تويت
يا أم شعر أسمر
وعيون كحيلة
بحلم بيهم كل ليلة
وبتوبك الزاهى الحرير
اللى تلات ألوان
أحمر وأبيض وأسود
****
الاحمر ..ده لون دمى
اللى ياما اتحرق
من كتر نار همى
وقلت فى الأخر فداكى
فدا طينك وفدا أرضك
دى لما الدنيا ضاقت
رميت نفسى فى حضنك
وقلت..أنا فى عرضك
لكن
لقيتك متكتفة بحبال الخوف
اللى فرضوها عليكى ولاد الشوم
ودلوقتى جاه اليوم
أسود على كل ظالم
أبيض على كل مظلوم
***
وقلبى كما النسر بيطير
طارح غنا ومواويل
بيحلفك وحياتى عندك
وحيات طينك وعرقك
اللى روى أرضك
وحيات النيل
مش عاوز اسمع
أهة واحدة
ولاعايز أشوف الويل
املى أرضك غُنا
وأنسىّ الانين
أنا اللى ياما بكيت
ولا عدت تانى حزين