تويت
(الليلة ليلتك يا وطن)
الليلةْ ليلتك يا وطنْ
ما أنا قلت لك رفرفْ وطيرْ
ما أنا قلت لك خليك كبيرْ
ما أنا قلت لك خلى التهاني
تردّنا ونعيش كتيرْ
ما فضلش غيرك يا وطن
ولوحدك أنت عرفت
تختار المصيرْ
ما فضلش غيرك في الميدانْ
وما عدش غيرك يعرفه
تعظيم سلام يا أهل الميدان
ما أنا قلت لك أنت الكبير
انت السكن
والفرشة خيرك نفرشه
وترابْ بأرضك كان سرير
خليني اقول
ما أنا قلت لك
من يوم ما شفتك في الخريطة
بتشتكي
وتقول وتحكي للزمن
انك يا غالي ضينا
ومشينا ليك طول عمرنا
وكبرنا بيك
وحياة سنين من حلمنا
خلينا ليك
داحنا الغلابة وانت سعدك سعدنا
خايفين عليك
داحنا البلابل والنشيد من قلبنا
والفرح طاير من عينيك
انتو الحبايب يا وطن
قوم قلنا
قوم ضمنا مره بايديك
والليلة ليلتك من زمان
وأكيد هنهتف كلنا
الله عليك
مشوار طويل
واحنا النهارده بنتولد
وحاجات كتيره بتتخلق
جوانا اكبر م الميلاد
داحنا النهارده بنتخلق
ولا حلمنا يعرف ورق
ولا حدّ غيرنا
لسه واقفْ في الميدان
لاجل البلادْ
مشوار طويلْ
ما انا زمان ماسك حبالْ
أوعاك يا نيل
بعد النهارده تقول محالْ
دانا كنت بكتب لك قصيده
واقول خلاص هانت يا نيل
دانا كنت واحد
م اللي عرفوا سكتك
وسنين وانا احلم
كنت سامع ضحكتك
جنب الشجر تحت النخيلْ
واحكي كتير لام العيالْ
وتقولي تحكي لمين يا غالي
دا الوطن مليان همومْ
نفس الحكاية
كنا نحكيها لولادنا كل يومْ
وكتير بنهرب من السؤالْ
والليلة ليلتك يا وطن
ارقص وطوف
خليك يا غالي
في الميدان
غني النشيد دق الدفوف
صدق اللي قال
ما أنا قلت لك
رفرف وطير
دا الليل طويل
والنسمه حلوه والسهر
تحت النخيل
دانت النهاره السلسبيل
رفرف وطير فوق الهلال
خليني أروح
واعمل فرح لأهل البلد
واحكي وأجاوب عن سؤال
أم العيال
هتقول لي فين برضه الوطن؟
أنا أقولها فوق الهلال
تعليق