دوول ديّابة
دوول عصابة
جاية تنهش
لحم الغلابة
اكبش وعبّي
دوول مش مهم
إحنا الأهم
إحنا اللي شايلين
الهمّ
دعم وطرق وكباري
ومدارس ومواصلات
لازم ضرايب تهلكهم
إيشي مباني علي مبيعات
لازم نشغلوهم بالأزمات
أزمة رغيف العيش على
أنابيب البوتجاز
لازم الشعب ينشغل وينام
ونفضل ماسكينه بلجام
أحسن يفلتوا
ويصدعونا بحقوق الانسان
لازم اعلامنا يكون لسان حالنا
أفلام هابطة علي مسلسلات
وزحمة مواصلات
وخانقة ملهاش نهاية
في مصالح حكومية
ما بتختمش الطلبات
من أزمة لأزمة خدونا
وبالأمراض هدّونا
وأكلونا الملوث
والمسرطن والمبيد
والله حالنا يصعب
على العبيد
كل حاكم موظف
عصابة
علشان ف شعبه
يبيد
وإنّ نطق شعب
وقال للظلم لأ
يكون الرد قبضة
من حديد
توأد أملنا
ف التجديد
لكن الشعب هب وثار
علي الطاغي
وقال أحرار
بدمنا نفدي بلادنا
ونطهّروها من الشطار