زمن الحب المنزوع من صدر البنى آدمين ..
زمن الغل المنقوع فى الشرايين ..
زمن الود المقطوع والناس تايهين ..
قول عليه زمن الأنين ..
****
زمن الحق المصلوب وضلوعه ممزقة ..
زمن الحب المربوط فى حبال المشنقة ..
زمن العايشين فى شرنقة ..
قول انه زمن التفرقة..
****
زمن الكره والصراع ..
زمن الشرف اللى بيتباع ..
زمن جهول وغبى الطباع ..
قول عليه زمن الضياع ..
****
زمن الجوع زمن الحرمان ..
زمن و ضاع فيه الأمان ..
زمن الذل والهوان ..
اخرس مقطوع اللسان .
****
زمن احواله غريبة بكل صراحة..
فيه ناس طول عمرها مرتاحة..
وبتهرب م الراحة ..لراحة..
فيه ناس تاخد كده ببجاحة ..
وناس تدى بضمير وسماحة..
****
ناس فى الابهه مطرح ماتروح ..
ناس عايشة فى بروج وصروح ..
وناس ساكنين فى عشش وسطوح ..
ناس بتجيب اللقمة بزهق الروح ..
وبتصرخ حسها مبحوح ..
****
ناس تلبس خيش وتنام على خيش ..
وتقف باليوم فى طابور العيش ..
والحال على أده ما بيكفيش ..
وناس بتنام دايماً على ريش ..
ويسموا الألف جنيه بقشيش ..
****
ناس دايما بتبات جعانه ..
وناس قاعدة تبص وفرحانه ..
وناس على طول عمرها شقيانه ..
وناس بتدور على شغلانه..
ناس شبعانه ..وناس فى مهانه..
****
ناس عندها اعمال مربحة..
وعيشتها هنية ومفرحة..
وناس طايرة فوق اجنحة ..
وناس بتلف على الأضرحة ..
****
ناس فى نفوسها شر وريبه..
وعمايلها فى الشر غريبة..
وناس فى قلوبها سماحة وطيبة..
وناس عايشة على الدنيا غريبة..
****
ناس واصلة ليها ضهر وسطوة..
وناس تسرق ملايين فى خطوة..
وناس تسمى الرشوة عطوة ..
وناس ترشق فى الجتب مطوة..
****
ناس نجوم ملعلطة.
وناس قدرها الشعبطة ..
وناس حياتها مرمطة..
آه يازمان اللخبطة..
****
ناس بتزيد دايما اموالها ..
وناس الدنيا ولا على بالها ..
وناس ميسرش ابداً حالها ..
وناس بتبيع م الفقر عيالها..
****
ناس تركب ماركة خنزيرة..
وفلوسها تبعترها كتيرة ..
تشترى فيللا كبيرة ..
تعمل حفلة خطيرة ..
تشرب ويسكى وبيرة ..
تعشى الكلب لبن وفطيرة ..!!
وناس من فقر الفقر فقيرة ..
وناس من هم العوزة فى حيرة ..
وناس رابطة على البطن جبيرة..
وناس تتغطى بطرف حصيرة ..
ماتيجى نفضها والنبى سيرة..
***********