تويت
الشكر كل الشكر لك شاعرنا على مشاركاتك الرائقة
في مسابقة شهر يناير ..
وباقة محبة وتقدير أرسلها لحسك الشعري المتدفق في حب الوطن
وهذا تجميع لمشاركاتك الطيبة في المسابقة لتيسيير التقييم ،
والاستمتاع بقلمك المبدع ..
الشاعر المبدع ..:
>> الأستاذ جمعــــــه محمــــــد <<
لا للكلام لا للسلام لا للوعود
لا للكلام : والفضفضه من غير حدود
لا للسلام : رغم الدمار رغم القيود
لا للوعود: ربى شهد على نقضكم كل العهود
ناس فى قديم الزمن للمجد وضعوا أساس
دفعم حياتهم تمن ولا خافوا بطش وباس
آلت الامور بعدهم للى حريص ع الحياه
مع إن عجبى الحياه .مع ذُل ما تنداس
مسرح كبير الدنيا .وإحنا .مُهرجين .مُتَفرجين
خلف الكواليس ناس كبيره ...معلمين
ماسكين خيوط .بيحركونا. شمال .يمين
نضحك بُكى.نبكى إبتسامه.وبرغم دا. مستسلمين
يا ورده يا مفتحه .مين ف الورود قدك؟؟؟
كل القلوب مُغرمه.....وبيطلبوا ودك
شُفتك بتبكى وحيده.ولا حد كان جنبك
قُلت الجمال لو بناكى .يبقى الغرور هدك
وعجبى !!!
هلال بيهل ويعدى زمان ويمر
وعمر سراب ولا بيدى بسرعه يفر
وكل ما الملم اوراقى وارتبها..
الاقينى .......محلك سر
حلمت ف يوم بمركب خير معديه
بتحدف للبشر افراح وحُريه
وقلت اَلْحَقْ ينوبنى م الهنا شويه
لقيتها لعبه ملعوبه .وكان مقلب حراميه
وعجبى !!!
جايلك يا بهيه شايل حلمى بايديا
مش هافضل اقول واعيد ع اللى باعوا القضيه
لو هاسكت اكون شريك .وهاتفضل هيا هيا
هاتوا إيدكم ف إيدى ونغير لو شويه
( شهاده )
رعد وبرق وريح هوجاء
ذعر وخوف ولا طوق لنجاه
قلت لنفسى وانا باتشاهد
هو الموت مش بعدو حياه
تصون الود يا صاحبى اشيلك جوا نن العين
ولا يمكن اخون عهدك ولو حتى زمانى خان
ولو تمشى عشانى قيراط انا امشيلك 200فدان
ولا يمكن ابيع ودك لو اتحدى جميع الكون
عارف يا صاحبى إيه مخلينى حزين..؟؟؟
إن القلوب صبحت حجرمع إنها ف الاصل طين
لا ترق ولا ترحم ولاتغفر ولاتسامح ولا تنسى وبتصالح
والحقد ويا الكره اصبح جوا منها شئ دفين
دخلت مداين الشُعرا وقلت اعرف حياتهم كيف
لمحت هناك قصور فخمه سما صافيه وجو لطيف
وقلت اسكن هناك يمكن اعيش واقع بلا تحريف
لقيته كان بريق كاذب خيال مع طيف
وعجبى!!!!!
( مملكة الحب )
ساحر وسارق وقاتل وله ضحايا كتير
يحتل كل القلوب لا بقصد ولا تدبير
يإسر ويسحر ويقتل لا يقول غنى وفقير
قبل الزمان بزمان له مملكه بتسير
وعجبى !!!!!
بحور الزيف طوفان والحق بيصارع
امد إيديا بالنجده الاقينى معاه واقع
وواقفه الخلق تتفرج علينا واحنا بنّازع
إرادتهم كسرها الزيف وصار الكل له خانع
وعجبى !!!!!
( ناقوس الخطر )
هذيان وتوهه وضياع راح الامان يا ناس
مسجون ف عالم كبير بلا سور بلا حراس
باعصر دموع الصبر وبادق ع الاجراس
طالب امان مش كتيرطالب ضمير حساس
العين زاغت واصفر الوش الموت واقف ع الراس
وشهيق وزفير والدمع يسيل كُلها حبة أنفاس
وانا مين انا فين انا عشت سنين اوعشت يومين
وكأنى لاجيت ولا مره مشيت ع الارض وكنت بادوس
وعجبى !!!!!
يا ورده يا مفتحه مين ف الورود قدك ؟
كل القلوب مُغرمه وبيطلبوا ودك
شفتك بتبكى وحيده ولا حد كان جنبك
قُلت الجمال لو بناكى يبقى الغرور هدك
وعجبى !!!!!
بعين واحده كشفت دليل .ومية برهان
وخُفت التانيه افتحها.لا كل المستخبى يبان
وقفت ف حيره من امرى ..أغمض
ولا اقف ثابت.ولوحتى جرفنى طوفان
وعجبى !!!!!
ساطور ف إيد جزار وبيقطع
لحم القطط والكلاب لحم البقر ينفع
سئلت روحى سؤال.هو الضمير لو مات
لحم البشر يُصلح؟ طب قولى إيه يمنع
ف قلب الخوف رسمت حروف من البسمه
وضلايه وشجره وزهره مع نسمه
ولمّا الليل سواده زاد ما سلمتش
على عود الامل شبيت وصرت احفر ف نور قمره
دبيب النمله جوا الصخره ف الضلمه بيعْلمها
وطير طايره ف سما عاليه بيهديها يعَلِمها
وبشريه بتتخبط فأرسل ليها هاديها مُعَلِمها
ووهن وفُرقه ف الأمه قادر وحده يقويها يلملمها
كراريس كتب مقلمه ودى مسطره وبرجل
م الإبتدائى لحد الجامعه كنت ارمح عشان اوصل
رهوان ف ساحة سبق م العلم كنت انهل
دلوقتى من غير كسوف عاطل وباتسول
وعجبى !!!!!
فرح وعند الجيران انا قلت أقدرهم
افرح معاهم وانور فى قناديلهم
سألونى فين دعوتك؟ انا قلت حق الجوار
قالوا الحقوق إنتهت ولا عادش لازمهم
وعجبى!!!!!
قالوا عليك لعّيب وياريت كلامهم زين
كنت الحياه كسبتها ولعبت ع الحبلين
لكن طلعت عبيط مخلص قوى وأمين
باعوك ف سوق النخاسه وإتقلبت الموازين
يا قلب طيب يا طفل برئ وصغير
يا صفحه بيضه حواها المسك والعنبر
لو إبن آدم فضل أبيض كما الأول
راح تبقى جنه الحياه بالحب تتعمر
وعجبى !!!!!
قلبى أنا وسط الجمال دا كُله تاه
هفهف وطار عدى الخيال والحب كان بدر ف سماه
وغزل ف توب من الآمال وهتف وقال محلى الحياه
وقطف زهور لؤلؤ ونور من كل شاعر ف المسابقه كان معاه
باقة محبة وشكر نهديها لهذا الجمال
لشاعرنا المبدع الأستاذ
جمعــــــه محمـــــــد
وإلى باقة محبة أخرى وشاعر آخر
من المشاركين في مسابقة شهر يناير
شكرا لكم
/
/
/
ماجي نور الدين
تعليق