بَحْرَه عِشِقْها الشّط ملاّها حلا لولو

وْصَدفْ َرمل وْدَفا

بِتْمــوج

بْتاخُذ مِنِ النّسْمـات مرجوحه

عطر وشذا حب وأهــات

بِتْمدّ إيديهـا

بْتِقْطف نَجِمْ لَتقدّمو

خاتِم فَرَحْ في يوم خطبتهـا

وِبْتِغْمُر العشـّـاق عَ ضْفاف شِفّتهـا

إنتـي..

يــا بحْرِةِ الـْ مِشْتـاق

لـَذوق مَيِّـتْهـا

-------------

فَسْحِة مِرْج بْحِضْن الْجبل مزروع حِنّيـّه

مثل الطفل

نايم على زِنْدو

والريح يهَللو

غفيان بين الوعي والحلم

الفجر يضحكلو

والشمس تبعث مناديل الفضا

وبتلفلفو بالضو

بصير صدرو حقل مزروع بقمح

خطوط العرق أنهار حريه

إنتي

يــا مرج قلبي الْبين إيديي

------

غابه العنق ممدود لحدود السما خضرا

وسع المدى خصرا صرلا عمر,

زيّ الْكإنْها ناطره

ضو القمر

وْضو القمر عشقان

بْينزل وخجــلان

بْيحكي شويِّ شويّ

عم بِسْمَعو بيْوَشْوِش الوديان

بركُض لحتّى إسمعو بيركض معي

وْما بِلْحقو

وْما بفْهمو

هذا شبح

إنتي يا غابه

اللّي همسْها أجمل الألحان

-----

ببقى انا والليل

والعتمه

وسهرات

وحيطان زهقـانــه مْنِ النّظرات

وتلال بيقولو عَلَيها هْمــوم

بْتِحمُل الذّكرى وْقَناديل الدّروب

وخْيال عم بيْدُور في الغرفه

وْصورَه مْعلـّقه وْبرْواز فِيـّو مْراي

وْلمّا عْيـوني بْيِدِخْلـو الِمْراي،

إنتي وْأنا إنتي

يامْرايْةِ خْيــالي

يـا أحلى مْراي.