناعات في الصييييين .
- (يكمل ابن اسحاق) وسحبنا من الرحم الأم الجنين
وفرحنا من اللون الأحمر الجاري وطربنا ع صوت الأنيييين .
* (يرد ) وزدنا الأرصده، من ملياردات وملايين
وأنا وانت يا حبيبي سالميييين.
- (وهو يضحك) دمرنا لبنان.. دمرنا لبنان وضيعتم فلسطين
لا يهنأ لنا عيش بدون القتل حتى المختبئين في الملاجئ امنين
وزاد شوقي الك والحنين
انت الحُسن.. انت البركة.. انت النور وسيد الحلوين
- ( ويشقرق من الضحك ) كيف محسوبك بتقن لغتكو امنيح .
* ولله ما انت قليل .
- اسمع.. بدي قلك شغله.. بكره بعملو عليك انقلاب .. احنا فكرنا حالنا طماعين طلعت اطمع منا.
* صار لي 30 سنه مهيص على ظهور الشعب ولا حدا حكى انتو ما تسربو المعلومات وانا بالف خير .
- شو هلحكي يا زلمي؟
* انا بعرفكو.. بكرا إذا ما مشيت مثل ما بدكو على المسطره بتسربو المعلومات .
- اه حلوه هاي اللي ع المسطره.. خليك ماشي على المسظره وحنا وانت بالف خير.احنا على زمان خالك اللي كان مغلبنا دبرنا حالنا اشترينا زوج ابنته وكان يوصلنا كل شارده وكل وارده .. كل حركة كانت كبيره أو صغيره.. وعلى سيرة المسطره.. بدنا الغاز بدون ثمن.
* كيف يعني ؟
- مثل ما انت سامع .
* هيك بتكون فضيحه وعليها شهود.. خليها بسعر التكلفه وبنقول هاي صفقه ضمن اتفاقية السلام وحنا مثل ما حكينا لازم واحدنا يفهم الثاني على الطاير.
- طيب موافقينا .
* وبالمقابل.. ( وتظهر علية علامات الارتباك ) ايه.. ايه.. ايه .
- (باستغراب) ما لك يا زلمي ليش انعقد لسانك احكي يا زلمي.. احكي ما في بيناتنا سر .
* ايه.. ايه.. ايه .
- قول يا زلمي ما تستحيش..ما في سر بيناتنا .
* سوسو ختيرت .
- مش فاهم عليك
* ايه.. ايه.. اية
- قول يا زلمي وما تستحيش.
* انا بعدها نفسي خضره بدي وحده.. طويله.. شقرا.. وعنيها زرق ووسط .
- ايه ؟؟.. ( يفتح عينيه استغرابا ) ايه ؟؟ .. طويلة .. شقرا وعينيها زرق .. وسط .. شو يعني وسط ؟؟
* يعني لا ناصحة ولا ضعيفة .
- .. فهمت .. فهمت .
*والدرات ناصحات .
- (يفتح عينيه ) الدِّرِّات؟؟ .. شو يعني الدِّرِّات ؟؟
* الصِّدِر ؟؟
- (يجفل ثم يقوم بحركات موحية )
* والاوراك بدي اياهن كمان ناصحات .
- ( يفتح عينيه ويفغر فاه ) أنعم وأكرم.. طيب.. طيب.. خلص .. شقرا.. عينيها زرق.. لا ناصحة ولا ضعيفة.. الصِّدِر مليان.. والوراك ناصحات.. إِلَكْ إتكون أحلى من ملكة جمال العالم .
- اتفقنا ؟؟ .
* اتفقنا.. سلم على كل الأخوة المعتدلين.. آه .. لولا شوية انسيت أقلك.. نسيتني من كثر طلباتك.. بدنا نحضِّر لمؤتمر ضد الإرهاب..وبدنا يكون عندكو.. في واحة الصحرا .
- بس..
* إنت اعمل اللي بنقلك عليه واحنا مش راح نقصر معاكو .
- اتفقنا.. يللا باي .
* استنا شوي.. شو باي..في بعد امور بدنا اياك تعملها
- شو هي؟
* ( بصوت خفيض ومتقطع ) بدنا.. في ليلة عيد الميلاد.. تنسفو كنيسه.. على المصلين.. عشان.. نتهم المحاصرين بعد ما تكونو اقمتو الجدار.. شو قلتلي بنسمية الجدار الفولاذي بدل الجدار الحديدي.. بنتهم المحاصرين بحفر خندق تحت الأرض، وتهريب الأسلحة والذهاب لتفجير الكنيسه..( ويرفع صوته قليلًا) وهاي العمليهفيها افاده.. للطرفين.. النا والكو.. احنا نقدم تبرير للعالم.. حول استعمال الأسلحه المحرمه دولياً ومحاصرة وتجويع المحاصرين.. وانتو بتظهروا مدافعين عن الجماعة ضد التطرف والإرهاب .
- ولله فكرتك فكره.. من فين بتجيب هاي الافكار..
* ولك احنا اخلقنا قبل ابليس بساعه .
- هاي بشهدلكو فيها.. فعلاً إحنا لازم نلهي الشعب حتى تتحول انظارو ونقدر نسيطر على الامور إلى الابد .
* بس دير بالك (بصوت خفيض) هاي الأمور بدها تخطيط وحذر كثير.. فهمان .
- طبعاً.. ولا يهمك عندي وزير داخلية كان لازم يخلق عندكو.. بعرف كيف ازبط الشغلة.. شو إحنا اولاد؟
* طيب يالله.. لا تنس.. سلم على كل الإخوة المعتدلين..
- تسلم
* الله يسلمك
- قلتلي كيف صحت سوسو؟
* وضعها ثابت.
-طيب..إلى اللقاء.
( يقفل السماعة ثم يتجه إلى الجمهور بلغة تدل على الثقة بالنفس والاستعلاء )
شايفين..( يرفع قبضة يده ويهزها ) كل إشي لازم يمرق من هون ( وهو يضع يده على خاصرته ) من تحت باطي .. كل إشي لازم يمرق من بوابتنا.. والكل لازم يرقص على دربكتنا.. ( ويتمايل )مثل جايزة نوبل بأشكالها وألوانها - السلام – الادب – العلوم – وغيره وغيره .. ما هو احنا مسيطرين عليها والقرار بيدنا.. شوفتو كيف "محفوظهن" اللي عاملوه قد الدنيا .. ما حصل على الجايزة ولا كان بيشمها قبل ما رضي عنه "سومخنا".. وكان مستنيها درويشهن.. قالنا له يستنكر قصيدتو.. في البداية رفض.. ولَمَّنْ رجَّعناه اتلكع ولَنَّها.. ولكن لَمَّا شاف فيش فايدة إلا غير يفوت من بوابتنا.. رِجِع وتجاوب معنا.. وخلينه يصير اروح سكي مكي لهون.. لعند أهله ويتجول ع السكت لوين بدو.. احنا بنعرف كيف اولاد عمنا مركَّبين.. ومحسوبكو كان ضابط في المخابرات.. وهناك تعلمت لغتهن.. وتعلمنا لهجاتهن.. عندهن مِيتْ لهجة، في قرى المثلث.. بيقولوا عن الكوكا كولا " تشوتشا تشولا ".. وتعلمنا حتى أغانيهن.. كلها بكبكة وتنويح.. اعطف علي وارحمني من قسوة قلبك.. (وكأنه يبكي ) وأنا وهم.. أنا سراااااااب.. وأنا من ضيع في الأوهام عمره .. وتعلمنا أمثالهن الشعبية.. هناك المهزله.. يا حبيبي.. هناك.. قال.. بوس الكلب.. قال بوس الكلب..هههههه.. بوس الكلب من ثِمُّو تتنول حاجتك مِنُّو.. هههههه.. أمثال كلها تدعو إلى الاحباط.. قال.. الكف ما بيلاطم مخرز.. والايد اللي ما بتقدر عليها بوسها وادعي عليها بالكسر.. ههههههه.كله بوس.. بوس الكلب.. وبوس الايد.. وِلاَّ هذا المثل اللي بيقول.. الباب اللي بيجيك مِنُّو الريح سِدُّو واستريح.. وتعلمنا تراثهن عشان نعرف كيف هِنِّي مْرَكَّبين.. وْيِسْهَل علينا سحقهن.. احنا لازم نعرف كل واردة وكل شاردة.. لأنُّو كل ما اجتمعت مع عشرة منهن بتلاقي فيهن أربع شعراء.. قال هؤلاء مبدعين ههههه مش عارف انا شو مالي اليوم غلب عليّ الضحك قال مبدعين.. ما بعرفو يصنعو ابره.. أوراق يمسحو فيها.. وقال مبدعين قال: قفا نبكي ( ويشقرق من الضحك) ههههههه.. في المخابرات من المفروض تعرف تدبِّر حالك.. والشغلة بدها موهبة خارقة.. مش كل واحد يقدر عليها.. بدكو تسمعو أغاني من نظمي مستمدة من تراثهن الشعبي ؟؟..( يصمت قليلًا ) طيب ( يتناول دربكة ويجلس ثم يبدأ بالنقر والغناء ) :
على دلعونا على دلعونا
على دلعونا على دلعونا
بدنا ندهكهم بدنا نسحقهم
نقلع ونخرب شجر الزيتونا
راح نذبح كل اللي بيكرهونا
بدنا نمحقهم ونشرش هونا
توه .. هلا .. هلا .. هلا .
( يقف ويخرج مسدسه ويطلق النار ، ثم يعيد المسدس إلى مكانه . يصمت قليلا ثم يتوجه إلى الجمهور ) :
طيب يا جماعة.. قولوا الحق.. هاي اللعبة بيقدرو جماعة التكتل عليها ؟؟ .
( يصمت مرة أخرى ) :
إذا احنا ما أتقنا اللعبة..(يهز برأسه) كيف بدنا ننسجم معهن ونحاربهن من جُوَّه .( يجفل ) آه.. وعدت كبيرهن أتوسط له عند ابن سام .
( يتوجه نحو الهاتف ينشغل قليلا ) :
· هلو .. ابن اسحاق بيحكي..كيف الحال.. كل إشي تمام ؟؟ .
- على كيف كيفك .
* بدنا تزودو الوراق الخضر اللي بتبعثوهن لكبير أولاد عمنا.. الزلمي امنور علينا وقادر يعمل على شعبو سيد وخطواتو كلها حسنه ومباركي.
- الحاله إسا مش كثير منيحه .
* أي حاله؟.. (يرفع صوته) يا زلمي من ذيلو عملو شباق.. يعني قلهن يرخصو ذهباتهن السود .
- انت شو دخلك؟
* كيف شو دخلنا ؟؟.. ما احنا في تحالف استراتيجي.. وولادنا أولادكو.. وولادكو أولادنا.. بعدين العم سام كان صاحبنا.. وانتو ما بتخالفو التقاليد.. احنا الولاية ال53.. ولو.. شو انسيت؟؟.. الانتخابات على الطريق.. انت فاهم علي.. الانتخابات على الطريق.
- شو بتهدد؟.
*لا يا زلمي .. ليش رحت بعيد؟؟.. قصدي لازم واحدنا يفهم الثاني على الطاير.. الزلمي مش بطال.. عمبتجاوب معنا.. وبيقول 99% من أوراق اللعبة معاكو.. يعني ناقص بس أقول .. لا إله إلا أنتم.. بعدين ما انت عارف البراطيل بتفك الشراويل .
- احنا لازم انشن حمله صليبية على بلاد الرافدين حتى انسيطر على منابع الذهب الأسود هناك..ولازم هني أنفسهن أساعدونا على قتل انفسهن لانو الله أخطأ لَمَّن خلقهن فوق الأرض.. وخلق الذهب الأسود تحتها.
* أيوة على هذا ما في نقاش..( وهو يضحك ) شو كان صار لو جدي ما خلفهن.. وصارت كل المنطقة إلنا.. ولاَّ لو كان مات قبل ما خلَّف هالخلفة النجسة ؟؟
- دير بالك لازم مرات نعمل حالنا مختلفين عشان نزبط اللعبة
*( يعاود الضحك ) اسمع.. انسيت أقلك.. قال هذا ابن عمي .. بدو وحدة.. شقرا.. طويلة.. عينيها زرق.. لا ناصحة ولا ضعيفة.. قال وعندها دِرِّي.. مثل ما قال.. يعني ناصحة في الصِّدِر.. ( ويلهث ) اه اه اه اه.. وبدو اياها أوراكها ناصحات كمان ( ويشقرق من الضحك )
- طيب.. طيب.. المهم انتم مش لازم يكون الكو دور لمن انشن حرب على بلاد الرافدين لأننا سنقنعهم ونجبرهم يحاربوا نفسهم . وإذ تحركتم تفشل الخطه .
* طيب ما بصير إلا مثل ما بدك.
- طيب يالله باي .
( يجلس وهو يتأفف ) :
أفففففففف.. والله تعبنا.. ولكن في النهاية أقنعناهن.. رغم إنهن مقتنعين.. بس بدهن يتغندرو علينا.. هاي بتمشي علينا!!.. يله مش مهم .. شايفين كيف بالهداوه.. كل إشي بصير مثل ما بدنا ؟؟ .
( صوت ينطلق ، ينظر إلى أقصى القاعة ) :
ما لك إنت هناك.. شو مش عاجبك ؟؟.. احنا مش مثلكو.. ما فيكو غير الجعجعة.. مثل الضفادع .. صغار وصوتكو كبير .
( يعود ويظهر بعض الانزعاج ، ثم يشير إلى أقصى القاعة ) :
طلع ضفدع من المستنقع يقعقع .. قع .. قع .. قع .. إنتو في الوسيعة بتكبروا في كلامكو.. لأنكم مش في موقع المسؤولية.. شفناكو لَمَّن كنتو في موقع المسؤولية كيف ورطتونا ( وهو يشير بابهامه إلى أسفل ) قطعتو علينا تحقيق حلمنا وهدفنا الكبير.. والله لو وقفت علينا.. غير انمدها من النهر للنهر.. مثل ما هو مرسوم في العلم .. الخطين الزرق فوق وتحت النجمة منرسموش على الفاضي.. ( يقف ثم يشعل سيجارة )
والله الحياة صعبة .
( يصمت قليلا ثم يسترسل في الحديث )..دخلكو وليه ما نمدها ؟؟.. احنا أولاد عم . وجدنا واحد.. يعني احنا إخوة.. وكل الشرائع بتقول الإخوة لازم يتقاسمو الورثه.. وإحنا ما بدنا نتقاسم معهم كل إشي.. إحنا ما بدنا نتقاسم معهم بالتساوي.. إحنا مش طماعين.. إحنا بدنا من النهر للنهر.. لا غير.. وها شو بتشكل نسبة مئوية من الأرضيات؟؟.. ( وهو يشير إلى الخارطة ) اطلعوا على الخارطة.. اطلعو إمنيح.. أقل من عشره في الميه من المساحة المذكورة.. يعني اثنين ثلاثه سانطي عالخارطه,, وثنين ثلاثة سانطي هاي أقل من واحد في الميه من مساحة الكره الارضيه.. آه شو يعني أكثير علينا هذا؟.. قولو الحق.. إحنا اتعذبنا وتغلبنا وتقهقرنا وتشحشرنا وتمرمرنا.. يعني حرام انعيش يومين حلوين؟.. بعدين صحيح إحنا بدنا انقسمهن عالمي.. المي الله خلقها للجميع.. إحنا بدنا المي وما بدنا إنقسمهن عالذهبات السود.. ذهباتهن السود خليهن لبعدين.. أول إشي خلينا نخلص من مشكلة المي، ناخذ فترة استراحة وبعدين الحساب على الذهب الأسود (يتأفف ) اففففف .
( يصمت قليلاً وهو يدير ناظريه ثم يعود إلى الحديث )
منافسينا على الحكم ورطونا.. وصلونا لنص البير وصارو يزاودو علينا.. صارو يدعو انه هنه اللي نطو.. وهنه اللي حطو,, والحقيقه هي إنه هنه اللي جربو.. وهنه اللي خربو.. وهنه اللي بخو.. وهنه اللي .....(يفتح عينيه وهو يغلق أنفه) بعيد السامعين.. قال بحكو عالقادمين الجدد بذّعو انه في عهدهن ازداد القادمين.. وكأن القادمين بطلو يجو في عهدنا.. كم مره بدنا نشرح انه ما في حاجه للشوشره.. يعني إذا جبناهم ع السكت هذا مش إمنيح؟! إحنا بدنا ناكل عنب ولا نقاتل الناطور؟.. بعدين شو بعد في أراضي عند اولاد عمنا هون؟.. ما هو شفطناها كلها ولعنا طولها ولعنا عرضها.. وكمان هون هنه اللي خربو الطابق.. مين اللي فرض ضرائب على الاراضي اللي بقت عند اولاد عمنا ومين اللي الغاها.. مين اللي صوت مع اولاد عمنا اللي عنا في "البيت".. ها.. قولوا الحق.. كمان عميحكو ويتشدقو في إنياعهن.. كل الوقت إحنا بنحرث وهنه بركو.. صابنا فيهن مثل حراث الجمال.. وبعدين خلينا نرجع لورا.. لورا.. مين اللي حط القنابل ونسف الكنيس على المصلين قبل ما نيجي لهون ونشلش امنيح؟ ويطلعلنا قرون، عشان يجو جمعتنا لهون من بلاد بين النهرين.. كانو جماعتنا عايشين امنيح هناك ومسيطرين على الأسواق وما بدهم يجو لهون فقمنا بنسف الكنيس عليهم عشان نقول العرب بدهم يقتلونا ونجحت الخطة وكلهم اجو.. وفي منطقة الجنوب كان بدنا مبرر عشان نسيطر على المنطقة فقمنا بنسف الباص اللي محمل اولادنا.. صحيح اخسرنا كمن ولد ولكن كسبنا الأرض لابد الآبدين.. ومين بجهل زعيم سابق في حزبنا اللي اتعاون مع الخنزير في قتل جمعتنا في هنغاريا حتى نصور لشعبنا انه في خطر الإبادة.. كله عشان نيجي لهون..(ويصرخ) فتحو عنيكو امنيح.. مثل هاي الأمور ما بتخطر على بال أخونا إبليس.. (ثم يشير إلى رأسه ) هاي بدها ناس في عقل هون.. المشكلة انه هنه كل أشي بنسبوه الهن.. قال فرقة " الحصادة " هنه اللي أقموها.. قلولي مين حصد أكثر في كل محل.. مين اللي حط "اللبان" في السماعات.. بدهن يحكو ولا يخلو الطابق مستور.. طيب مين اللي نسف مدرسة "يم الثيران" على راس الاولاد عشان معنوية الشعب هناك تنهار وسعتها اذبح مثل ما بدك":
وطاب شرب الدم.. طاب من الصبح للغياب
(يتناول زجاجة مشروب باللون الأحمر ويرفع رأسه ويشرب، ثم ينزل الزجاجة ويضعها على الطاولة ، ثم يمسح فمه بكم القميص ويسترسل في الحديث )
بدي اقلكو اشي.. أنا وحدي قتلت من أولاد عمنا أكثر مما قتلو منا اولاد عمنا مجتمعين ( يسمع صوت استنكار خافت ).. ايه.. مين قال هذا عمل غير إنساني.. ليش في الحرب في.. أما أبا.. لا يا حبيبي (بلهجة ساخرة) في الحرب ما في.. أما أبا.. في الحرب ( يصمت قليلا ثم يشير بإصبعه الوسطى ) في بعبيص للجعاميص.. في غم .. في هم.. في سم.. في دم .. تعالو نقارن شو هنه عملو مقابل شوا حنا اعملنا ( يصمت قليلاً ) بما انه الحديث على الصعيد الشخصي وعلى الصعيد العام.. أنا بدي اقلكم اني كنت أأمر الضباط يأخرو نساء اولاد عمنا الحوامل على الحواجز عشان أطرّحو ( ويطلق مسبة) أحسن واحد فيهن.. أما على الصعيد العام في الأحزاب، فمين قلع شجر زيتون أكثر؟..قلولي.. مين في الحرق كان أقدر؟..( وهو يقوم بحركة موحية وكأنه يذبح) في الكخ معمع.. مين كان أشطر؟.. مين دلق الزيوت؟.. مين منع القوت؟.. مين هدم البيوت؟.. مين كسر العظام؟.. مين أثبت جبروت؟.. هنه بتبجحو وبقولو كمان احنا قتلنا في المخيمات وشربنا دم.. أي شو هنه قتلو هناك.. ثلث اربع تلاف.. ثلث اربع تلاف هنه حرزانات؟.. اه .. فطنت.. بيني وبنكم هذلول اللي قتلوهن وتبهدلنا عشانهن دخلناهن في دعايتنا الانتخابية عشان انخوف اولاد عمنا اللي عنا .. يعني زي ما تقول سياسه.. مش تياسه.. وهاي مناسبه انه أحنا لازم نربح في الانتخابات لأنه الكل بعرف مدى تضحياتنا من أجل الوطن.. أنا خضت كل الحروب وانتصرت فيها لاني شخصية خزرماتيه (ينظر إلى الشمال واليمين) بدي احدثكم عن احدى المعارك لمن قمنا بقتل الاهالي.. كانو الاولاد مروحين من صفوف البساتين قالي أحد الضباط شو بدنا نعمل في الاولاد.. قلتله اقتلهن.. قلي حرام اولاد اصغار,, قلتلو - اق تل هن - قوام.. مثل نسوم الريح.. في الحروب ما في عواطف.. إذا بدنا اندور ورا العواطف أكثير انتصرنا.. بعدين هذلول الاولاد بدهن يكبرو وشو بدو يكون موقفهن بعد ما شافو كيف قتلنا اهاليهن.. رح يعيشو مع حلمهم المرعب يصيرو مخربين بالتاكيد ( يصمت قليلاً ويتأفف) افففففف.. ومين ضحى أكثر مني؟ بدي اسمع جواب.. ليه الكل ساكتين؟ (ويرفع صوته) أنا لازم اربح.. أنا لازم أربح وانتم لازم تقدرو تضحياتي.. مش معقول أنا أخوض كل الحروب واخاطر في حياتي وانتصر.. ولمن اخوض المعركة الانتخابية أخسر( ينظر يمينا وشمالا ويكمل ) ولله أنا مش فاهم واحدهن سخل وعامل حاله فحل.. راحو غرزونا تحت الارزات ثمنطعشر سنه ولولا ما نكون قد حالنا كنا بعدنا املبطين.. شو إحنا لازم نقتل وننقتل؟ لا .. لا يا حبيبي.. أحنا لازم نقتل ميت الف وما ينجرح ( وهو يشير إلى اصبعه ) اصبع واحد منا.. بعدين لمن أحنا بنقدر نقصف من فوق وقت ما بدنا بدون حارج أو بواب لليش انورط حالنا على الارض ( يصمت قليلاً ثم يتناول ماسورة مبيد للحشرات ) اسمع يا ابن عمي الصرصور بدك تفوت على القنينة وتصير تدور ولا بدك اتخليني اثور؟ ( ثم يرش) وشت.. وشت .. وشت.. مين عميقتل أكثر؟ قلولي وخليني أسمع.. قلوها بصوت عالي.. خلينا نعمل احصاء.. مين قتل أكثر.. قديش قتلو لمن حكمو.. وقديش احنا قتلنا لمن حكمنا؟ أي وحياتكو والحكي جد.. في هاي المسألة بالذات ما بيجو نقطة في بحرنا.. شو بدهن اكثر من هيك؟ احنا انزلنا على جيرانا بالمروحيات والدبابات.. كنا نستغل رمي حصوه عشان نوجد مبرر للخبط من فوق.. ولمن ما كان حدا يرمي حصوه كنا نبعث فرقة الحصاده عشان يرمو الحصو تنلاقي مبرر نقتل الأطفال قبل ما يكبرو.. (هو يشير إلى رأسه ) هاي بدها يكون في عقل هون.. خلينا نكون واضحين.. بعدين لمن احنا نقدر نقتل من فوق بدون ما حدا يدري.. لليش الشوشره أحنا لمن بنقدر نقصف من فوق بالصواريخ السرطانية.. بنضربهن اليوم وبعد كمن سنه بمرضو وبموتو ليش نقتل مباشرة ونتحمل البهدله والصحافة وجاي يا غلمان جاي.. الشغله بدها حبكه فنيه.. بدها تكتكة..(وهو يشير إلى رأسه) بدها يكون في عقل هون.. أي ولله ومالكو عليّ يمين.. اللي بتقتلة فرقة الحصاده اللي اسسوها وخليناها عايشه بطلعو فراطه مقابل اللي بنقتلو على طريقتنا ( يرفع صوته وهو يشير إلى رأسه).. لكان في عقل هون.. يا عمي اليوم في تكنولوجيا.. كلها كبست زر.. ما في حاجة للمشاه.. من فوق دب كم طن ورجع من دون ما تخاطر في نفسك.. أي هنه حكمو كمن سنه خففو المخابرات ليش؟ كنا عارفين كيف نخلف اولاد عمنا ونفرقهن عن بعضهن البعض ولكن لمن خففو المخابرات رفعو اولاد عمنا راسهن ( ويرفع صوته) اولاد عمنا لازم اموتو على السكت.. لازم اموتو بدون انين.. لازم لمن نضربهن يقولو اح.. مش اخ.. اخ هذا تطرف.. كمان لمن نقتلهن ممنوع يصورو الجنازات لانو هذا عمل ارهابي خطير.. اولاد عمنا لازم لمن نذبحهن يقولو دير بالك يا سيدي تجرح ايدك.. والفرق بينا وبينهن احنا قبل ما نذبح بنسن السكين وشختي وحده.. يعني ذبح حلال.. شو يعني مش حرام.. اسألو ابو طقيه.. حلال ولا حرام.. لازم الذبح شختي واحده ( وهو يرفع يده اليسرى حتى الوسط ويمرر كفهالأيمن فوق زنده).. بعدين بدهن نعمل في اولاد عمنا مثل ما عمل فينا الخنزير.. لا.. لا هاي ارواح الله خلقها مش لازم نعمل منهن صابونه ( يلتفت نحو الجمهور) شو ما اسمعت امنيح.. مين قال انو اولاد عمنا بدهن يتفقو.. كلام فاضي.. انتو شفتو مقدرتي حكيت مع كبيرهن عشان يفشل الاجتماع.. وكل الاتهامات اللي بتقول انو بدنا نعمل سلام معهن اتهامات كذابه.. احنا عارفين انو السلام بجيب اخرتنا..بناكل بعضنا البعض.. ولكن احنا مجبورين امام الرأي العام نظهر وكاننا بدنا سلام.. لا سلام ولا حمام هاي هي الحقيقه ( يستدير ويشير إلى ظهره) بس شو اللي بدكو اياه انقول هذا الكلام قدام العالم.. هذا ما بصير أحنا اتعلمنا اصول اللعبه امنيح.. وانا مثل ما قلت اتعلمت لغتهم وادبهم وتاريخ المنطقه عشان اعرف كيف عقليتهن مركبه لازم تعرف لغة عدوك عشان تعرف كيف اتحاربو وتنتصر عليه .. قصة السلام للاستهلاك الاعلامي.. بعدين وين الحمام؟ ما كله دجناه.. في الوسيعة خليهن يطيرو مثل ما بدهن.. خليهن يحلقو في العلالي.. المهم وقت الحزي واللزي بهدو وكل واحد بعرف دوره ( يرش قليلا من القمح ) تيعه..تيعه تيعه.. شفتو لمن دهكنا اولاد عمنا ولا واحد فتح نيعه.. في الوسيعه احنا بنقلهن يحكو ويطيرو.. ويعلو.. ويصرخو.. ويعنو كمان، في لغتهن ويغني:
طير وعلي يا حمام.. طير وعلي يا حمام
قوس واقتل عالدوام.. عيشتهم ولله حرام
طير وهدي بارض الشام.. وجبلي اخبارهم هالدوام
طير وهدي عبيروت.. حتى نعرف كيف انفوت
طير وهدي ع عمان.. وبوسلي ملك الزمان
طير وهدي يا حمام.. ع مصر وهد السلام
لكبير أولاد العم .. نشفلي من عروقو الدم
ما تنساش الوصيه خلصنا من القضيه
(يتوقف عن الغناء والسحج )
لكان؟.. لازم يكون في عقل هون (هو يشير إلى رأسه ) مرة قال أبو حاجب اللي قد الشبر لمن كانو حاكمين: " بدنا نفاوض ميت سنه" طيب بلكي تحولت الميت سنه لعشر سنين.. مثل ما حولنا الميت ليرة لعشر شواقل ، شو بنكون عملنا؟ بنكون تورطنا ورطه ما الها اول ولا الها اخر.. عشان هيك لازم نفاوض الف سنه؟؟ لازم كل ما تترقع نمزعها.. بنقول في اللحظه الاخيره _ ما في شريك _ لانه السلام مثل ما قلنا.. مناقض لاهدافنا.. ما انتو عارفين علم اليقين انه إذا كان في سلام مناكل بعضنا البعض؟؟ خلينا نكون صريحين يا جماعه.. الواحد يقعد أعوج ويحكي صحيح.. يعني احنا بلا ما ناخذ العصفور وخيطو ما بنشبع.. وبلا ما ناكل البيض وقشره.. والحله والحلال ما بنقنع.. وهاي واضحه مثل عين الشمس ليش نضحك على بعضنا.. في حد بقدر ينكر؟.. في حد بقدر يقول هذا مش صحيح ( يصمت قليلا ) ها سمعوني.. عشان هيك إذا ما كان هناك عدو لازم نخلق عدو حتى نقدر نتكتل.. لازم أكون في عقل هون ( وهو يشير إلى رأسه ) ولله لو بس تهدولنا بال شوي.. منا كلهن كشناهن.. في عنا مخطط جاهز لقلعهن من هون.. بس راح تيس منا كشف المخطط.. ولكن في ليله ما فيها ضي قمر.. هيك يكون العالم مشغول في ماساة كبيره.. زلزال.. بركان كبير(يغمض عينيه ويستسلم لأحلامه ) انفجارات نوويه.. أو ذريه.. ونبقى لوحدنا على وجه الارض .. والوديان جاري حمرا.. (ثم يرفع صوته) وطاب شرب الدم.. طاب( وبصوت حالم ) لا.. لا.. لا..لازم يبقى شوية بشر لانه إحنا بحاجة لخدام ( يستيقظ على صوت الانفجارات وينهض مسرعا ثم يفتح عينيه ويتحدث بلهجة استغراب ) يا الله ما أحلى هالحلم.. خسارة انه انتهى بسرعه.. وين صرنا يا جماعه .. وين.. وين ( يتوقف ) افففففففف.. اه.. قلنا انه تيس منا كشف المخطط فاجلنا التنفيذ.. ولكن مثل ما قلنا.. في ليله ما فيها ضي قمر والعالم مشغول في مأساه كبرى زلازل.. براكين.. اخ ما الزها هاي..( ويغمض عينيه وهو يصر على أسنانه ) بس ونته بدها تكون ونستغل الفرصه ونكشهن.. كش.. كش.. كش..اي يخلف علينا إذا كشناهن وما ذبحناهن.. انتو مفكرينها صعبه.. انا بحب اطمنكم.. المهمه مش صعبه لانه اولاد اللي عنا، مثل الأرانب بخلفو كثير وبخافو كثير.. اطلعو شو بنعمل فيهن في الانتخابات.. مثل الخاتم في اصبعنا.. بغضو النظر عن افعالنا على امل انه انحقق طروحاتنا النظريه الاعلاميه.. ولكن بعيده عن اسنانهن.. احنا بنخوفهن وبعدين نعتذر.. ومره ثاني نعود ونخوفهن ونعتذر.. وهيك بنخلق جو من البلبله.. يعني بنبلبلهن وبنوعدهن انخلصهن من البلبله.. وهيك بعيشو على امل انهن يقدرو يذرو.. فنوعدهن بتأمين الغطاء ولكن بعد الانتخابات بنتركهن مزلبطين ( ويشير بإصبعه الوسطى ) هذا بنعطيهن.. ليش لازم نعطيهن عشان يشرشو في الارض؟.. ما انتم عارفين هدفنا النهائي على المدى وان شاء الله يكون قريب ( صمت قليلاً) اقلكم أشي.. حنا كل ما قتلنا منهن كل ما صوتولنا انتو شفتو في الانتخابات الاخيره.. لازم انقوس منهن اكثر واكثر.. هذلول اللي في احزابنا تعتيع.. بنعطيهن شوية مصاري عشان اجبولنا اصوات اهاليهن.. (ويقوم بحركة تعبر عن اشمئزازه) ممنوع نعطيهن حقوقهن.. لازم انخليهن خايفين وجوعنين لانو إذا اعطيناهن وصار عندهن مصالح يعيشو منها وصار عندهن اقتصاد مستقل ببطلو بحاجه النا.. لا يا حبيبي لازم نبقى صرامينا على رقابهن.. المثل قال "جوع كلبك بلحقك "..بعدين لكل إشي الو ابعاد.. يعني إذا اعطناهن يتوسعو ويشقو شوارع جديده ويزفتوها رح نخسر كثر.. عشان هيك لازم تبقى الحفر في الشوارع لانه لهاي الحفر في فوائد كثيره. بتبقي حلقات العمل دايمه في كل محل ( يصمت قليلاً ثم يكمل وهو يبتسم) لان الحفر بتأدي لخراب في السيارات، وخاصه في اطاراتها وكابح الارتجاجات,, والتفافيح.. وقواعد المحرك والغيارات البلاستكيه.. وكمان بتأدي لتفكك مرابط الاسلاك الكهربائية والى حرق الاضواء.. ومش عارف ايه.. سامحوني إذا كانت معلوماتي الميكانيكيه ضعيفة.. والواحد بقدرش يفهم منيح في كل إشي.. ولكن المهم هو انه بتخلي اصحاب الكراجات يستفيدو.. صحيح انه مثل ما قالو" مصائب قوم عند قوم مصائب.. ولكن هون المصيبه فرديه.. بتقتصر على صاحب السياره.. بينما الفوائد هناك شامله من الممكن يستفيد منها ( ويمثل وكانه يسوق سيارة ) فم.. فم.. فم.. بيب.. بيب.. اخ ظهري ( يتحسس ظهره ) شو صابني من كثر الطجطجه..اخ ظهري.. هاي الطجطجه بتأدي لتصادم الاطلاع.. هذا اللي بسموه دسك ( ويصر على أسنانه ويعود ليتحسس ظهره) شايفين كمان هون بتستفيد صناديق المرضى والمستشفيات على اختلافها.. الاطباء.. الممرضين.. الممرضات.. وهيك بتجعل المهنه مطلوبه.. وكمان هاي الحفر بتقلص البطاله في القرى وهذه بدورها بتقلص الجريمه بكل فروعها وانواعها..السرقه.. المخدرات.. القتل.. وكل إشي.. كمان هذا بفيد اصحاب قطع الغيار في كل محل حتى انه الفايده بتوصل للشرك المنتحه للسيارات في الخارج وهيك بتتعزز العلاقات الانسانيه بين البشر.. كمان هون في الدوله.. مكاتب الجمارك والقيمه الاضافيه وضريبة الدخل.. وهذا بعود على الدوله ككل بالفائده الكبيره وبعزز اقتصادها.. وهيك كل المؤسسات بتصير اتعج في النشاطات والحركه وهذا بدفعها لاجراء الحسابات اللي بدفعهن لشراء اجهزة الحاسوب .. وشو بدي اعد لاعد.. هاي الحفر اللي بنخليها في وسطهن الها ايجابيات بعجز العقل عن استيعابها .. ونسيت اقلكو.. كمان اصحاب الشاحنات الجر مستفيدين من الحفر وهنه سعداء كثير من هذا الواقع لانهن بتقاضو مصاري كثير على كل جره.. شايفين كيف انه الفوائد تشمل كل القطاعات بدون استثناء (يصمت قليلاً ) اه.. نسيت اذكر المقاولين وعمالهن وهذلول بتوجدو بجانب كل بيت من بيوتهن.. مثل ما هي العاده عندهن.. الاول بجيب مشروب.. والثاني بجب كعك.. وهذا بدعم الحركه التجاريه والانتاجيه.. وهون كمان الفايده بتتخطى بلادنا لانه المقاولين وعمالهن بتوجبو بالقهوه كمان وهذا دعم للدول الناميه المنتجه للبن.. عشان هيك بدنا نخلي الحفر في شوارع اولاد عمنا .. لانه للحفر ابعاد نفسيه ايجابيه على السائقين المراهقين لانها تحد من تهورهن .. وهيك بتحد من حوادث الطرق ( يصمت ثم يجفل ويصفر ) وين صرنا.. احنا ابتعدنا عن الموضوع كثير.. شو كنا نحكي؟؟ شو.. شو.. اه تذكرت.. حكينا عن كيف احنا نتركهن مزلبطين وقت الانتخابات.. الشغله بدها شوية شطاره.. انتو ما تصدقو كل كلمه بنحكيها بالنسبه للسلام.. الواحد لازم يكون دبلوماسي عشان الاعلام لا أكثر ولا أقل.. يعني لازم نكون " من برا هلا.. هلا ومن جوا يبعث الله ". وللي مش فاهم يفهم.. لازم يكون " من برا حليس ومن جوا قريص" وبلاش نعيد الكلام اعطينا امثله كفايه.. بس خذوه المثل .. احنا لمن نقتل ما بنخلي أثر.. الولد اللي جنب الحيط قلولي وين الولد ووين الحيط؟ ( وينظر نطرة المنتصر) لكان ( وهو يشير إلى راسه ) في عقل هون.. صحيح صار شوية شوشره وهيزعه .. بس اليوم انتهت وراحت عللي راحت عليه.. المهم كيف نخدع الرأي العام ونطلق احلى الكلام ومثل ما قلنا في البدايه .. لازم ( وهو يمد زنده الأيسر ويمرر عليه كفه الأيمن ) الايد تذبح واللسان يمدح.. هاي بدي كل واحد يفهمها.. قلنا ايه.. الايد بتذبح واللسان يمدح ( يسمع صوت رنين الهاتف.. يرفع السماعة ويفتح عينيه) ايه؟ ,.. في إعلام.. طيب.. طيب (ثم يتوجه إلى الجمهور) يا جماعه.. احنا لازم نكون أصحاب وأحباب مع أولاد عمنا.. احنا مثلنا مثلهن ما في فرق ابداً.. كلنا اولاد تسع أشهر.. لازم نرتاح من الهم ومن الدم.. بكفينا .. اتعبنا من المماحكات وزمن الحروبات.. لازم نعيش سوا.. وناكل حمص سوا من نفس الصحن.. احنا تعبنا من الحروب ولله تعبنا..( وكأنه يبكي) ولله تعبنا.. لازم نفتش عن القواسم المشتركه.. في سراج وفتيله.. حتى نقدر نعيش بسلام ومحبه مع أولاد عمنا.. عشان تكون حياة أولادنا وأحفادنا سعيد .. ما بجوز نورث أجيالنا القادمه المشاكل والمأسي.. بكفي حروبات (ويصرخ) بكفي.. بكفي وجع راس..
(في هذه الأثناء يدخل المصور الصحفي ويقوم بالتصوير ويستمر في الحديث وكأنه يبكي وهو يردد كلماته بحرارة شديدة يعيد ما كان قد قال قبل لحظة )
يا جماعه.. احنا لازم نكون أصحاب وأحباب مع أولاد عمنا.. احنا مثلنا مثلهن ما في فرق ابداً.. كلنا اولاد تسع أشهر.. لازم نرتاح من الهم ومن الدم.. بكفينا .. اتعبنا من المماحكات وزمن الحروبات.. لازم نعيش سوا.. وناكل حمص سوا من نفس الصحن.. احنا تعبنا من الحروب ولله اتعبنا..(وكأنه يبكي) ولله تعبنا لازم نفتش عن القواسم المشتركه.. في سراج وفتيله.. حتى نقدر نعيش بسلام ومحبه مع أولاد عمنا.. عشان تكون حياة أولادنا وأحفادنا سعيد .. ما بجوز نورث أجيالنا القادمه المشاكل والمأسي.. بكفي حروبات (ويصرخ) بكفي.. بكفي وجع راس.. لازم شنلاقي حل لمشكلتنا مع جيرانا.
(وعندما يخرج المصور)
راح.. راح ( يقلب شفتيه وهو يهز برأسه ).
(بصوت عال وهو يمد يده) انقلع.. قلعه تقلعه.. هذا اللي كان ناقصنا..( ويتأفف) بعدين يا جماعه احنا إذا أتقنا اللعبه.. ( ويبتسم ) بقدر واحدنا يحصل على جائزة " نوبل" للسلاااااام .. انتم شفتو في عنيكو..لكل شعله الها اصولها وللي بتقن اصول لعبتو بنجح.. انتبهو منيح.. شوفو كيف احنا بنقتل ومندمر وفي النهايه بنحصل على جائزة نوبل للسلام.. لانو نجحنا نقنع العالم انو المذنب هو عدونا اللي ببعث اولاده يهاجمو بدبباتنا.. استطعنا نقنع العالم انو الحقائب المدرسيه قامت بالاعتداء على القناصة المتربصين خلف الجدران.. وانو زوادة طفل صغير قفزت من الشنطه وقصفت كتيبه عسكريه عمتعمل على زرع المحبه والسلام (يصمت قليلًا ثمويصرخ) هاي مين بقدر عليها ( يشير إلى رأسه) هاي بدها عقل هون.. هاي بدها عبقريه دبلوماسيه ..(وهو يضع سبابته على صدره) مثل اللي عند محسوبكم..بدي اقلكم احنا لمن مندمر البيوت.. بنقنع العالم بانو هاي الشغله مهمه إنسانيه.. لانه في تدمير البيوت دعم لمجالات حياتيه كثيره,, فتدمير البيوت يؤدي إلى اعمارها من جديد.. وهذا الموضوع بحاجه إلى احضار الرمل وهيك بصيرو اولاد اولاد عمنا يلعبو في الرمل.. مش صحيح انه احنا حرمناهن من طفولتهن.. لانه انتم عارفين انه الطفل بلاقي سعادته في اللعب على الرمل.. هذا من ناحيه.. من ناحي ثانيه تدمير البيوت يدعم الادب والفن وخاصه الشعر لانه يفتح قريحة الشعراء وبدفعهن لنظم القصائد المتباكيه على الاطلال..( وهو يهز رأسه) أي ولله لنجعلهن يبكو على الاطلال لابد الابدين .. هنه مختلفين والمعركه مولعه (ويشقرق من الضحك) ه.. والخلاف على ايه..(يصمت قليلًا ) القصائد اللي بسموها معلقات اللي بتحكي عن الأطلال سبعه ولا عشرة.. أي ولله لنرجعهن لهذيك الايام.. انا يا جماعه مش مثل غيري بحكي أكثر من ما بفعل.. ان بفعل أكثر من ما بحمي.. ولمن بحكي بعرف شو لازم ينقال..ووين لازم ينقال مش مثل غيري.. عشان هيك انتم عرفتو برنامحي.. من هون انا بدعيكم تصوتولي.. انا مش رح اكتفي في جلب روح السمك.. احنا بدنا نحاسبهن على المي كمان اللي تنبع في اراضيهن.. هي المي للازم تتغلغل في باطن الأرض تتوصل على بحرتنا.. ممنوع يشربو قد ما بدهن.. بكفيش بدهنش ينقرضو.. كمان بدهن يشربو مي؟!!( وهو يشير باصبعه إلى اسفل ) لازم نذلهن ونخلي كل دول العالم تتوسطلهن ويكون هناك مفاوضات طويلة الأمد مثل ما قالو مكوكيه ( ويبدأ باللعب بأصابعه وكأنه ينسج بواسطة المكوك).. عشان نعطيهن يشربو من المي اللي نبعت في اراضيهن.. لازم مباحثات.. وزعيمهن يتصور معنا وهو مبتسم ويقول.. جرت المفاوصات بروح وديه.. وهناك في تقدم كبير في الطريق نحو السلام العادل في المنطقة.. بتعرفو يا اخوان شو بدي اقولمو ( يصمت قليلًا ).. لازم يكون في سلام .. أنا مع سلام.. ما تستغربو.. سلام الفرس والفارس..(ثم يقوم بحركة وكانه يطارد على حصان )
دي.. دي ولا.. هوسا.. هششششش .
(ثم يعود إلى الجمهور ويتحدث بسرعة وهو يرفع صوته)
انا بدي اعمل عشان كل الانهر تصب في بحرتنا.. بدي ابعث الحيويه في الاغصان اليابسه.. بدي أكسر الصوان.. بدي أقضي على الحرمان..بدي اجيب لشعبي الحبيب الحليب..اللبن .. العسل والرمان كمان..عشان هيك لازم تمنحوني ثقتكم الغاليه.. لان مصلحتكم مرتبطه في مصالحنا.. وانتم عارفين انا عندي باعات طويله.. انا مثل الاخطبوط.. ( يرفع ذرراعيه ويمدهما) اذرعاتي بتلف على كل الجهات.. وشبكة علاقاتي الكل بعرفها.. بدي استغل هاي العلاقة عشان الشعب.. شعبنا تعذب.. وتقهقر..تشحر وتمرمر.. عشان هيك لازم نعيش وندعس على راس كل واحد بوقف في طريقنا ؟
(ويدوي صوت التصفيق وأثناء ذلك يسدل الستار.
تعليق