تويت
على فين يازمن مودينى
ده انا اشترتهم وهما باعونى
وكنت فى حزنهم بمسح دمعهم
وفى أول فرصة سبونى ورمونى
****
كل ليلة عليا بتفوت
اسمع فلان بيموت
أقول ياه عالانسان
عايش وناسى الموت
***
متقولشى رزقى قوم واشتغل
ربك بيحب بس العمل
مبيرزقش غير اللى تعب
ده الديب بيسعى ويرزقه بالحمل
***
البحر محوّطنا مع انه مالح
وكلام الناس حوالينا جارح
دايرة وبتدور علينا
ما تعرف بكره من إمبارح
***
فى الكتاب علمونا كل شئ بحساب
وفى المدارس حطولنا ميت بواب
ولما كبرنا......خرجنا للدنيا لقينا
السما والأرض مفيش ما بينهم باب
***
إزاى تنام والشر حواليك
يمدلك كرباج وتمدله ايديك
متقوليش أنا أحسن منه
شيل الغشاوة وبص بعنيك
تعليق