تويت
أم الصابرين-قصيدة بالعاميه المصريه
أم الصابرين
**********
فرعون وإيه هيفرعنه؟
فرعون وطايح ف الخلايق وقفوه
ساهي ولابد ف الدره
تعلب وداهيه ف الكلام
شوف يا سلام
***************
مش لايقه في توب الحداد
يا صابره يا ام الصابرين
حَملك مقدر بالسنين
من بكره يطلع صاغ سليم
مدمعيش
صوتك حرايق ف المداين والشوارع والبيوت
صوتي تبوت
واقف ف حلقي نفسي اموت
ولا اشوفش لطمك ع الخدود
************
واقفين على بابك
عاملين دراعهم نيل
قومي اغسلي همك
واتوضي وادعيلهم
بالرحمة والغفران
وعنيهم الساهرين
بتنور الفوانيس
وتونس القاعدين
حولين براح غيطك
إدهم حجر صوان
والكلمة قد القول
والجند دا مبروك
ف رباط ليوم الدين
****************
هنحب مين؟
ونذم مين؟
نشكي لمين؟
ومين هنرفع عل الكتاف
غير الأنين
تلاتين سنه متكممين
وف ساقيه دايره مربوطين
متغميين
فينا الغلابه المكسورين
فينا اللئيم
والكل واقف إيد في إيد
مستنيين
رفعة إيديكي بالدعا
مدمعيش
انت الحبيبه والقريبه والسكن
رغم الكوارث والمخاوف والمحن
قدرك تعيشي ف السما ذي النجوم
واحنا الذخيرة والمدافع والهتاف
أبدا ومش ممكن نخاف
أبدا ومش ممكن نخااف
--------------------------
بقلم:نهى رجب محمد(ريشة المطر)31/1/2011
تعليق