تويت
الشكر كل الشكر لك شاعرتنا على مشاركاتك الرائقة
في مسابقة شهر يناير ..
وباقة محبة وتقدير أرسلها لحسك الشعري المتدفق في حب الوطن
وهذا تجميع لمشاركاتك الطيبة في المسابقة لتيسيير التقييم ،
والاستمتاع بقلمك الراقي ..
الأخت العزيزة الراقية ...:
>> نجـــــلاء نصيــــر <<
لوكنت عارف رد السؤال
ما كان ليلي طال
ولا روحت اشتري الصبر م العطار
ولاعديت النجوم ولا صار حالي حال
روحنا وجينا وانت يا بهية نن عنيننا
نشقي نعيش وشغل م نلاقيش
لكن لترابك عاشقين
وف غربتنا عنك مش مرتاحين
باب الأمل مفتوح بس اقتلوا الخوف
مستني كل ملهوف يرتمي ف أحضانه
طريق الأمل بيقول مستني يا اخواني
نتجمع في دنيتنا ونتلم من تاني
راح نرمي حمولنا علي الله
ونسعي لنشر الخير فيها قول إن شاءالله
ونعمل من الأمل سد لكل من قال للحق لأ
ونمد الأيد لكل من مد ايده للنور مد
دا رب العالمين هو مجيب السؤال
ايش يفيد يا أنوار الاستعانة بعبد
والله في الشدايد دقيت الأبواب ما في حد رد
لكن عزاي في الدنيا صديق عنده قلب
قالوا في الأمثال الكداب تفضحه عينيه
واللي يحب برضوا دايما يبان ف عينيه
الحب يا أنوار قدر ولو حصل هنخبي ليه
واللي جوا ف قلبه شيء ضروري تفضحه عنيه
كل الحكاية إن أنا بحلم
تتسد حدود الخوف ونعيش بحرية
ومش كل حاجة صغيرة تتحول لقضية
وكل محتاج في الدنيا حاجته تبقي مقضية
تالله والله ما في أي قضية
الحكايا إن كلنا لازم نحسن النية
ونضرب علي أيد الشيطان بأيد قويه
مش نقول نتوحد ونية الفرقة مستخبية
كل الحكاية غننا بعدنا شوية
وانشغلنا ف مليون الف قضية
ونسينا تراب ارضك يا بهية
والله ما تزعلي حقك يا غاليه عليّ
تحكي عن الناس الجبارة
اللي عملواكردون ع الحارة
مسكين الواد الدرويش
راح ضحية زمارة
تقول الحق دي شطارة
ماتخاف يصطادك الظالم بسنارة
ولا يجلدك الجبار وتروح خسارة
ولاتعيش ف ذل ومرارة
يارب ننسي الفرقة والصراع
اللي عمل في دماغ الامة صداع
حدود وأسوارومشاكل وجدار
ومؤتمرات وأسرار
نقول إيه ولا إيه عن الدنيا وألاعيبها
العيب فينا وبنعبها
ليه رضينا نبقي عرايس بخيوط
ليه رضينا بجلادين الموت
الحدوتة بتقول بهية خلفت بنتين
مريم وفاطمة هما نور العين
واللي يفرق بينهم قطع ايده الاتنيين
بالحب قلوبهم عمرانة مالك يا أبو وشين
ياللي شايل همومك علي كفك
بكره ينصلح حالك والدنيا تضحكلك
وتنسي كل همومك وتعيش متهني
وتضحك لك السنين وتفرح وتغني
حرة أنت يا بهية وده طبعك
واللي يجهلك يظن إنه سرقك
وانه بالكلام والكدب سايقك
وانه ملك زمامك وحفر لك قبرك
نحاول نفتح الأبواب
ونرد علي الأسئلة والحكايات
والعقل واللسان هما والله الحصان
اللي لما تصونهم ما تنهان يا انسان
تاني هنقول ونعيد علي اللي باعوا القضية
والله بهية دي نور عينينا تفرح بلمتنا مع بعضينا
ولو وفينا بالعهد مش هيقدر عدو علينا
ايدك ف ايدي أنت وهي نبعد الفتنة عن أراضينا
لوم الأمل ياجمال والحمل علي القلب جبال
ايه يفيد الظالم ف الدنيا لاجاه ومال
وليه نرضي ننداس واحنا قلوبنا من ماس
كل مطالبنا نعيش بكرامة يا ناس
راح نقف ف وش الاعاصير
الدنيا مليانة بالخير
بس نبدا بنفسنا ومنلومش الغير
وطول ما القلب عمران لازم يعم الخير
يا بهية يا أم الرجال
شايلة من الحمل جبال
دايما بتخافي علي ولادك
وفتحةايديك لكل من دق بابك
هي كده دايما أمنا الغالية
تفتح ايدها لولادها
وتشيل في قلبها الهم
وكل حلمها إننا نتلم
نور طريقك بالتسامح
انسي الإساءة وسامح
ابدأ بالخير وصالح
وفارق المصالح
ما النور واضح وصريح
ليه نمسك في حبال الريح
وما نداوي كل جريح
والحق في دنيتنا شهيد طريح
أهل الخيانة دول وسواس خناس
بينشر سمه بين كل الناس
والواحد منهم مايقدرش يمشي من غير حراس
ولو يوم وقع يتنسي وينداس
رغم الظلام والخوف يا بهية عندي أمل كبير
إنك في لحظة تتحرري وتغيري كتيير
لأن أرضك طيبة ونيلك سلسبيل
وولادك لخاطر عيونك يشيلوكي شيل
نور طريقنا يا رحمن
واكفينا شر بطش الانسان
واحفظ أرضنا من ثورة البركان
وانشر السلام في كل مكان
علطول نقول بكرة الحق نهاره يطول
واللي يصبر لازم ينول
وبكرة ينحبس الغول
في قبر كبير مهول
أن جيت للحق بهية نور العين
وترابها كحل عنيي الاتنيين
وأخاف عليها من الظالمين
دا هي أمي وافديها برمش العين
ناس عايشة علي الأحلام
وناس رايقة ف كل مكان
وناس بتعيش علي الغش
توري للناس ألف وش
شوفوا صنوف الناس
ناس تمشي بالحراس
ووقت الخوف تنداس بالمداس
وقلبها ميت وتدعي الاحساس
هي الدنيا كده يوم حلو ويوم مر
ويوم عن يوم بيعدي أمر
لازم نفوق من الوهم لأجل نمر
وقول الحق دايما مش بيضر
راح بو عزيزي ضحية غدار
أشعل بجسمه ثورة الأحرار
لكن مش معني كده نحلل الانتحار
الدرس قاسي يا ريت تفهموا يا كبار
ليل الظلم مهما طال لازم نور الحق يشقه شق
وإن صوت الحقيقة علي مين يقدر يقول لأ
دي بهية عروسة متزينة بطرحة الأحرار
وترابهاحنة لكل من هب وثار
يا ولاد بلادي بهية بتنادي وتقول
أنا شايله دايما الهم
ونفسي تعيشوا ف سعادة وبيعد عنكم الغم
دا أنتوا دايما ف قلبي أنتوا والله الأهم
باب الخير في أرضك يا بهية دايما مفتوح
ما يبعدنا عن حبك أبدا الخوف
ولوتندهي أعديلك بدل الخطوة ألوف
واجري بسرعة البرق عليكي وأنا ملهوف
أملي كبير ف لم الشمل
ويتجمع كل الأهل
ما تفرقنا حدود وسدود
ولا كلمة ف قلب حقود
هي الحكاية إيه ظلمنها كده ليه
بهية طول عمرها شيلانا
احنا ارتضينا بالظلم والمرارة جوانا
ليه كل لما نتخنق نلوم أرضنا وسمانا
نور طريقك بذكر الله
وحب الخير لمنتهاه
دا كل من نسي ربه تاه
سبحانه لا أعبد سواه
نور الحق لازم يبان
ويصعق كل مجرم جبان
الثورة نجحت بالايمان
لأنهم رجالة شجعان
لكل شاعر في المسابقة معانا
كلماتكم حروفها قصة جمعانا
شوفوا الحكاية من اولها لآخرها موحدانا
سعدت بمشاركتكم وأتمني يتكرر لقانا
من قلب عمران بالخير
وينكر نفسه لأجل الغير
بقول الكلمة أمانة ومنصانة ويانا
والشعراء في كل مكان مايرضوا بمهانة
منورة مسابقتنا ياسميرة
ويارب تجمعنا مسابقات كتيرة
انت من المغرب العربي بلد الاهل والخيرة
وبكل الود أحييكم ودي مش كلمة أخيرة
لماجي أحلي سلام وكمان أحلي كلام
أنت جمعتي شعراء كتبوا أرقي كلام
ومن مسابقة لمسابقة يا ماجي للأمام
لأن الشعر ملكة نهديك أحلي سلام
روينا من بحور الشعر كلمات
عبرنا عن أحلام وصورنا وجعات
بلسان انسان بسيط حكينا أمنيات
كل المحبة ليكم ولشعرا الملتقي بالذات
لملم لمنا لما كنا هنا كلنا لمة
بدأنا حدوتة واتوحدت الكلمة
وكل شاعر مننا حكي بكل همة
تحية من القلب لكم ياشعراء القمة
أصل الحكاية إن الكلمة أمانة
مش ربس رص كلام وشغلانة
دا الحرف ياجمال مخلوق ويانا
وياريت نتجمع دايما وبجمال الحرف نثري منتدانا
باقة محبة وشكر نهديها لهذا الجمال
لشاعرتنا الراقية الأخت الحبيبة
نجــلاء نصـــــــير
وإلى باقة محبة أخرى وشاعر آخر
من المشاركين في مسابقة شهر يناير
شكرا لكم
/
/
/
ماجي نور الدين
تعليق